Villa María, Argentina. Bi aste eskas besterik ez dira falta Villa Mariako Ctalamuchita —edo Hirugarrena— ibaiko kostaldeko Vanzetti eszenatokian 2026ko Euskal Aste Nazionaleko ostiraleko kontzertu tradizionalerako. Bertako proposamenek zabalduko dute saioa: soilik emakumeek osatutako 'Arrasa como topadora' cumbia eta latinoamerikar musika talde ezagunak eta DOA Diasporako euskal-argentinar orkestrak. Azken honek are bertako ukitu handiagoa emango dio emanaldiari, hiriko kontserbatorioko ikasle eta irakasleekin batera igoko baita oholtzara.
Tio Teronen Semeak talde donostiarraren emanaldiarekin jarraituko du jaialdiak. Dantzari zein musikari jatorri askotarikoek osatzen dute taldea, euskal folklore tradizionalean ibilbide luzea dutenak. Duela hamarkada bat baino gehiago sortu ziren, hasiera batean behin-behineko emanaldi bakar bat egingo zutela pentsatuta, baina aurreikuspenak gainditu zituzten. Euskal Herriko kaleetan eta Europako herrialde askotatik igaro ostean, Boiseko Jaialdia tartean, Villa Mariara iritsiko da konpainia, euskal dantza tradizionala eta umore berezia uztartzen dituen bere ikuskizuna eskaintzeko.
Tio Teronen Semeak taldearen umorea Villa Marían izango da
Xabi Solanoren agurra Argentinan dagoen diasporari
Xabi Solano Maizaren eskutik iritsiko da jaialdiaren azken txanpa. Trikitixa garaikideko erreferentzia nagusia da Solano, soinua rock, reggae, ska eta rap generoekin uztartzeagatik ezaguna. Etzakit eta Fermin Muguruza Kontrabandan aritutakoa eta ia bi hamarkadaz buru izan zela Esne Beltza talde ospetsuan; 2017an, ordea, beste bide bati ekin zion Ereñotzu argitaratuta. Bakarlari gisa egindako lehen estudio-disko hura sustrai folklorikoko lan hunkigarria da, haurtzarori eta familiari egindako omenaldia. Villa Marian eskainiko dituen bi saioetan, Kristina Solano (panderoa eta ahotsa), DZ DJ eta Oier Laborde eta Uxue Urruzola dantzariak izango ditu lagun, bere ibilbide osoko errepertorioa eskaintzeko.
Lagun bati bidali
Komentarioa gehitu
