euskalkultura.eus

San Juan, Argentina. Ez dagoen tokitik dantza talde bat ateratzea ez da gauza erraza izaten, baina borondatez eta behar bezalako akuilu edo bultzadaz gauzak bideratzen ahal direla erakutsi dute San Juango Euskal Etxekoak euren dantzari talde propioa abiaraziz. Egia esateko, animoak eta azken bultzada, duela hilabete gutxi San Juan bisitatu zuten Hendaiako 'Mutxikoak' eta Hondarribiako' Meakako Adixkideak' taldeek eman zieten. "[Hendaiako] Mirarirekin hitz egin ondoren, eta ikastea eta lehenengo urratsak ematea zaila dela jakinik, batez ere bideoekin ikasi  behar baduzu, ze arraio esan eta saiatzeari ekin nion", aitortzen du Carina Oyolak.

Bostek osatzen dute oraingoz taldea, baina indarraz, kuraiaz eta emeiaz beterik agertu dira eta joan den larunbatean, azaroaren 29an, egin zuten euren debuta San Juango Euskal Etxeko kide eta lagunen aurrean, egun horretan Urteko Azken Afaria eta Euskararen Nazioarteko Eguna ere ospatzeko elkarretaratze festa egin baitzuen euskal etxe sanjuaninoak. Euskal Etxeko kideak entusiasmoz eta hunkiturik ere errezibitu zituzten euren dantzariak. Fandangoa eta arin-arina eskaini zuten euren lehenengo emanaldian. Urrezko laguntzaile, txistulari bat, Ismael Espinosa, Euskal Herrikoa izanik San Juanen bizi dena, zorte handia eta luxua hemen Argentinan.

[Dantzariak euren debut egunean, Ismael Espinosa txistulari]

[Ezkerretik eskuinera, dantzari sanjuandarrak: Paulo Landa, Carina Oyola, Erica Sanchez, Mercedes Cuadra eta Maxi Vega]