Egutegiak irailaren 8a ezartzen badu ere Euskal Diasporaren Egun ofizial gisa, Argentinako euskal etxeek asteburu honetan bertan ekingo diete ospakizunei. Lehen hitzordu nagusia Chacabukon izango da: bertako Guillermo Larregui euskal etxeak indarrak batuko ditu Arrecifesko Euskaldunak Denak Bat, Pergaminoko Lagun Onak eta San Nicolaseko Euzkal Etxearekin. Aurreko urteetan finkatutako dinamikari segituz, eta bertako Udala lankide, lau euskal etxeek elkarlanean antolatu dute jaialdia, besteak beste osagai izango dituena zuzeneko musika, dantzak, sukaldaritza, euskarazko jarduerak, jokoak, musa eta tailerrak. Horrez gain, erronka gastronomiko berezia prestatu dute: 1.200 tripaki bizkaitar erara anoa zerbitzatuko dituzte, hiru metro baino gehiagoko diametroa duen zartagin erraldoi batean.

Ekitaldia goizeko 10etan hasiko da Danborrada batekin. Desfilea Euskal Etxetik (R. E. de San Martín kalea, 230) abiatu eta San Martin plazarainoko bidea egingo du. Bertan egingo da ekitaldi ofiziala, Arrecifes, San Nicolás eta Chacabucoko euskal etxeetako abesbatzak partaide. 11:45ean, bertako sukaldarien koordinatzaile Lucía Igarzabalek euskal gastronomiari buruzko sarrera-hitzaldia emango du. Bazkalostean, dantzari txikiak oholtzaratuko dira. 16ak aldera, danborrak berriro entzungo dira martxan, eta horrek hasiera emango die Arrecifes, Pergamino, San Nicolás, Cañuelas eta anfitrioi den Chacabucoko dantza-taldeen emanaldiei 18ak arte, ondoren San Nicoláseko Haritz musika-taldearen kontzertuari abiatzeko. Horrez gain, hasiberrientzako Mus Tailerra eta txapelketa azkarra ere antolatu dira. Euskara-tailerrak, haurrentzako zein helduentzako jolasak eta euskal kirol tradizionalak ere euren lekua izango dute; baita Diasporako gazteeei Euskal Herrian murgiltze kultural eta linguistikoa egiteko aukera ematen dien 'Gaztemunduri Ateak Ireki' programari buruzko informazio-guneak ere.

Argentinako beste hitzordu batzuk

Chacabucoko hitzorduaz gain, agendak aldi bereko hitzorduak batuko ditu herrialdeko hainbat tokitan. Irailaren 5ean, larunbata, elkarretaratze bat egingo du Lapridako Lagunen Etxea Euskal Etxeak. Igandean, General Rodriguezen, bertako Eusko Aterpeak Euskal Diasporaren Eguna eta bere 27. urteurrena ospakizea uztatuko ditu, erreki zaporetsu bat ere tarteko.  Ordu berean, Villa Mariako Euzko Etxeak Diaspora ospatzeko bazkaria egingo du, arratsaldean te bingoa eginez. Bestalde, Comodoro Rivadaviako Euskal Echeak herrian egun horretan gauzatuko den Patagoniako Aitzindari Immigranteen Desfilean parte hartu eta Diasporaren Eguna ere ospatuko du, azpimarratuz "aukera bat d(el)a harro baiesteko gure erroak eta gure identitatea"..Gómez-en, Brandsen partidoan, 'Vascos en Bradsen' elkarteak deia egin die bertako lagunei, Lujango Ama Birjinaren Parrokian egingo duen Gernikako Arbolaren kimu baten landaketan, Tandilgo Euskal Etxeak emana, parte hartzeko.

Buenos Airesko Eusketxek astelehenean, hilaren 7an, egingo du bat , bilera birtual batera deituz 18:00etan, partaidetza eta hausnarketa gune bat eskainiz egunari buruz eta Diasporaren errealitateaz eta izaeraz (eskatu esteka eusketxe@gmail.com helbidera).. 8an berean, bazkaria  'Vascos de Brandsen'ek antolatua Club El Indio-n, euskal gastronomia eta dantzez (xehetasunak baieztatzeke). Hilaren 12an, larunbatean, Necocheak eta Buenos Aires hiriak hartuko dute lekukoa. Kostaldeko hirian, Euzko Etxeak bere ohiko Gaualdi Artistikoa aurkeztuko du Etxeko bost dantza taldeen eta Osasuna Otxotearen emanaldiekin, txistorra, pintxoak eta txerria eskainiko dituen erromeria bati bide emateko. Bien bitartean, Buenos Aires hirian, Iparraldeko Euskal Etxeko (Moreno 1370, CABA) Alkartasuna sukaldaritza-taldeak pintxoak, enpanadak, zozketak eta herri-kantuekin hartuko ditu bertaratutakoak. La Platako Euzko Etxean, gonbidapena 12rako da baita ere, izan ere "Kulturaz, tradizioz eta bertopatzeaz beteriko gau batera, elkarrekin ospatuz Euskal Diasporaren Eguna". EEko polikiroldegian da hitzordua, sarrera 4.000 pesona, musika, dantza eta bozkarioa osagai, "bozkario handia, gure erroak eta gure euskal kultura ospatzea helburu duen hain gau berezi honetan".

Astelehenean, artikulu berri bat, Euskal Diasporaren ospakizunez munduan barrena.

(Zeure euskal etxea eta bere Diasporaren Eguneko ospakizunak ez badituzu artikuluan islatuta ikusten, aski duzu info@euskalkultura.eus helbidera idatzi eta informazioa pasatzea. Mila esker aldez aurretik)

Franklin kaleko euren egoitza txiki geratuta, lekua aldatu egin behar izan zuen Chascomúseko Zingirako Euskaldunak Euskal Etxeak eta La Alameda estantziara pasa, EEaren birfundazioaren hogeita hamabosgarren urteurrena ospatzeko bildu ziren 300dik gora lagunei leku egokia ematearren, joan den larunbatean, abuztuaren 29an. Afaria eta erromeria gau luze eta pozgarria izan zen, oroitzapen, emozio eta berrelkartzez betea. Partaide izan ziren FEVAko lehendakari Carlos Miguelena, Buenos Aires probintziako zenbait euskal etxetako ordezkariak —La Plata, Mar del Plata, Maipú, Cañuelas, Necochea eta Buenos Aires— eta Turismo, Kultura eta Kirol Udal Idazkaritzako agintariak.

"Agur" hunkigarri bat dantzatu zuten batera Eusko Haziako egungo zuzendariek eta 1991tik aurrera taldea gidatu izandako zuzendari guztiek, eta halaxe hasi zen ikuskizuna. Julieta Laborde, Catalina Martínez eta Camila Humaran gidari, 70 dantzari igo ziren oholtzara. Zuberoako Maskarada, kaskarotak, jauziak, arku dantza, ezpata-dantza, azkoitia, fandangoa eta arin-arina dantzatu zituzten eta talde ertaina estreinekoz taularatu zen ezpata-dantzarekin; bertako dantzariek eta euskal etxe lagunetakoek elkarrekin prestatu eta eskaini zuten ikuskizuna. Horrez gain, Gustavo Armendariz elkarteko lehendakariak gainbegirada eman eta 1951ko sorreratik eta 1991ko berrabiatzetik gaur egunera bitarteko bidea jorratu zuen.

Ospakizunak omenaldiak eta aldaketak ere ekarri zituen. Teté Ayerzak alkate kargua hartu zuen, bere semeek dantzaturiko "Agur" batekin gorazarre egin ondoren. Bestetik, Ricardo Lucastegui eta Julio César Toffani saritu zituzten Mus Txapelketa Nazionalean lortutako txapeldunorde postuagatik, eta aurreko agintariak eta batzordekideak ere omendu zituzten. Musika arloan, berriz, Bautista Constancio, Eloisa Constancio, Amparo Güimill eta Maite Orondo gazteek osatutako Denok taldeak jendaurreko bere lehen emanaldia eskaini zuen Txoriak txori, Lau teilatu eta Ikusi mendizaleak abestuz. "Oso pozik gaude egindako lanarekin. Lau hilabetez aritu gara hitzordu hau prestatzen, eta oso gustura amaitu dugu lortutako erantzunarekin, berriro egiteko gogoa geratu zaigu", laburbildu dio ekitaldia Armendariz lehendakariak EuskalKultura.eus-i, Chascomúsko euskal elkartearen urteko egutegiari gailur bikaina ekarri dion ospakizunaz harro.

Zorionak, Chascomús!

