Donostia-San Sebastián. "Lurdes Iriondo, ez gera alferrik pasako" dokumentalak iazko Donostiako 73. Zinemaldiko Zinemira saila ireki eta geroztik Euskal Herriko hamaika zinema aretotan eskaini izan dute. Orain, Bitanta banaketa etxeak Diasporan ere proiektatzeko aukera ematen du, euskal etxe edo erakundeen bitartez, Lurdes Iriondoren istorioarekin batera, euskara eta euskal kultura zabaltzeko asmoarekin.
Inge Mendioroz zuzendari eta Idoia Garzes gidoilari, Iriondok bere bizitzan zehar euskal musika, kultura eta gizarteari egindako ekarpena balioan jarri nahi du dokumental honek, eta Iriondoren figura berreskuratu. “Memoria historikoa oinarri, emakume musikariari, emakumezko artista feminista guztiei eta euskarari, memoria egiten dion filma da, bere ekarpen eta garrantzia ahazturan geratu ez dadin”, adierazten dute egileek.
'Lurdes Iriondo, ez gera alferrik pasako' dokumentala Maluta films ekoiztetxeak egin du
Dokumentala bere bazkide eta euskal komunitate eta lagunei eskaini nahi dieten euskal etxeek, Bitanta banaketa etxeari, info@bitanta.com helbidera idaztea baino ez dute. Filma euskaraz egina da eta gaztelaniazko azpitituluekin eskura daiteke, euskal kultura nabarmentzen du eta genero ikuspegitik dago eginda; eskaintza ezin hobea izan daiteke, adibidez, Korrika ospatzeko egingo diren edo Emakumearen Eguneko ekitaldietan proiektatzeko. Animatzen?
Lagun bati bidali
Komentarioa gehitu
