Iruñea, Nafarroa. Iazko harrera onak bultzatuta, NAPIKEk (Nafarroako Pilota Jokoen Kultura Elkartea) aurten ere antolatu du ‘Emakumeak eta Pilota’ film laburren lehiaketa. “Lehen edizioak espazio sortzaile honen oinarriak ezarri ondoren, berriro gonbidatu nahi ditugu sortzaileak ikuspegi askotatik emakumeen eta kirol tradizional honen arteko harremana aztertzera. Istorio pertsonalek, ikuspegi sozialek, proposamen artistikoek zein pieza dokumentalek izango dute tokia aniztasuna eta originaltasuna sustatzen dituen deialdi honetan”, azaldu dute antolatzaileek. Film finalistak azaroaren 21etik 23ra proiektatuko dira Iruñean egingo den ‘Emakumeak eta Pilota’ III. Zinema Erakustaldian.
Deialdia 16 urtetik gorakoei dago zuzenduta eta edozein nazionalitateko lagunek har dezakete parte, banaka zein taldeka. Lanak edozein hizkuntzatan aurkez daitezke, betiere gaztelaniazko eta euskarazko azpitituluekin. Film laburrek pilotaren edozein modalitate jorratu ahal izango dute (eskua, pala, zesta-punta, erremontea, xarea, erraketa, laxoa, besteak beste), eta gehienez 60 minutuko iraupena izango dute. Izena emateko epea 2026ko urriaren 30era arte egongo da zabalik, eta parte-hartzea doakoa da. Lanak formulario honen bidez bidali beharko dira.
Ikus-entzunezkoen, pilotaren eta arlo sozialaren munduko profesionalek osatutako epaimahai batek hautatuko ditu finalistak eta irabazleak 200 euroko saria jasoko du. Bigarren saria ere egongo da, 100 eurokoa. Publikoaren Saria –bazkaria Iruñeko Mentidero Berria Jatetxean–, erakusketan zehar egingo den bozketa bidez aukeratuko da.
Hautatutako lanak proiektuaren artxibo ikus-entzunezkoaren parte izango dira, emakumeek pilotan izan duten presentzia eta memoria gordetzen eta zabaltzen lagunduz.
Oinarri osoak hemen.
Lagun bati bidali
Komentarioa gehitu