"Frontoia gure bizitzaren bihotzean" ('Un fronton au cœur de notre vie’ jatorriko bere izenburuan) du izena ‘Zazpiak Bat’ bere frontoiaren 120. urteurrena ospatzeko Saint Pierre eta Mikeluneko (SPM) euskal gizataldeak egin eta estreinatutako dokumentalak. Saint Pierre uhartearen bihotzean, Richard Briand Plazan kokatua, mende luzea duen frontoia gertaera askoren lekukoa izan da —kontuan hartu gabe aurreko egurrezko frontoi bati ordea hartu ziola— eta pilota partidez gain:beste hainbat ekitaldi abegitu ditu, tartean herri kirolak, Téléthon-en erronkak, petanka txapelketak, Uztailaren 14ko jaiak… eta pasarte horiek guztiak dira dokumentalak bildu duena. Filma, Udal Liburutegiko Mediatekak eta SPMeko Euskal Etxeari zor zaio, honakoen irudiak baliatuta: Studio Briand, SPM la 1ère, Denise Télétchéa, Frédéric Fouchard, Saint-Pierre Series eta L’Écho des Caps.

Urteurreneko ospakizunak, Saint Pierren urtero abuztu erdialdean egiten den Euskal Bestaren baitan gauzatu ziren, aurten 10etik 16ra, tarte horretan pilota paleta goi mailako bi txapelketaren egoitza bilakatuz Zazpiak Bat: "Euskal Besta" Emakumezkoen Pilota Txapelketa eta Frantziako Euskal Pilota Federazioarekin batera antolatutako gizonezkoen ‘Challenge France 2026’ txapelketa, azken 30 urteetan lehen aldiz egina bertan. Kaledonia Berriko Chantal Larrondok eta Mirentxu Eyherabidek bereganatu zuten txapela emakumezkoen lehian eta ‘Challenge France 2026’n lehenengo saria Saint Pierre bertako Dimitry eta Cédric Choik. Pilotariak besteak beste Frantzia kontinentaletik, Quebec, Kaledonia Berria, Reunion Uhartea edo SPM bertatik etorriak ziren.

"Frontoia gure bizitzaren bihotzean" dokumentalaren estreinaldia, frontoian bertan

Kaledonia Berriko Chantal Larrondo & Mirentxu Eyherabide txapeldun SPMko Amélie & Albane Poulain ahizpei irabazirik

Dimitry & Cédric Choi txapeldun, Jean-Christophe Visentin & Axel Didier Couzarde bigarren Challenge France txapelketan

Sain Pierre bertako euskal abesbatza, Bankuen Korua, 2026ko Euskal Bestan kantari

Eta bertako dantza taldea, Orok-Bat, dantzari. Gogoratu 2025eko Diasporaren Egunean aritu zirela Markinan

Propio Euskal Herritik etorria, Karma taldeak euskaraz eskaini zituen bere kantak

Txikienek ere euren lekua izan zuten, joko eta jolasekin eta, irudian bezala, soka-tiran gogor

Kirol arlotik kanpo ere mota askotako proposamenak bildu zituen Euskal Bestako programak, tartean, musika eta dantza emanaldiak, umeentzako jolasak, bilerak, jateko eta edateko bereziak… Dantza erakustaldiak exteko taldea den Orok-Batek eskaini zituen eta musika errezitalez bi talde arduratu ziren: etxeko Banken Korua abesbatza eta jaian abestera propio etorritako Euskal Herriko Karma taldea (gogoratu Frantziako parte bada ere, Saint-Pierre eta Mikelune artxipelagoa Ipar Amerikan, Ternua aldean dagoela, Kanadatik 20 km eskasera, eta bere banderak ikurrina baitaratzen duela)..

- Jaialdiaren antolatzaileak sareetan: Pelote Basque, Orok-Bat SPM, Bankuen Korua

1956an sortua, Pehuajó-ko Etxe Alai Euskal Etxea, beste hainbat bezala, laguntza emateko, komunitate-gune bat eskaintzeko eta Euskal Herritik etorritako immigranteen kultura-identitatea zaintzeko jaio zen. Bultzada horren atzean Txomin Jakakortajarena apaiz berastegiarra (Gipuzkoa) egon zen, hamarkadatan erakundearen arima. Izan ere, Euskal Herrian garai hartan une gogorrak eta estuasunak pairatzen ari zirenei lagundu eta adoretzea bilatu zuen, bai espiritualki, bai ekonomikoki. Zazpi hamarkadotan zehar, elkarteak aldaketa sozialekin batera eboluzionatu du, baina bi premisa bere horretan mantenduta: euskal kulturaren hedapena eta berau ospatzeko gogoa. Asmo horiek lagun, joan den abuztuaren 1ean, larunbatean, ateak zabaldu zizkion komunitate osoari, musika, dantza, txokolate beroa, urtebetetze opil tradizionala eta Zorionak zuri abesteko parada eskaini zituen jai-jardunaldi batean.

Ekitaldiaren irekieran, Laura Moreno idazkariak ongietorri beroa egin zien bertaratuei. "70 urteko bide instituzionala ospatzen dugu, baina baita ere adiskidetasuna, lan partekatua eta gure sustrai zein tradizioak bizirik mantentzearen harrotasuna. Gaur ziurtatu dezakegu iraganari harrotasunez eta etorkizunari nortasunez begiratzen diogula", adierazi zuen. Berta de Lejarragaren "Gure aitona-amonak" olerkia irakurri ondoren, Morenok hitza eman zion Élida Oroz de Arce kolaboratzaile historiko eta aktiboari; eta honek Sonia Irigarayk zuzendutako "Sembrando Patria" dantza taldea aurkeztu zuen. Ondoren, Aita Donostiaren hitzak ekarriz, Santa Maria Ikastetxeko Abesbatza aurkeztu zuen, Néstor Correak zuzendua..

Ospakizunak tokiko zenbait elkarte bildu zituen, hala nola Espainiar Elkartea eta Aliantza Frantsesa eta honen opari instituzional bat jaso zuen. Jaso zituen baita ere euskal lagunen agur formalak, tartean Avelino Zurro diputatuarena. Egungo zuzendaritzako kide dira Raquel Aristizábal, Sergio Aguirre, María Isabel Suárez Segurola, Juan Eduardo Errea, Laura Moreno eta Nora Barrenechea, Etxe Alaiek laurogei bazkide biltzen ditu gaur egun. Astean zehar, jarduera irekiak eskaintzen ditu, hala nola gimnastika erritmikoa eta taekwondo eskolak, eta Nora Barrenechea lehendakariak berak euskara eta euskal kultura tailerrean zuzentzen duen prestakuntza-gunea uztartzen ditu.

Zorionak Etxe Alai!

Bukatu da berotasun boladak lagun/etsai izan dituen udako pausaldia —ea beroaldiak ere eztitzen diren— eta Bartzelonako Euskal Etxeak indarberrituta iragartzen du ikasturte berriaren abiatzea, zehaztuz 2026-27 zikloko bere kultur programan lehenengo ekitaldiak. Izan ere, irailaren 11an irekiko du Elkarteko Txokoa eta urriaren lehenengo astean hasiko dira aurrez aurreko euskara eskolak. (gogoratu zena emateko epea irailaren 18an itxiko dela, ordutegiei edo prezioei buruzko informazioa, hemen). Berrikuntzak ere badakartza eta, konparazio, Sant Pere, Santa Caterina eta la Ribera auzoan hainbat proposamen artistiko biltzen dituen ZeroØ3 jaialdiarekin bat egingo du aurten Euskal Etxeak eta lankide izango da Bartzelonako Argazki Artxiboarekin, Francesca Bonnemaison Liburutegiarekin eta ‘Convento de Sant Agustí’ Gizarte Etxearekin, aktibitateen antolatzaile eta egoitza ibilakatuz.

Irailaren 9an, asteazkena, "Txillarreko Sukaldaria" dokumentalaren pantailaratzera biltzera gonbidatzen du, 19:30ean 'Centre Civic Convent Sant Agusti' delakoan. Filmaren ostean, publikoarekin solaskide izango dira Asier Ibaibarriaga eta Edurne San Martin dokumentalaren zuzendariak, baita ikus-entzunezkoko protagonista nagusia den Pello Rubio, eta Rosa Lluch eta David Fernández bertako kultur erreferenteak ere. Irailaren 17an, osteguna, 20:00etan, Ana Rubió Jiménez eta Paula Padilla Argelich zuzendarien “El més petit de tots” filma proiektatuko da Euskal Etxean eta ondotik solasaldia aurreikusten da ikusleen artean, Foxy Ramblers taldearen emanaldi batekin bururatuz. Bi proposamen hauek, ZeroØ3 jaialdiaren baitan (jaialdiaren programa osoa, hemen).

