AEBetako euskal etxeetako euskara irakasleek lantegi "oso emankorra" egin zuten Boisen

2012/09/24

Boiseko euskara irakasleen barnetegian klaseak emateko materiala aztertzen (argazkia NABO)

PUBLIZITATEA

AEBetako euskal etxeen federazioak (NABO) eta Euskara Munduan programak antolatuta, euskara irakasleen lantegia egin zen irailaren 15 eta 16ean Boisen, Idaho estatuan. Lantegian Homedale, Boston, San Frantzisko, Boise eta Bakersfieldeko irakasleek parte hartu zuten, NABOko Euskara koordinatzaile Izaskun Kortazarrekin batera. Taldean izan behar zuten beste bi irakaslek --Elkoko Anita Franzoiak eta Rhode Island-eko Jorge Ochoa Garayk-- 'kale' egin zuten, egunotan Euskal Herrian direlako Gaztemundu programaren barruan ikastaro berezia egiten.

Boise, AEB. AEBetako euskal etxeetako euskara irakasleak Boisera bildu ziren iragan irailaren 15 eta 16ean, lantegi berezia egiten. NABOko Izaskun Kortazerrek EuskalKultura.com-i agertu dionez, bertan izan ziren William Thomspson Uberuaga (Boise), Gloria Lejardi (Homedale, Idaho), Ander Caballero (Boston), Aitor Inarra (San Frantzisko) eta Unai Nafarrate (Bakersfield). Izaskunek berak Euskara koordinatzaile eta Boiseko irakasle bezala parte hartu zuen.

Bezperan, Idaho kanpotik lehenengoz etorri ziren irakasleek -- Ander Caballero, Unai Nafarrate eta Aitor Inarra-- Boiseko euskal elkarteak ezagutzeko baliatu zuten eguna. "Aho bete hortz geratu ziren Boiseko Basque Block edo euskal kalearekin, bertako dendak, frontoia, kalea bera eta batez ere Euskal Museoarekin", azaldu du Kortazarrek.

[Ezkerretik eskubira, Unai Nafarrate, Aitor Inarra eta Ander Caballero euskara irakasleak Boiseko Euskal Etxearen aurrean (argazkia NABO)]

Arau berriak

Ikastaroa larunbatean goizeko 9:30etan hasi eta arratseko 5:30etan amaitu zen eta lehenengo egunean NABOk ezarri dituen lan egiteko arau berriak azaldu zitzaizkien irakasleei. "Irakasleek ikasle zerrenda eta syllabus-a seihilabetero bidali behar dute; eta, ondoren, seihilabetea amaitzean, balioespen idatzia eta ikasleen azterketen emaitzak ere. Irakasle guztiek gramatika, hiztegi eta funtzio berdinak irakatsiko dituzte eta curriculum bera jarraituko dute, baina material bat baino gehiago erabili ahal dute", esan du Kortazarrek.

Lantegian Boga metodoa erabiltzeko jakin beharrekoak pausoz-pauso azaldu zitzaizkien irakasle berriei eta ondoren Euskara Munduan egitasmoko material berria banatu zen. "Binaka, irakasleek klase oso bat prestatu zuten materialean oinarrituz eta materialarekin eroso egoteko irakasleak erabili ahal dituen teknikak azaldu genituen", esan du Izaskunek. Horrez gain, irakasle bakoitzari USB bat eman zitzaion Euskara Munduan materialarekin, 2007tik hona Kortazarrek sortutako euskara klase guztiekin, kanten letrekin eta ikasleentzako aditz taulekin.

Udako barnetegia Kalifornian

Ikastaroaren lehenengo eguna amaituta, partehartzaileak Boiseko euskal etxeko bazkideen afarira joan ziren eta Boiseko euskaldunekin eman zuten gaua, kantuan eta giro ederrean.

Igandean batzarra egin zuten irakasleek eta ikastaroen egoerari buruz hausnarketa egiteaz gain, zalantzak agertu eta argitu zituzten, besteak beste. Amaitzeko, datozen hilabeteei begira hainbat proiektu hasi ziren prestatzen, adibidez, udako barnetegia (Santa Barbaran, Kalifornian, ziurrenik), eta Euskal Herrian egingo den euskara barnetegia.

-Informazio gehiago, NABO Euskaraz webgunean