euskalkultura.eus

Jose C. Paz, Argentina. Hitzaldia Toki Eder Euskal Etxeak euskal baserri baten itxurarekin Jose C. Paz-ko kaleetan daukan eraikin osoko egoitzan gauzatu zen, bertako hitzaldi aretoan, eta Mariana Fernandez Castellik bere solaserako hautatu zuen izenburua "Euskal Herria; bere lurralde antolaketaren oinarrizko alderdiak eta lurralde historikoen ezaugarri nagusiak" izan zen.

Toki Eder-etik irakasle buenosairestarrak hitzaldiari ezarri zion tonu atsegin eta erraz segitzeko modukoa azpimarratu dute. "Aberasgarri izan zaigu" eta "Euskal Herria osatzen duten lurralde historikoen gaineko jakingarri baliagarriak" eman dizkigu, adierazi dute.

Euskal Etxeak gure erredakziora igorritako oharrean biziki eskertzen zaio hizlariari "hitzaldi garrantzitsu eta esanguratsua izan baitzen, bereziki gure Euskal Aberri maitean jaio garenontzat, izan hipuzkoar, bizkaitar edo Zuberoako seme-alaba, guztiak euskal sentimentu bera partekatuz, bat eginez euskaldunen urruneko ondorengo izanik euren arbasoei, historia eta ohiturei buruz gehiago jakin nahi dutenekin".

Bertara bildutako jendeek hitzaldiari segida emateko proposamena luzatu zutela esanez segitzen du oharrak, "gehitzeko honela alderdi geografikoa, eta irudi eta estanpa ederrak, izadiaren opari direnak Euskal Herrian, ingurumenaren etengabeko zaintzarekin batera".

"Eskerrik asko, Mariana!, Gora Euskal Herria!" esanez amaitzen da Jose C. Paz-ko Toki Eder Euskal Etxearen oharra, erakundearen izenean Maria Angeles Oñederra lehendakariak eta Lidia Lucia Lechardoy-k sinaturik.