Ozen i Fort

Euskal Etxearen babesa duten jardueren programekin jarraituz, Xabier Badiolak (Eibar) eta Magalí Datzirak (Bartzelona) euren kantu eta sormen berriak estreinatuko dituzte, Musika Bulegoak eta Fabra i Coats: Fàbrica de Creació-k sustatutako Ozen i Fort lankidetza euskal-katalaneko bigarren edizioan. Propio sortutako errepertorioa zuzenean aurkeztuko dute Vic-eko 38. Mercat de Música Viva jaialdian. Bikotearen emanaldia Kataluniako musika-ekitaldi garrantzitsuenetakoa den Mercat-en izango da, irailaren 17an, 19:45ean, Vic-eko Dolors elizan (sarrerak hemen eskura daitezke).

Euskadin zein Espainia mailan ikus-entzunezkoen arloko erreferente den Bilboko ‘Caostica’ Film Laburren eta Bideoklipen Nazioarteko Jaialdiak bere edizio mexikarra inauguratu du aurten. Caostica MX izenpean, ekitaldia abuztuaren 25etik 28ra garatu da eta mundu osoko 58 film labur pantailaratu ditu Mexiko Hirian. Festibalak ekarritako nobedadeen artean, euskal sari bat nabarmendu daiteke, Mondragon Unibertsitatea-Mexikoren Euskal Lan Onenarentzako 'Euskal Etxeak' Saria izenekoa. Errekonozimendu honekin euskal gaiak jorratzen dituzten edo euskal ekoiztetxeen film laburrak saritu nahi dituzte, Euskal Etxeek osatutako epaimahai bat medio.

Zinemaldiaren eta sariaren lehen edizio honetan Bilboko Uniko-k ekoitzitako Bea Lema zuzendariaren "El Cuerpo de Cristo" (Kristoren Gorputza) ikus-entzunezkoak jaso du txapela (edo estatuatxo garaikurra). "Uniko ekoiztetxeak animazio edukiak egiten ditu eta bere lanak goi mailakoak izan ohi dira, izan ere 8 Goya sari ere jaso ditu”, azaldu dio EuskalKultura.eus-i Castica MX Zinemaldiaren antolatzaile taldekoa den Xabier Uriak.

'El cuerpo de Cristo' film laburraren trailerra

Bederatzi film izan dira lehian sartu direnak Euskal Lan Onenaren Saria bereganatzeko, hala nola ‘Aizkora eta Pala’, ‘Zezena eta Umea’, ‘Depravity’, ‘Dicen que tu padre’, ‘El cuerpo de Cristo’, ‘HOFE, InnerCut-R.A.’, ‘Moho’, ‘Ultramarino’ eta ‘La primavera’. Epaimahaikide izan dira Mexikoko Euskal Etxea; Txileko Euskal Gizataldea eta Euzko Etxea (Santiago); Euskaltzaleak (Buenos Aires); eta Euskal Erria (Montevideo).

Datorren urtean epaimahaikide izan nahi?

“Euskal etxe partaideetan film labur hauek guztiak pantailaratu ziren, ikusleak bertako bazkide eta zinemazaleak izanik, eta bakoitzak bere ustez hiru onenak zirenak behar zituen hautatu. Oso jarduera interesgarria izan zen euskal etxeentzat, proposamen berri eta berritzailea eskaini baitzieten euren komunitateei, ikusentzunezko material berria, bariatu eta kalitatezkoa", azaltzen du Uriak. "Horregatik, datorren urterako euskal etxe guztiei nahi diegu luzatu gonbidapena, hala nahi badute epaimahaiko parte izan daitezen; hori baita gure asmoa, partaidetza handitzea eta lankidetza indartzea bat egin nahi duten euskal etxe guztiekin”.

Caostica MX zinemaldian babesle eta lankide dira Mexikoko Euskadiren Ordezkaritza, Etxepare Euskal Institutua eta Mexikoko Mondragon Unibertsitatea.

- Caóstica Zinemaldia sareetan, Instagram, webgunea

Hilabete pasatxo baizik falta ez dela, abian da 2026ko Euskal Aste Nazionalerako atzerako kontaketa. Urriaren 5etik 11ra Córdobako Villa Maria hiria euskaldunen biltoki bilakatuko da, berrogeitik gora euskal etxetako ehundaka lagunentzat, Argentinakoak eta baita Uruguai, Paraguai, Brasil, Kolonbia eta Txiletik hurreratuko diren norbanako eta ordezkaritzentzat ere. Aste horretarako prestatu den programa abersatsak topaketa instituzionalak, musika saioak, dantzak, herri kirolak, bateko eta besteko ikuskizunak, bilerak eta jateko/edateko proposamen erakargarriak uztartu ditu, bertaratutakoek elkarrekin egoteko pozaren bueltan.

Ekitaldi nagusiak urriaren 8an, ostegunean, hasiko dira Sagardotegi Gauarekin, euskal menu tipikoa eta Txapela sagardo naturala dastatzeko aukerarekin. Ostiraleko egitarauak Euskal Etxeen arteko herri-kirol lehiaketa partehartzailea eskainiko du, eta Vanzetti agertokiko emanaldiak ibaiertzean. Hor arituko dits Argentinako DOA Diasporako Orkestra eta baita Tio Teronen Semeak ere, euskal dantza tradizionala eta umorea uztartzeagatik ezaguna den musikari eta dantzari talde gipuzkoarra; eta eguna amaitzeko, Xabi Solano hernaniar trikitilariaren eskutik erromeria.

Larunbat goizean FEVAk batzarra egingo du. Arratsaldean, Donostiako Danborrada entzungo da kostaldean eta, jarraian, Gaualdiari ekingo zaio, 250 dantzari inguru eta euskal etxeetako musikariak oholtza gainean euren artea erakutsiz jendetza batean aurrean. Igandean emango zaio amaiera jaialdiari, ibai-ertzean, plaza dantzekin eta Sociedad Ruralen egingo den bazkariarekin. Egitaraua borobiltzeko, Villa Mariako Unibertsitate Nazionalak abesbatza prestakuntza ikastaro bat emango du, Mus Federazioaren bilera eta Euskadiko Euskal Pilota Federazioaren erakustaldia ere gauzatuko dira

Arlo instituzionalean, Eusko Jaurlaritzako ordezkaritza batek hartuko du parte. Ibone Bengoetxea lehenengo lehendakariorde eta Kultura eta Hizkuntza Politikako sailburuak lehen aldiz bidaiatuko du Euskal Aste Nazional batera eta lagun izango ditu Kanpo Harremanetarako eta Euskadi Globalaren idazkari nagusi Ander Caballero eta Kanpoan den Euskal Komunitatearen zuzendari Ziortza Olano Astigarraga. Bengoetxearen agendaren barruan, larunbatean hitzaldi bat emateaz gain, bertako agintariekin eta unibertsitateetako ordezkariekin bilerak iragarri dira.

VOUCHERRAK eta LOLEKUAK

Lolekuez, ikuskizunen prezioez eta otorduen prezioei buruzko kontsultak egiteko, bide hauek gaitu ditu Villa Mariako Euzko Etxeak: centrovascovm.com.ar webgunea, cvascovm@gmail.com posta, Instagram centrovascovillamaria, Facebook cvascovm, eta WhatsApp +54 9353 4213400.

Euskal Herriko musikaz bete zen Villa Maria abuztuaren 15etik 17ra. FEVAk antolatuta, bederatzi euskal etxetako hogeita hiru musikariri egin zien harrera hiriak, euskal musikarion urteko bigarren topaketan. Zerk bildu zituen bertara? Urriaren 5etik 11ra hirian bertan egingo den Euskal Aste Nazionalaren soinu-banda prestatzeak. Jardunaldiak trinko eta biziak izan ziren: ikaskuntza, instrumentu familien araberako entseguak, abesbatzarekin eta dantzariekin koordinatzea, eta Hego Konoko euskal komunitatearen urteko hitzordu nagusiak izango dituen agertokiak bisitatzea.

DOAren (Diasporako Orkestra Argentinarra) ibilbideak aurrera jarraitzen du, integrazio federalaren aldeko apustua eginez eta kide berriak etengabe bereganatuz. Aurpegi berrien artean, Santa Rosako Zelaiko Euskal Etxeko ordezkari Lucía Arrarásek —Mariángeles Sarasola (klarinetea) eta Laura Feijóo-rekin (gitarra) batera talderatu diren azkenak—, argi laburbiltzen du asteburuko giroa: «Euzko Etxean egin ziguten harreratik hasi eta azken agurreraino, oso esperientzia ederra izan da topaketa osoa».

