Brusela, Belgika. Urte berrian sartzen joaterekin batera, berrikuntza batzuk proposatu dizkie hiriburu belgikarreko Euskal Etxeak bere bazkideei. Bazkidetza modu azkar eta errazean ordaintzeko, aurrerantzean online pagatu ahal izango dute, Bruselako Euskal Etxearen webgune berrituan, labur.eus/BEEkidetzea estekan klikatuz. Bazkidetzeko prozesua hastean, bazkidetza mota ezberdinak agertuko dira –banakoa, familiak edo gazteak–, bakoitzari dagokion kuota aukeratu eta aise ordaindu ahal izango duzu.
Legea zorrotz segituz, datuak modu konfidentzialean jasoko dira eta prozesu hau behin bakarrik egin beharko da. Ondoko urteetan ez da zati hori errepikatu behar izango eta ordainketa baino ez da egingo. Webgune berrituak, gainera, Bruselako Euskal Etxeak antolatzen dituen ekimenen berri emateko ere balioko du. Eta norbaitek, Euskal Etxea sostengatu nahi badu, Bruselan ez bizi arren, kidetzeko aukera ere izango du. Bateko eta besteko kide guztiei bere esker ona adierazi nahi die EEak. “Kidetzea hau ezinbestekoa da Euskal Etxeko sua bizirik mantentzeko”, animatzen dute elkartetik.
VIII. patata tortilla lehiaketa
Otsailaren 7an, Bruselako VIII. patata tortilla lehiaketa antolatu zuen BEE Euskal Etxe belgikarrak eta proposamena oso arrakastatsua izan zen bai partaidetzaren aldetik – “30 tortilla egilek hartu zuten parte, txiki geratu zitzaigun egoitza” adierazi diote antolatzaileek EuskalKultura.eus-i– baita emaitzen aldetik ere.
Epaimahaia, bazkide batek eta elkarteko lagunetako zenbait ordezkarik osatu zuten, hala nola Juliak (Casal Català), Danik (Espai Valenciâ), Davidek (gizatalde galiziarra), Fernandok (Librebook liburutegia) eta euskal etxeko Anak eta Iriak. Izan ere epaimahaiak lan gogorra izan zbehar izan zuen errezeta eta emaitza onena aukeratzeko, baina azkenean Gonzalori jarri zioten txapeldunaren Txapela. Jai giroa –pintxoak, kalimotxoa, garagardoa, musika…– ordu txikiak arte luzatu zen.
Lagun bati bidali
Komentarioa gehitu
