Villa María, Argentina. Villa Mariako Euskal Aste Nazionaleko ostiralak jardunaldi bizia utzi zuen, egitarauan literatura, kirola, musika eta dantza dinamika instituzionalekin uztartuta. Goizeko programa Euzko Etxearen egoitzan hasi zen, aretoa lepo zegoela, Argentinako Euskal Ikasketen Sarea aurkezteko. Santiago Bereciartua, Iñaki Anitua eta Julieta Gaztañaga kideek 'Abrir Caminos' lan kolektiboa ezagutarazi zuten. Liburuak Argentina, Kolonbia eta Euskal Herriko memoria, egia eta justizia prozesuen esperientzia alderatuak biltzen ditu, eta asteburuan aurkeztuko ziren lau argitalpenetatik lehena izan zen. Bitartean, Sociedad Ruraleko aretoan Argentinako Mus Federazioko kideak bildu ziren, euskal etxeetan jokoaren transmisioa eta hedapena aztertzeko asmoz.
Argentinako Euskal Ikasketen Sarearen aurkezpena: Santiago Bereciartua, Julieta Gaztañaga eta Iñaki Anitua
'Guiáspora'ren aurkezpena, pilota erakustaldia, Mus Federazioko kideak eta 'Euskara eta biok' libururaren aurkezpena
Denda erraldoipeko bazkariaren ostean, literatura-agendak Sociedad Ruralen jarraitu zuen. Bertan, Andrea Bella egileak eta Eneko Gallartzagoitia editoreak 'Euskara eta biok' bidaia-koadernoa aurkeztu zuten, egile uruguaitarrak euskararekin eta euskal kulturarekin izandako bizi-esperientzia azaltzen duena. Segidan, Lapridako Martina Larraza Azpiazuk 'Guiáspora' lana erakutsi zuen; bidaia-gida original bat, euskal diasporako kide askok sarritan egiten duten itzulerako bidaia, edo aurkikuntza-bidaia, horren esanahian eta identitatean oinarritutako ikuspegia eskainirik. Aldi berean, gazteek herri kirol lehiaketez gozatu zuten, sokatira, ingudea altzatzea, lokotx biltzea, txingak eta toka barne. Bitartean, Euzko Etxeko trinketean Euskadiko Euskal Pilota Federazioko pilotariek esku pilota erakustaldia eskaini zuten. Cristo Rey parrokian, berriz, Cañuelas, Laprida, San Nicolás, Tandil eta Villa Maria bertako abesbatzek kontzertu arrakastatsua eman zuten. Jende ugari bildu zen eta ikusleen txalo artean bukatu zen.
Herri kirolen txapelketa, soka-tira, 'ingudea', toka eta txinga-proba
Euskal Etxeetako abesbatzen topaketa Villa Mariako Cristo Rey parrokian
DOA (Diasporako Orkestra Argentinarra), herrialdeko hainbat euskal etxetako musikariek osatua
Eguraldiak ez zuen lagundu, eta arratsaldeko egitaraua, hasiera batean kostaldeko Vanzetti agertokirako aurreikusita zegoena, Sociedad Ruraleko aretora eraman behar izan zuten. Ikuskizuna Agur Jaunak ereserkiarekin hasi zen, FEVAren ekimenez sortutako DOA orkestra federalaren eskutik. Euskal etxe ezberdinetako 23 musikari eta Villa Mariako Felipe Boero Kontserbatorioko bederatzi kide elkartu ziren kontzerturako. Errepertorioan, euskal piezak eta bertako musika formak, hala nola chacarerak eta gato bat, uztartu zituzten.
Euskal Herritik etorritako 'Tio Teronen Semeak' talde donostiarraren aurkezpena
Xabi Solano trikitilari hernaniarraren eta bere taldearen emanaldia, hauek ere Euskal Herritik propio
Arratsaldeak aurrera egin ahala, Cordobako 'Arrasa como Topadora' taldeak erritmoa eta kolore bereziak ekarri zituen. Izenari leial, benetan piztu zuten festa. Sarbide ezin hobea eman zioten 'Tio Teronen Semeak' taldearen dantza eta umore emanaldiari eta publikoa erabat liluratu zuen jarduerari. Azkenik, Xabi Solanok ikuskizunari amaiera borobila eman zion bere erritmo fusioarekin, dantza eta giro festazalea afalordura arte luzatuz.
Lagun bati bidali
Komentarioa gehitu