 
Udal-anfiteatrora egindako bisita: hau izango da Euskal Aste Nazionaleko emanaldien oholtza

Cordobako Gerora Elkarteko erreferentea eta proiektuaren egungo zuzendarietako bat den Gaspar Jaurenak gogotsu aletu du egindako lana, lau errepertorio mota nagusi desberdinduz: kalean mugitzeko txaranga-errepertorioa; dantzatzeko aproposagoa eta jai girokoa den erromeriakoa; ohiko txistulariez gain beste haize-instrumentu eta perkusio batzuk gehituko dituen plaza-errepertorioa, euskal etxeek partekatzen duten aire zabaleko agertoki tradizonal horri kolore berri bat emateko; eta laugarren errepertorio nagusia, kontzertuarena.

“Iaz Tandilgo udal-bandarekin jotzeko aukera izan genuen. Oso esperientzia ona izan zen. Aurten, bertako soinuarekin elkarreragiteko ari gara prestatzen Villa Mariako kontserbatorioko irakasle eta musikariekin, eta 12 eta 16 urte bitarteko ikasleekin. Uste dut Euskal Asteko ostirala oso une ederra izango dela DOAren musika aukeraketa entzuteko hain gazteak diren gonbidatu hauekin”, adierazi digu Jaurenak, euskal komunitatearen proposamen artistikoa aberasteko belaunaldi arteko trukearen aldeko apustua berretsiz.

Villa Marían bildutako FEVAko musikariak: 

- Juan Pablo Bilbao Valiela, Euskaldunak Denak Bat (Arrecifes)
- Santiago Chamorro, Gerora (Córdoba) 
- Keila Marozzi Nomi, Gerora (Córdoba) 
​- Gaspar Alfonso Jaurena, Gerora (Córdoba) 
​- Agustín Alonso, Gerora (Córdoba) 
​- María Pía Ambroggi, Gerora (Córdoba) 
​- Fernando Zabalza, Gerora (Córdoba) 
- Sabina Calvaroso, Laurak Bat (Buenos Aires)
- José María Gutiérrez, Laurak Bat (Buenos Aires)
- Mariana Branca, Euzko Etxea (La Plata)
- Juan Manuel Hiriart, Denak Bat (Mar del Plata) 
- Aitor Hormaechea, Denak Bat (Mar del Plata) 
- Nerea Balzola Aguilera, Denak Bat (Mar del Plata) 
- Martina Saa, Denak Bat (Mar del Plata) 
- Renzo Gustavo Marín, Euzkal Etxea (San Nicolás)
- Rubén Darío Vázquez, Euzkal Etxea (San Nicolás)
- Gustavo Galeano, Euzkal Etxea (San Nicolás) 
- Lucía Arrarás, Zelaiko Euskal Etxea (Santa Rosa)
- Mariángeles Sarasola, Zelaiko Euskal Etxea (Santa Rosa) 
- Laura Feijóo, Zelaiko Euskal Etxea (Santa Rosa) 
- Facundo Etchegaray, Gure Etxea (Tandil)
- Joaquin García Iacovella, Gure Etxea (Tandil) 
- Luis Miguel Carricaburu, Euzko Etxea (Villa María) 

Gurekin kontaktatu nahi baduzu, emailez egin dezakezu, sare sozialen bidez edo telefonoz.

Irailaren 1ean, asteartea, itzuliko gara, zan ongi, irakurle!

Ez da ezinbestekoa jai-egun berezi bat ezta urteurren borobil bat ere komunitatea biltzeko. Ongi dakite hori Baskos de La Confluencia euskal etxeko kideek. Horrenbestez, elkartze hutsa besterik bilatzen ez zuen hitzordua gogoan, elkarte patagoniarrak euskal bazkari tradizional bat antolatu zuen Neuquén hirian, eta aurreikuspen guztiak gainditu zituen. Irratizaleen Zentroko aretoan eginiko ekitaldiak 48 lagun bildu zituen —tokiak ahalbidetzen zuen muga—, eta horrek hogei pertsonatik gora itxaron-zerrendan uztera behartu zuen, baita laster hitzordu gastronomiko-kultural berri bat antolatzeko konpromisoa hartzera ere. “Erantzuna bikaina izan zen. Giro ona eta gogoa nagusitu ziren, batez ere horrelako ekitaldiak apur bat bazterturik genituelako”, adierazi dio EuskalKultura.eus-i elkarteko erreferente Pedro Mario Aranak.

Zazpi sukaldarik osatutako talde batek hartu zuen sukalde lanen ardura, hiru taldetan banatuta pauso bakoitzean zehaztasuna ziurtatzearren: pintxoekin hasi zen harrera, plater nagusi gisa, babarrun tradizionalak, eta amaizteko, gazta tarta. Bertaratutakoen artean baziren euskara ikasleak, elkartearen ibilaldietan ohikoak diren lagunak eta euskal kulturarekin aurretik loturarik ez izanik lehen aldiz hurbildu ziren herritarrak ere. Bazkalosteari ukitu artistikoa eman zioten, alde batetik, elkarteko bazkide eta euskara ikasle den Magdalena Zapiola musika irakasleak antolatutako koruak “Txoriak txori” eta “Sagarra jo” abestu baitzuen, eta Aimé Temis Barrutia eta Gabriela Allaria irakasleek bertso-saio zaindu saioa. Bertsolariek, lehenik euskaraz eta ondoren gaztelaniaz bota zituzten bertsoak, mezua guztiek ulertu eta gozatu zezaten.

Zinema zikloa: hamarkada bat euskal ekoizpenak ikusleei hurbiltzen

Bazkari honetatik haratago, urte berezia ari da bizitzen elkartea; izan ere, Euskal Zinema Zikloaren hamargarren urteurrena ospatzen ari dira. Hamarkada batez etenik gabe mantenduta, gaur egungo ekoizpenak proiektatzen ditu zikloak areto instituzionaletan, hala nola Neuquéngo Arte Ederren Museo Nazionalean eta Cipollettiko Kulturgunean Zentroan.

Aurtengo egitarauan 20.000 erle espezie, Irati edo Akelarre bezalako izenburuak eta film labur ugari eman dituzte. Nolanahi ere, proposamenak bere horretan mantentzen du hasierako jatorrizko formatua: aurkezpen laburra aurretik eta solasaldia proiekzioaren ostean. “Denbora pasatu arren, ez dugu batere gogoa galdu. Daniel Muguerza zikloaren bultzatzaile nagusiarekin eta Gabriela Allariarekin batera, lehen eguneko ilusioari eta gogoari eusten diogu eta oraindik partekatzeko istorio asko geratzen direlakoan gaude”, dio Pedro Mario Aranak. Cipollettiko Musika Etxean filmak modu ibiltarian ematen hasi zirenetik hamar urte igarota, zikloak bere lekua finkatu du Euskal Herriko zinemagintza eta ohiturak patagoniarrei erakusteko orduan.

Tandilgo Gure Etxea Euskal Etxeko 'Betirako' euskal dantza taldeak bi asteko bidaia hasiko du datorren igandean Euskal Herrira. Abuztuaren 30etik irailaren 13ra egingo duten bidaia ikasketa eta murgilketa eta kultur truke bidaia gisaprestatu dute. Izan ere, talde tandildarrak dantza ikastaroak jasoko ditu Ipar zen Hegoaldean tokiko adituekin, dantzari arituko dira —euskal dantzekin batera chacarera argentinarra dantzatu eta aurkeztuko dute— bertako euskal festa batzuetan, eta agerraldi bat eskainiko dute baita ere irailaren 8an Euskal Diasporaren Eguna ospatzeko, Eusko Jaurlaritzak Donibane Lohizunen gauzatuko duen ekitaldi instituzionalean.

Taldeak gogor egin du lan lan bidaia gauzatu ahal izan zedin, euren baliabideekin ordainduz hegazkinak eta gastuen gehiena, baina azkenean 13 kideko espedizioa osatu dute, euren artean Euskal Etxeko bi ordezkari instituzional (Graciela Confalonieri Zabala lehendakaria eta Marily Harguindeguy zuzendaritzakidea) eta hamaika dantzari: Lourdes Peirano, Valentina Brito, Unai Hernandez, Carolina Minaberry, Sofia Errasti, Micaela Zabaleta, Mariana Ballent, Facundo Etchegaray, Paz Bidauri, Gabriela Di Giano eta Sara Urbieta (zuzendaria).

