Santiago, Txile. Japoniatik Hego Amerikaraino, gero eta zale gehiago ditu Euskal Tartak eta ez dira gutxi Euskal Herritik kanpo egiten edo zerbitzatzen duten jatetxe eta kafetegiak. Aukera asko daude, jatorrizko errezetarekin edo tokian tokiko moldaketaren batekin egindakoak. Honen guztiaren harian, Euskadiren Txileko Ordezkaritzak herrialdeko sukaldaritza arloko erreferenteak gonbidatu ditu ‘Txileko Euskal Tarta Onena’ txapelketan parte hartzera. Ekimena ‘Espacio Food & Service 2026’ Azokaren baitan egingo da, Santiagon, “Sukaldaritza ere izan baitaiteke Euskadiren eta Txileren arteko zubia”, azpimarratu dute antolatzaileek.
Deialdia Txilen kokatuta dauden establezimendu gastronomiko, gozotegi, kafetegi, jatetxe eta hotelei dago zuzenduta, hau da euskal tarta egin eta saltzen dutenei beti ere dagozkien osasun eta merkataritza baimenak badituzte. Aurkeztuko den errezetari dagokionez, sukaldari bakoitzaren berezko moldaketak onartuko badira ere, euskal erako gazta-tarta izan beharko du: “Labean egina, azal txigortu edo karamelizatua eta barrualde krematsua”.
Txapelketan parte hartzeko gaur osteguna irailaren 10era arte eman beharko da, esteka honetan. Irailaren 22an goizeko 11etan eta Euskadiren Ordezkaritzaren egoitzan aurre-hautaketa bat egingo da. finalera pasako diren azken bostak hautatzeko. Finala hiriburuan irailaren 29tik urriaren 1era gauzatuko den ‘Espacio Food & Services’ Azokako Gazten Pabiloian jokatuko da. Data eta ordutegia garaiz adieraziko dira.
Lehen, bigarren eta hirugarren postuetan geratzen diren errezetek jasoko dute diploma edo aipamen berezia, eta lehenengoa ‘2026ko Txileko Euskal Tarta Onena’ izendatuko dute, ofizialki. Diplomak ere jasoko dituzte irabazleek eta Ordezkaritzaren komunikazio-kanalen eta lehiaketari lotutako guneen bidez ezagutaraziko dira.
- Oinarri osoak, hemen.
Lagun bati bidali
Komentarioa gehitu
