euskalkultura.eus

Jose C. Paz, Argentina. “Jose C. Paz-eko kaleak une berezi eta jai hunkigarrienaren lekuko bihurtu ziren joan den igandean”, adierazi dio Maria Angeles Oñederrak, Toki Eder euskal etxeko lehendakari eta oinarrietako batek EuskalKultura.com-i. “Euskal Herriko eta Argentinako lagunen laguntzarik gabe hau ez zen posible izango. Orain etxea prest dago eta gure alde egon diren guztiei esker beroak emateaz gain, komunitate osoari gure ekintza eta proiektuetan parte hartzeko gonbitea luzatzen diegu”, azpimarratu du Oñederrak.

[Eusko Jaurlaritzaren Argentinako Ordezkari Elvira Kortajarenak; Jose C. Paz-eko alkatearen izenean María Luisa Geizer-ek; eta Oñatirekiko senidetzearen taldeko koordinatzaile den Jose Antonio Urteagak lagundu zuten Oñederra andrea zerrendak mozteko momentuan]

[Ohorezko plakei estalkia kentzeko ardura M. Angeles Oñederra, FEVAko lehendakari ordea den Juan José Olasagastia, eta Oñatiko Maribel Elorzaren esku egon zen]

Hitz hauekin hasi zen inaugurazio ofiziala eta ondoren, egitarauari jarraituz, euskal dantzak oparitu zitzaizkien bildutako agintari eta auzokideei, etxearen aurrean. Segidan, José Castañon apaizak egoitza bedeinkatu eta zerrendak moztu ziren.

[Emakume Abertzale Batza-ren dantza taldeko mutilek "Ezpata Dantza" egin zuten]

[Toki Eder Euskal Etxeko "Gure Talde Alai"-ko dantzariek kalejira erraldoia egin zuten egoitzaren aurrean]

Behin sartuz gero, gonbidatuek hiru pisutako instalazioak bisitatu zituzten eta ohorezko ardoa eskaini zitzaien. Jaiarekin bukatzeko, 160 bat lagunek bazkaldu zuten etxe berriko areto nagusian.