 

 

 

 

View this post on Instagram

 

 

 

 

 

 

 

 

 

 

 

A post shared by Betirako (@betirakotandil)

Bidaia Gure Etxeak sustatzen duen ;"Herentzia bizia" izeneko kultura eta formakuntza proiektu zabalago baten barnean kokatzen da. Proiektua Tandilgo Udalak "Udal interesekoa" aitortu du eta ekimenaren barnean, Euskal Etxeak estreinatu berri-berria du joan den igandean, abuztuaren 23an, izen bereko dokumentala, 2025ean Tandilek abegitu zuen Argentinako Euskal Aste Nazionalaren barruan grabatua, lekukotasun ederra emanez Tandil bezalako herri batean euskal kultura eta identitateak dauzkaten errotze eta engaiamenduaz, eta ematen dioten segidaz. Dokumentala, besapean ekarri dute eta egunotan bizpahiru bat lekutan erakutsiko dute Euskal Herrian, Maulerekin batera esaterako Areatza eta Donostian..

Maule eta Eibar izango dira, izan ere, taldearen loleku. Taldeak biziki eskertu nahi die Mauleko Jean Bordachar eta Aitzindariak elkarteari euren sostengu eta laguntza; eta Eibarren, gauza bera, Oier Araolaza eta Josu Garateri, eta Kezka eta Dantzan.eus-i ere, euren ahalegin eta laguntasunari esker muntatu ahal izan baita proiektua. Eta UNICENen lankidetzari 'Herentzia bizia' dokumentala ekoizteagatik; eta Euskal Etxe barruan ere, Zuzendaritzari nahi diote eskertu proiektua hasieratik sostengatu izana, baita bide honetan lagun izan dituzten guztiei ere.

Bi asteetako ibilbidea

Taldea abuztuaren 30ean, igande goizaldean, iritsiko da Buenos Airestik Madrilera, eta egun horretan bertan arratsaldez Maulera. Xiberotar hiriburuan, astelehen goizean formakuntzak izango dituzte goizez, eta arratsaldez bisitak Donibane Garazi, Baiona eta Biarritzera. Asteartean, goizez errepikak, eta arratsaldez Maule eta Holtzarteko Zubia bisitatuko dituzte. Maulen egingo dute "Herentzia bizia" dokumentalaren EHko estreinaldia. Asteazkenean, irailak 2, Eibar aldera goiz atera (euren bigarren lolekua izango dute Eibar) eta goizez lehen entsegu edo errepika eta gero Errenteriako Jantziaren Zentroari bisita, beste errepika bati ekinez. Irailaren 3an, irteera Gernika eta Omara, Gaztelugatxeko Doniene, Bilbo,  Euskal Diasporaren Artxiboa eta Alde Zaharra. Ostiralean, egun osoan formakuntza Eibarren.

Larunbatean, hilaren 5ean, Lekeitiora Antzar Egunera eta eguerdiz Areatzara, bertako Euskal Diasporaren Astean dantzatzera, Xabier Aburruzaga lagun. Igandean, irailaren 6an, Donostiako estropadak. 7an, astelehena, Entsegua Donostian eta bisita San Telmo Museora. Asteartean, hilak 8, Ezpata-dantza dantzatuko dute Kezka dantza taldearekin Arraten, eta arratsaldez, Euskal Diasporaren Egunean, Donibane Lohizuneko ekitaldi instituzionalean, lehendakaria buru. Asteazkenean, 9an, Zarauzko Euskal Festak. Ostegunean, 10ean, egun osoa entsegua Beasainen. Ostiralean, irailak 11, eguna Iruñean, hiria ezagutzen eta entsegua bertako Duguna dantza taldeko lagunekin. Larunbatean, 12an, egun osoa formakuntzan Beasainen Kezkako lagunekin. Igandean, amaiera.

[Programan aldaketak egon daitezke]

Las Condesko Estadio Españolaren instalazioek abegituko dute datorren asteazkenetik larunbatera, abuztuaren 26tik 29ra, instituzio horretan egoitza duen Colectividad Vasca de Chile euskal etxea antolatzaile duen 2026ko Euskal Astea. "Euskal Astea, bizi ezazu zaporeez" lelopean programak bilduko ditu abesbatzen topaketa bat, gastronomia erakustaldi bat zuzenean Euskal Herriko eta bertako sukaldariez euskal errezetak prestatzen, "pintxo-pote" bat eta, jardunaldiak ixteko, musika eta gastronomia jaialdi bat, Idoia Asurmendi kantari aramaixotarra eta Olivia García txiletarra nabarmenduz, Banda Hispanohablante eta EEko dantzariekin batera, Basking Beat & Bite mokadu eta pintxoez.

2026KO EUSKAL ASTEAREN PROGRAMA
Colectividad Vasca de Chile eta Estadio Español antolatzaile

Asteazkena, abuztuaren 26a
(19:00etan, Reyes de España aretoan)

— XIII Koru Topaketa

• Estadio Españoleko abesbatza partaideak: Coro Nueva Extremadura de la Rama de Folklore Chileno, Coro Años Sabios, Coro Riojano eta Coro de la Colectividad Vasca de Chile
• Kanpoko abesbatza gonbidatuak: Coro del Estadio Español de Viña del Mar, Coro Corissimo del Colegio Newland, Coro Masculino Frohasinn

Osteguna, abuztuaren 27a
(19:30ean, Cervantes aretoan)

— Euskal sukaldaritza zuzenean

• Euskal sukaldaritza tradizionala zuzenean - Cooking Show
• Sudaldari partaideak: Javier Pedreros (Estadio Español), Ismael Lastra eta Tomás Saldivia (Basking Bar Aurea Chile) eta Ricardo Pérez (bizkaitar chef ezaguna eta Bilboko Yandiola jatetxeko lehen erreferente gastronomikoa)

Ostirala, abuztuaren 28a
(19:30ean, Bar Estadio Español-en)

— Pintxo-potea

• Sukaldariak tabernan arituko dira pintxoak zuzenean prestatzen

Larunbata, abuztuaren 29a
(12etatik 17etara Reyes de España aretoan)

— Euskal Musika eta Gastronomia Jaialdia

• Basking Beat & Bite partaide, EEko euskal dantza taldea dantzari
• Artista gonbidatuak
  Idoia Asurmendi: folk pop euskal kantautorea, nabarmenak dira bere hitz intimo eta hurbilak, euskaraz eta gaztelaniaz kantatuak. Ibilbide sendokoa ibiliak ditu Euskadi, Europa eta Latinoamerikako agertokiak, kantak aurkezten hainbat kontzertu eta ekoizpen diskografikotan
  Olivia García: txiletar kantautorea, 2024an argitaratu zuen bere lehenengo LPa eta musa sarirako izendatu zuten, Birak eginak ditu New York eta Argentinara
  Banda Hispanohablante, Las Condesko Estadio Españoleko musika elkartea. Bere xede nagusia Espainiako herri musikari gorazarre egitea da eta instituzioko bazkideen garapen artistikoa sustatzea
  (Musika Jaialdia bitartean pintxo-pote eta eskaintza gastronomiko saltoki bat egongo da Reina Sofía aretoan)

25 urte bete ditu aurten ‘Macabro’ Mexikoko Beldurrezko Filmen Nazioarteko Jaialdiak eta edizio berezia ospatzeko Paul Urkijo Alijo zuzendari euskalduna gonbidatu zuen ‘Gaua’ bere azken pelikularekin zinemaldia estreinatzeko. Abuztuaren 12an proiektatu zuten Mexiko Hiriko “Esperanza Iris” Antzokian, areto betean. Filma inaugurazioan aurkeztea ez zen izan, ordea, Urkijok Macabron izan zuen partaidetza bakarra.

Abuztuaren 14an mitologiari eta sorginkeriari buruzko hitzaldia eman zuen eta 15ean, ‘Gaua’ren proiekzio berri batean hartu zuen parte, oraingoan Mexikoko Cineteca Nacional-ean, emanaldiaren ondoren publikoarekin solastu eta galderak erantzun zituelarik. Macabro Jaialdiaren programapean baita ere, Nerea Torrijos bilbotarrak masterclass bat eman zuen atzo 19a, Urkijoren ‘Gaua’, ‘Irati’ eta ‘Errementari’ filmetako jantzien arduradun legez, arropen koloreez, ehunduraz eta itxuraz zinema fantastikoan, Zinema Fakultatean.

