euskalkultura.eus

Santiago, Txile. Txileko Pontifize Unibertsitate Katolikoak abegia emango dio datorren astean, urriaren 6tik 10era, 2025eko Euskal Zinema Zikloari, helburu duela "lehio gisa izatea euskal kulturaren hainbat alderdiz disfrutatu, ikasi eta hausnartzeko, kontagai harturik istorio intimoetatik esperientzia kolektiboetaraino, oroitzapenetik hasi eta egungo gertaeren ikuspegietaraino". Proiekzio batzuen ondoren eztabaida edo mahai-inguruak egingo dira, filma abiapuntu harturik gogoetak partekatzeko eta solasteko espazio gisa.

Euskal Pantaila honen edizio berria posible izan da beste behin Euskadiren Txileko Ordezkaritzaren eta Txileko Pontifize Unibertsitate Katolikoaren arteko lankidetzari esker, Etxepare Euskal Institutua lagun. Honako izenburuak ikusi ahal izango dira: 'Los Williams' (2024), Raúl de la Fuente zuzendari; 'Amama' (2015), Asier Altunarena; 'Ciento Volando' (2024), Arantxa Aguirre zuzendari; 'Bizkarsoro' (2023), Josu Martínezena; eta 'Marco' (2024), Aitor Arregi eta Jon Garaño zuzendari.

Egitaraua: izenburu, egun eta orduak

Emanaldi guztiak Txileko Pontifize Unibertsitate Katolikoko Kultura Hedapen Zentroko Zinema Gelan izango dira, sarrera doan. "Los Williams" urriaren 6an, astelehena, emango da, 16:00etan, eta urriaren 10ean, ostirala, 18:30ean (ostiralean itxiera ekitaldia izango du ondotik); "Amama", urriaren 6an, astelehena, 18:30ean eta urriaren 10ean, ostirala, 16:00etan; "Ciento volando" urriaren 7an, asteartea, 16:00etan, eta urriaren 8an, asteazkena, 18:30ean; "Bizkarsoro" urriaren 7an, asteartea, 18:30ean, eta urriaren 9an, osteguna, 14:00etan; eta 'Marco', urriaren 8an, asteazkena, 16:00etan eta urriaren 9an, osteguna, 18:30ean. (azken honetan, emanaldiaren ondoren, solasaldi bat egingo da Ingrid Bachmann UCko Komunikazio Fakultateko irakaslearekin).