La Plata, Argentina. ‘Guernicas del lado de acá. Itinerancias y resignificaciones del cuadro de Picasso en Argentina’ (Guernica-k hemengo aldean. Picassoren koadroaren ibiltaritza eta esanahi berriak Argentinan) du izena Raquel Macciuci La Platako Unibertsitateko doktoreak argitaratutako liburuak. Idazlanak Argentinan eragin handia izan zuten bi oinarri izan ditu: batetik Gernikak 1937an pairatutako sarraskia eta bestetik Pariseko Nazioarteko Azokarako Pablo Picassok margotutako olio-pintura. Hortik abiatuta, “artista malagarraren pinturarik politikoen”aren erreprodukzioak bilatzen ditu adituak Buenos Aires hiriburuan, Buenos Aires Handian eta Buenos Aires probintzian.
Egileak azalduta, “Liburuaren helburua ez da Buenos Airesen dauden kopien –fidelen edo moldatuen– inbentario zehatza egitea baizik eta bakoitzaren historia aztertzea. Zer esanahi berri dituzten une historiko berrietan; zeintzuk izan ziren margotzeko arrazoiak eta ea indibidualak edo kolektiboak izan ziren; eta zein lekutan ezarri zituzten, oro har espazio publikoetan baina baita erdi publikoak edo pribatuak direnetan ere”.
Guernicak euskal tokietan eta kalean
Macciuciren testuak lau kapitulu ditu eta koadroaren ibilbidea jorratzen du, “Parisetik Madrilera, New Yorketik pasatuz”. Ibilbide horrek, Picassoren margolanak zergatik dituen Atlantikoaren alde honetan hainbeste kopia (eta non, eta nolatan...) ere azaltzen du. Azpimarratzekoa da hirugarren kapituluan euskal tokiek duten aipamena, bereziki La Platako Euzko Etxeak eta eskualdeko euskal jatetxeek.
Horrez gain, “Kartografia metropolitarrak: CABA eta AMBA” izeneko pasartean 'Guernica' islatzen duten hormirudiei buruzko informazioa eskaintzen du Macciucik, argazki bilduma handi batekin, Buenos Airesen (CABA) eta hiriburuaren inguruko auzo eta herrietan (AMBA) dauden muralak ezagutzeko.
‘Guernicas del lado de acá. Itinerancias y resignificaciones del cuadro de Picasso en Argentina’ liburua apirilaren 29an kaleratu zuen UNLPko argitaletxea den EDULPek, Industrias Culturales bilduman, PDF formatuan. Eskuratzea doakoa da eta esteka honetatik jaitsi daiteke.
Lagun bati bidali
Komentarioa gehitu