Harrera ekitaldia Euskal Etxean

Euskal Herriko ordezkaritza artistikoak, eta Macabro eta Caostica MX jaialdietako lagunek, denbora bilatu zuten Mexikoko Euskal Etxetik jasotako gonbidapenari ohore egin eta ehun uirtetik gorako historia duen erakunde euskal-mexikarra bisitatzeko. Iñigo Bilbao lehendakariak berak errezibitu zituen Paul Urkijo, Nerea Torrijos eta festibaletako ordezkariak.eta etxean barrena gidatu eta erakutsi zien egoitza eta euren eskura dagoela azpìmarratu zien, nahi dituzten saio, emanaldi eta aurkezpenak egiteko.

Paul Urkijo publikoari mintzo 'Gaua' aurkeztuz 'Macabro' Zinemaldiaren 25. edizio inaugurazioan

Mexikon lanean dabilen Jose Ramon Soroiz ere zinema aretora hurbildu zen Urkijoren filma ikustera

Mus partida bat ere jokatzeko astia hartu zuten Euskal Etxean (arg. Juan Dopico - Caostica MX)

Zuzendari gasteiztarrak arretaz entzun zuen eskaintza. “Oroitarazi genien Euskal Etxea, proiektatzeko edo pelikulen inguruko edozein aktibitate antolatzeko erabil dezaketela, eta ideia gustatu zitzaien. Izan ere, Euskal Etxe baten funtzio nagusia euskaldunei eta euskal ekimenei gure indarren araberako sostengua ematea baita. Euskal Herrira itzultzean euren inguruko jendeari gonbite bera luzatzea eskatu genien, horretarako baitago Euskal Etxea, kultura zabaltzeko”, adierazi dio EE mexikarreko presidenteak EuskalKultura.eus-i.

Zabalik da irailaren 12raino atzerrian egoera larrian dauden pertsonentzako 2026ko Eusko Jaurlaritzaren Euskal Etxe bidezko dirulaguntzen epea. EHAA buletin ofizialak abuztuaren 12ko edizioan eman zuen argitara Ebazpena, 2026eko abuztuaren 2koa, euskal etxeei diru-laguntzak emateko, atzerrian dauden euskal gizataldeetako kide diren eta egoera larrian eta asistentzia-faltan dauden pertsonei laguntzeko. Dirulaguntzak azkeneko bost deialdietako kopuru bera izango du, 212.000 eurokoa alegia, eta ohi bezala Euskal Etxeen bidez eskatu behar izango da.

Eskatzaileek euskal gizataldeko kide direla eta atzerrian bizi direla egiaztatu beharko dute; eta dauzkaten beharrei edo premia larriko egoerei aurre egitea ahalbidetzen dien ondasunik edo diru-sarrerarik ez dutela; etxe partikularretan bizi beharko dute, araudi edo estatutuengatik laguntza eman behar dieten talde, komunitate edo erakundeen kide izan gabe. Dirulaguntza eskatzeko ez dago zertan Euskal Etxe bateko kide izan beharrik.

Eskabideak Euskal Etxeen bitartez bideratzen dira. Interesatuek, beraz, euren ohiko Euskal Etxearekin edo kide ez balira edo euskal etxerik ez balego bizi diren herrian/herrialdean, hurbilen daukaten Euskal Etxearekin beharko dute kontaktatu edo informazioa galdegin hurbilen duten Euskadiren Ordezkaritzan edota zuzenean Kanpoan den Euskal Komunitatearentzako Zuzendaritzarekin kontaktatu (euskaletxeak@euskadi.eus).

- Deialdiaren Ebazpena (pdf)
- Deialdiaren Ebazpena (html)
- Informazio osoa xehetu eta ataldua

Arantxa Iturbe (Alegia, Gipuzkoa, 1964) euskal idazle eta irrati-esatari ezagunaren bi ipuin hartuko ditu hizpide, euren gaztelaniazko bertsioetan, datorren larunbatean (abuztuak 22) Argentinako Córdobako Gerora Euskal Kultura Elkartea-ren Irakurketa Klubaren saio berriak. Diasporako ekimen irakurzale honek euskal idazleen gaztelaniara itzulitako obrak hautatu eta komentatzea proposatzen tu, saioetako askotan egilea ere partaide eta solaskide dela. Hitzordua presentziala da, batzuetan idazlea online sartzen bada ere. Saioa amaitzeko, bertaratutakoek euskal gastronomiari lotutako mokadu bat partekatzen dute.

Oraingoan hautatutako ipuinak "Pañuelo gorria lepoan" (El pañuelo rojo, gaztelaniazko bertsioan) eta "Maria eta Jose" (María y José) dira. Gerorako Elba Mocoroak bultzatu eta hasitako ekimena da izen osoa "Euskal ipuin eta zaporeen Irakurketa Kluba" duen hau ("Club de lectura de cuentos y sabores vascos"). Publiko orori dago zabalik eta irakurtzea maite duten zale guztiei zuzentzen zaie, hautatutako obrak euskal autoreenak izanik. Abuztuko topaketa datorren larunbatean, hilaren 22an egingo da, 18:00etan, CPC Gral. Paz-en, Cnel. Juan P. Pringles 420 helbidean.

Hitzorduaren aurretik obrak irakurrita izana gomendatzen da. Izen-ematea hemen egin daiteke. Formularioa bete ostean ateratzen den loturan, saioan komentagai hartuko diren testuen pdf-etarako loturak ematen dira.

Eta gogoratu! Artikuluan aipatutako ekimena interesgarria iruditzen bazaizu, zergatik ez planteatu zure euskal etxean egitea...

Euskal Herriko Unibertsitateak (EHU) eta Etxepare Institutuak lankidetzan antolatua, ikastaroa aurrez aurrekoa da eta Donostian emango da urriaren 2tik azaroaren 27ra. Atzerrian euskal hizkuntza eta kultura irakasteko metodologia, tresnak eta baliabideak irakatsiko dira. Hamaikagarren edizioa du eta orain artean bezala helburua atzerrian euskara atzerriko hizkuntza gisa irakatsiko duten irakasleen (irakurleen) prestakuntza hobetzea da.

Parte-hartzaileek diziplina ezberdinetan nola irakatsi eta transmititu landuko dute, adituek gidatuta. Ikasleek hainbat ikuspegitatik aztertuko dute Euskal Ikasketen irakaskuntza, eta metodologiak, tresnak eta baliabideak eskuratuko dituzte horretarako hizkuntzalaritza, pedagogia, metodologia, kultura eta zibilizazioa bezalako gaiak jorratuz. Ikastaroa tokiko behar espezifikoetan oinarrituta diseinatu da.

Etxepare Institutuaren Irakurletza Sarea ere aurkeztuko da, sare hau baita, izan ere, mundu osoko unibertsitateetan irakasle/irakurle postu hauek sustatzen dituena. Klaseak bertatik bertara emango dira, urriaren 2tik azaroaren 27ra, ostiraletan (16:00-20:20) eta larunbatetan (9:00-13:20), euskaraz, eta 6 ECTS kreditu balioko dute. Ikastaroaren prezioa 400 €koa da.

- Informazio gehiago, izena emateko, etab., hemen
 

NABOren euskara alorrak —NABO Euskarak— 2026a bukatu arteko euskal klaseen berri plazaratu du. Ipar Amerikako Euskal Etxeen Federazioko (NABO) euskara alorreko koordinatzaile diren Madalen Bieter (Boise, Idaho) eta Mikaela DePoyster-Goikoetxeak gogora arazten dute NABOko parte den euskal etxe bateko bazkide bazara 50 dolarreko beherapena izango duzula. Ikus beherago eskuragai dauden mailak eta ikastaroen ezaugarriak. Eta erne egon! Izena emateko epea Irailaren lehena baita.

NABO Euskararen berripapera zeure postontzain jaso nahi baduzu edo edozein kontsulta egin NABO Euskarari, hona idatz dezakezu: euskara@naboeuskara.org. Hona euren webgunea.

2026ko IZEN-EMATEA ZABALIK, IRAILAREN 1era ARTE

Batere euskararik ez dakizu? Hau da zure klasea. Aurreko esperientzia edo ezagutza gabea bazara. Klaseko erritmo apala. Lehen seihilekoko klasea da.

ASTEARTE eta OSTEGUNETAN. Zoom bidez
- Irakaslea: Aaron
- Irailak 15 - Abenduak 3
(klaseak astebete luzatu daitezke, Esker-emate asteko klase-planaren arabera)
- 11:00-12:00 PST // 12:00-1:00 MST eta 1:00-2:00 CST // 2:00-3:00 EST

edo

ASTELEHENETAN. Zoom bidez
- Irakaslea: Iratxe
- Irailaren 14tik azaroaren 30era
(klaseak astebete luzatu daitezke, Esker-emate asteko klase-planaren arabera)
- 16:00-18:00 PST // 17:00-19:00 MST eta 18:00-20:00 CST // 19:00-21:00 EST

$175.00. Irakaslea lehenengo klasea baino astebete lehenago jarriko da harremanetan zurekin.

