euskalkultura.eus

Rawson, San Juan, Argentina. Probintziala izateko bokazioa duen Rawsongo Liburuaren eta Kultura Herrikoiaren laugarren Azoka irail honen 4tik 9ra bitartean egin zen Rawsonen eta iraun zituen bost egunetan San Juango Eusko Etxea eta bertako Pio Baroja Liburutegia euskal ordezkari izan ziren Rawsongo eta San Juan probintziako berrehundik gora stand-en artean, bertako aniztasun eta kultur mugimendu eta dinamiken partaide.

San Juango Eusko Etxetik adierazi digute stand-a bisitatu zuten bisitari nabarmenen artean Rawsongo Juan Carlos Gioja intendente edo alkatea egon zela, eta euskal elkarteko Cristina Hornilla lehendakariak eta elkarteko buruzagi eta langile aktibo eta lehendakari ohi den Ofelia Larreak errezibitu zutela.

"Erakustaldiak oraun dituen bost egunetan, gure Liburutegiaren stand-a euskal abizenen jatorriari buruzko hainbat kezken biltzaile izan zen eta hala interesatu zirenei euskal deituren, euskal kulturaren eta euskal hizkuntzaren berri eman zitzaien, eta San Juanen bertan euskara ikasteko ditugun aukerak aipatu zitzaizkien ere", laburbildu dute.

Liburutegiarekin lotuta, bertatik adierazi zaigu San Juango Diputatu Ganbarak, ganbaraburu Sergio Uñac medio, doaitza bat egin diola Eusko Etxeari "Malvinas, su historia, San Juan, sus héroes" liburuko ale bat liburutegian izan dezaten. Miguel Montaño eta Analia Rodriguez dira liburuaren egileak.

"Jakitatearen elikagarri eta Aberriaren alde bizitza eman zutenekiko omenaldia izan dadin, liburuki hau Pio Baroja Liburutegiko bildumako parte izango da", esan dute bertatik eta aukera hau baliatu nahi izan dute eskerrak emateko liburuaren egileei eta Diputatu Ganbarako presidente Sergio Uñac-i.