euskalkultura.eus

Villa Mercedes, Argentina. Villa Mercedesko Euskal Etxea, San Luis probintzia argentinarrean, eta elkarteari lotutako Camerata de la Luna abesbatza itzuli berriak dira Sao Paulotik, bertan aritu eta kantatzera gonbidatuak izan baitziren, Sao Pauloko Eusko-Brasildar Etxeak antolaturiko Euskal Astean hain zuzen, orduan EuskalKultura.com-ek iragarri zuenez. Bidaiatik bueltan, euskal etxe argentinarreko Julio Esnaola buletin honekin harremandu da esperientziak ekarri dien balio positiboa eta euren egonaldiaren balantze ezinhobea egiteko. Guztia "primeran" joan zitzaiela aitortu du euskal buruzagi puntanoak.

Villa Mercedesko Euskal Etxearen izenean, Esnaolak azpimarratu nahi izan du Sao Paulon jaso zuten harrera ederra "Oscar Goitiak eta Eusko-Brasildar Etxekoek emana, baita Sao Pauloko katedralean emandako kontzertuak eta batez ere koralak Melia Hotelean eskainitako kontzertua, Bizkaiko Foru Aldundiak antolatua, bertan Euskal Herritik etorritako nazioarteko lau sukaldariek prestatutako pintxoak dastatu ahal izan genituela, txakolina lagun".

Julio Esnaolak azpimarratzen du baita ere igandean, berriz ere katedralean, baina oraingoan bertako apezpikuak eman zuen mezan, koralak zenbait kantu kantatu izana, eta meza ostean ere errezitala eman zutela, apezpikua bera antzule, emanaldia ohiko Aita Gurea oroigarri batekin amaituz.

Arbaso gipuzkoarreko euskal buruzagi argentinarrak eskerrak ematen dizkie Sao Pauloko II. Euskal Aste hau muntatu zuten guztiei, gogoangarria oroitzen baitute partaidetza eta jaso zituzten harrera, tratua eta moldeak, eskertuz ere euren zatia Bizkaiko Foru Aldundiari, bertako tokiko erakundeei eta laguntzaile guztiei.