Eman hemen izena

Inoiz ez duzu euskera formalki hitz egin baina etxean, familiarekin/lagunen bidez, edo zure komunitatean hizkuntzarekin kontaktua izan al duzu? Baliteke hau izatea zure taldea! Klase hau erritmo apur bat biziagoan mugituko da "Hasierako Maila 1: Erabat hasiberriak" taldearekin alderatuta.

ASTEARTEETAN. Zoom bidez
- Irakaslea: Zoe Bray
- Irailaren 22tik abenduaren 8ra
(klaseak astebete luzatu daitezke, Esker-emate asteko klase-planaren arabera)
16:00-18:00 PST // 17:00-19:00 MST eta 18:00-20:00 CST // 19:00-21:00 EST

Irakasleak jarriko dira harremanetan zurekin, lehenengo klasea baino astebete aurrerago.

$175.00. Irakaslea lehenengo klasea baino astebete lehenago jarriko da harremanetan zurekin.

Eman hemen izena

Aurreko ikastaroak eginda (gutxienez 2 seihileko), prest zaude hiztegia eta gramatika gehiago lantzeko.

edo

Gai zara oinarrizko elkarrizketak kudeatzeko, esaterako jendea agurtu eta zeure burua aurkeztu eta oinarrizko informazioa eskatzeko?

ASTEAZKENETAN. Zoom bidez
- Irakaslea: Beronika
- Irailaren 16tik abenduaren 2ra
(klaseak astebete luzatu daitezke, Esker-emate asteko klase-planaren arabera)
- 17:00-19:00 PST // 18:00-20:00 MST eta 19:00-21:00 CST // 20:00-22:00 EST

edo

OSTIRALETAN. Zoom bidez
- Irakaslea: Damien
- Irailaren 17tik abenduaren 3ra
(klaseak astebete luzatu daitezke, Esker-emate asteko klase-planaren arabera)
- 17:00-19:00 PST // 18:00-20:00 MST eta 19:00-21:00 CST // 20:00-22:00 EST

$175.00. Irakaslea lehenengo klasea baino astebete lehenago jarriko da harremanetan zurekin.

Eman hemen izena

Hasiberri maila altua (high beginner) maila edo baliokide bat egin dutenentzat eta eguneroko komunikazioan konfiantza garatzen ari diren ikasleentzat

edo

Oinarrizko elkarrizketak erraz kudeatzeko gai direnentzat, informazioa eskatzeko, eta euskaraz idatzizko eta ahozko komunikazioaren bidez korrespondentzia izaten hasteko gai direnentzat

ASTELEHENETAN. Zoom bidez
1. Salbuespen gisa, lehenengo klasea asteartean izango da, 15ean
​2. Bigarrena, berriz, normaltasunez ondoko astelehenean, irailaren 21ean
- Irakaslea: Diego
- Irailaren 15etik azaroaren 30era
(klaseak astebete luzatu daitezke, Esker-emate asteko klase-planaren arabera)
- 16:00-18:00 PST // 17:00-19:00 MST - 18:00-20:00 CST // 19:00-21:00 EST

Zure irakasleak klaseari buruzko informazioa emango dizu klasearen lehen eguna baino astebete lehenago.

$175.00. Irakaslea lehenengo klasea baino astebete lehenago jarriko da harremanetan zurekin.

Eman hemen izena

Klase hau bakarrik Estherrekin jarraitzen duten ikasleentzat da, Hasierako Maila 2 irakaslearekin. Mesedez, bakarrik eman izena aurreko urteko/semestreko Estherren klasearekin jarraitzen ari bazara

ASTEARTEETAN. Zoom bidez
- 18:00etatik 20:00etara MST
- Irailaren 15etik abenduaren 1era
(klaseak astebete luzatu daitezke, Esker-emate asteko klase-planaren arabera)

175,00 $

Eman hemen izena

AURREZ AURREKO KLASEAK NABO EUSKAL ETXEETAN

Online aukerekin batera, hona euskal etxeen beste eskaintza hauek ere, aurrez-aurre

- Boiseko Euskal Museo eta Kultura Etxeak online ikastaroak eskaintzen ditu maila ezberdinetan.
- Klaseak 12 aste irauten dute eta irailean hasi eta abenduan amaituko dira.
- Lortu hemen informazio gehiago.

- Txoko Onak bi mailatako euskara klaseak eskaintzen ditu aurrez-aurre. Gloria Lejardi da asteroko euskal klaseen irakaslea.
- Parte-hartzaileek agurrak, zenbakiak, asteko egunak, ordua, gorputz-atalak, galdera-hitzak eta elkarrizketetan erabiltzeko oinarriak ikasten dituzt
- Klaseak Txoko Onaren egoitzako ikasgelan, astearte arratsaldetan, irailetik apirilera.
- 18:00 - 19:15: 1. maila
- 19:15 - 20:30: 2. maila
- Kuota: 35 dolar/ikasleko edo Txoko Ona Euskal Etxeko bazkide egitea
- Informazio gehiago hemen

- 12 asteko ikastaroa, aurrez aurrekoa, ama-hizkuntza euskara duen irakasle batek emana.
- Ez dago Euskal Etxeko kide izan beharrik, baina badirenek prezio apalagoa daukate
- Matrikula-tasa murriztua lortzeko kide izan nahi duen edonork webguneko bazkidetza fitxa bete dezake.
- Ez dago adin mugarik ikasle izateko.
- Galderarik baduzu, idatzi lasai asko Oihanari renoeuskara@gmail.com helbidean. Webgunea.

Euskara klase ez-formalak South San Frantziskoko Gure Euskal Etxea edo Basque Cultural Center-en, Jean Max eta JC irakasle.
Hasiberri eta ertainentzako eskolak astero.
- Eskolak doan dira publiko ororentzat
- Aukera ederra, online euskara ikaslea bazara eta osatu nahi baduzu pertsonalki praktikatuz
- Interesatuta bazaude idatzi jean.estoup@gmail.com, jeanmaxfawzi@gmail.com eta iurruty@ yahoo.com-ari

NABOKO kide diren euskal etxeen zerrenda hemen.

Gero eta hurbilado dago irailaren 8a, Euskal Diasporaren Eguna, eta aurtengoan, Donibane Lohizune izan da mundu osoan barreiatutako euskaldunen eta Diasporako Euskal Herriaren oroigarri eta aldarrikatzaile gisa sortu zen egun berezi honen ekitaldi instituzionalaren edizio berria egiteko aukeratutako lekua. Astearte horretako 18:00etarako egin du deialdia Eusko Jaurlaritzak, Donibane Lohizuneko Peyuco Duhart Kultur Zentroan (Tanka Aretoa), Imanol Pradales Lehendakaria izango dela ekitaldiko buru.

'Izan ginen, bagara eta izango gara' hautatu dute 2026ko lelotzat. Eusko Jaurlaritzaren 90. urteurrena gogoan, Diasporaren Eguna Agirre Lehendakariaren bidaia ardatz hartzea proposatu dute: "Gernikatik New Yorkera, Berlinetik igarota. Euskal diasporaren memoria, erbestea, oraina eta etorkizuna lotuko dituen esperientzia gisa". Deialdi irekia da, eta Diasporako euskaldunei, Diasporako euskaldunen lagunei eta, oro har, Diasporari aitortza berezia egin eta esker oneko omenaldi hau egin nahi dieten guztiei luzatzen zaie bertaratzeko gonbitea.

Aldi berean, egun horretan, eta juxtu aurreko eta ondoko egun eta asteburuetan, Diaspora osoan ehundik gora espero da izatea munduan barrena Euskal Diasporaren Egunarekin bat egingo duten jendeen elkarretaratze eta ekitaldiak, hamaika euskal etxe eta euskal komunitatetan, eta euskaldunen eta euren ondorengoen presentzia daukaten herrialde eta eskualdeetan, 'hemen gaude' esanez, norberak modu propioan gehituz bere burua, eta ospatuz egun horrek adierazi nahi duen eta aldarrikatzen duen Euskal Herriarekiko partaidetza eta senidetasun sentimentua.

Euskal Herrian bertan bazaude, gonbidatuta zaude Donibane Lohizuneko ekitaldira.

Diasporatik irakurtzen badiguzu, galdera: antolatu al duzue dagoeneko zeure euskal etxe, elkarte edo unibertsitatean Euskal Diasporaren Egunarekin bat egiteko festa, afari, topa-egite, hitzaldi, musikaldi edo bestelako saiotik? Hitzordu xumeek balio bera daukate. Garaiz zaude zeozer antolatzeko, edo ekitaldiren batean parte hartzea erabakitzeko.

San Ignazio eguna [gogora dezagun San Ignazio dela Euskaltzaindiak onartutako izena, leku eta tradizio desberdinetan Iñaki Deuna, San Inazio edota Iñaki Donea izen historikoak hartu izan baditu ere] gorriz, zuriz eta berdez jantzi da berriz ere Argentinako txoko ezberdinetan. Arrecifesen, ospakizuna ekitaldi jendetsua izan zen. Sare sozialetan abiatu zen, bertako euskal etxearen fundazioa baino hamarkada bat lehenagoko ohitura zaharraren oroitzapenarekin. Abuzturaren 8an, larunbat arratsaldean, bazkide eta lagunak San Jose elizara abiatu ziren, Juan Lucio buruhandia eta Kuza eta Potxolo erraldoiak lagun, bertan Santuaren omenezko meza ospatzeko. Euskaldunak Denak Bateko abesbatzak elizkizunean abestu zuen, eta San Inazioko martxak txistuaren doinuarekin egin zuen bat. Anabela Bilbaok egindako ohorezko Aurreskuaren eta Mitre plazako dantzen ostean, 300 bat lagun bildu ziren egoitzan jaiaz gozatzeko.

FEVAko lehendakari Carlos Miguelena ere bertaratu zen Topaketara, bi arlo nagusitan banatua: batetik, proposamen gastronomikoa —kantinako mokaduak eta San Nikolaseko Euzkal Etxeko eta Pergaminoko Lagun Onak-eko sukaldari talde gonbidatuek prestatutako plater tradizionalak— eta, bestetik, kultura-egitarau oparoa. Belaunaldi guztietako dantzari arrecifestarrek euren dantzak eskaini zituzten: Alaitasunak, txikien taldeak, ertainenak, Elkarlanean-ek eta baita Pergaminoko Lagun Onak taldeko dantzariek ere. Ana Etchepareren gidaritzapean, Iruki Alaia abesbatzak eta Mariana Dominéren eskutik Gure Aterpea kantu libreko tailerrak euren kantuak eskaini zituzten, eta musikak hainbat interpretari bildu zituen. Donostiako Danborrada Lujan Valielaren eta Juan Pablo Valielaren zuzendaritzapean, eta Euskaltzaleak-eko Anabel Jaureguiberryren eskutik pandero tailerra egin zen. Txalaparta eta alboka ere entzun ziren musika bisitarien eskutik, eta patinaje taldeak ere bere gurpilen gaineko dantzak eskaini zituen!

Necochean, uztailaren 31 ‘Iratzartze Alaia' tradizionaleko musika eta kantuaren markarekin bizi izan zen, eta horrek eman zion hasiera ibilbide protokoloari. Euzko Etxeko ordezkaritzak Udaletxea bisitatu zuen eta, Arturo Rojas intendentearekin batera, lore-eskaintzak egin zituen Mariano Necochea Generalaren eta hiriaren sortzailea zen Ángel Ignacio Murgaren monumentuetan. Sustraiekiko omenaldiak Dardo Rocha plazako Gernikako Arbolaren kimuaren aurrean jo zuen goia, hirugarren lore eskaintza eta Clara Zagazuaren agurrarekin. Euzko Etxeko Txokoan alaitasun handiz jarraitu zuen jaiak. Hurrengo egunean, afari bat partekatu zuten Jai Aretoan eta, Santuaren omenez antolatutako jardueren amaiera gisa, abuztuaren 7an “Aiton-Amonak” ospakizuna egin zuten. Aurten, topaketak ukitu berezia izan du: dantza-taldearen sorreraren 85. urteurrenaren baitan, 90 urtetik gora dituzten Martita Larraza de Ponte eta Sarita Zubillaga de Esnaola taldeko sortzaileak omenduz.

San Ignazioaren jaia beste eskualde batzuetan ere ospatu zen. Santuaren egun berean, Azulgo Gure Txokoa Euskal Etxeak Memoria Meza batera deitu zuen Azulgo Katedralean. Cañuelasen ere batu ziren Karmengo Andre Mariaren parrokian hilaren 31n eta abuztuaren 2an, igandean, Denak Bat Euskal Etxearen 66. urteurrena eta Loiolako zaindariaren eguna ospatzeko bazkaria egin zuten. Bestalde, José C. Pazeko Toki Eder Euskal Etxeak meza antolatu zuen bere egoitzan igandean, abuztuaren 2an, Eliana Visbeekek zuzendutako San Migeleko Ikastetxe Nagusiko Abesbatza partaide. Villa Marian, abuztuaren 8an, Euzko Etxeak 'San Ignazio Tallarin-jatea' antolatu zuen, familian ospatzeko. Buenos Aires hirian, urtetako tradizioari eutsi zioten abuztuaren 1ean, larunbat arratsaldean, Laurak Bat Euskal Etxean; bertan, Miguel Ángel Pesceren gidaritzapean, Lagun Onak Abesbatzak San Inazioko kontzertu klasikoa eskaini zuen, eta afari batekin amaitu zen ospakizuna. Trenque Lauquen-en, abuztuaren 8an, San Ignazio afari tradizionala dantzaldi batekin amaitu zen DJ batekin, Euskal Sustraiak-en egoitzan.

2027ko martxoaren 12an, “Euskal-Argentinar Ikasketen Jardunaldia: Buenos Airesko Laurak Bat-en sorreraren 150. Urteurrena” izeneko saioa egingo da hiriburu argentinarrean. Akademia eta zabalkunde arloko ekitaldi honek “iragana ospatuko du, baina ezagutza-arlo baten irekiera ere izango da geroari so”, adierazi dute antolatzaileek. "Hausnarketarako eta azterketa kritikorako espazio bat ere izango da, zortzigarren probintzia edo zortzigarren lurralde historiko deitzen dugunaren eragina eta ikuspegiak azpimarratuz, Argentinan garapen bereziki aberatsa izan baitu eta izaten jarraitzen baitu”.

1876an sortua, Buenos Airesko Laurak Bat, munduan martxan segitzen duen euskal etxerik zaharrena da, eta bere sorreratik 150 urtera, Argentinako Euskal Ikasketen Sareak ekitaldi hau eratzea erabaki du, euskal ikasketen arloan diharduten mundu osoko egileak gonbidatuz bilera honetan parte hartzera. Parte hartu nahi dutenek 2026ko azaroaren 15a baino lehen bidali beharko dituzte aurkeztu nahi duten lanaren laburpena. Laburpenen onarpenaren jakinarazpena abenduaren 15ean jakinaraziko. Lan laburrok (gehienez 6 orrialde) aurkezteko epea, berriz, 2027ko otsailaren 15an finkatu da, hori guztia martxoaren 12an gauzatuko den Jardunaldia prestatzeko.

Jardunaldiko Koordinazioak eta Batzordeak jakinaraziko die egileei euren laburpenak onartuak izan diren ala ez. Egile bakoitzak bi laburpen bidali ahal izango ditu gehienez. Laburpenak testu-prozesadore formatuan prestatu beharko dira (.doc, .docx, .rtf) eta euskalargentina@gmail.com helbidera bidali. Gehienez bost egile onartuko dira laneko.

Laburpenaren Edukia
- Izenburua: Zentratuta, Times New Roman 14, Lodia.
- Gehienezko luzera: 87 karaktere (tarteak barne) izenburuarentzat eta 70 karaktere azpitituluarentzat.
- Informazio pertsonala: Egile(ar)en abizena eta izena, afiliazio instituzionala eta harremanetarako helbide elektronikoa. Hauek eskuineko marjinan ipinita, izenburuaren azpian.
- Gutxieneko edukia: Landutako arazoaren deskribapena, helburua, erreferentzia teoriko eta kontzeptual nagusiak, erabilitako metodologia, aztertutako datu-iturriak eta/edo ikerketaren erreferentzia enpirikoa zehaztuz.
- Gehienezko luzera: 2.700 karaktere (tarteak barne).
- Formatua: Lerroarte bakarra, Times New Roman 12, marjinak justifikatuta.
- Fitxategiaren izena: Laburpena-Lehen egilearen abizena (adibidez, Laburpena-Totoricagüena).
- Kontsultak egiteko: euskalargentina@gmail.com

1877tik izan da Laurak Bat Argentinako eta mundu osoko komunitatearen ordezkari instituzionala.

Argentinako Euskal Ikasketen Sarea (REVA) 2020an sortu zen, diziplina anitzeko eta jende anitzeko foro eta biltoki gisa, euskal ikasketak definizio zabal batean pean onartuta.