euskalkultura.eus

San Nicolas, Argentina. ‘Etxe Nasaia’ programaren hamargarren urteurrena dela eta, San Nicolas hiriko Euzkal Etxea euskal etxeko agintariek proiektuaren baitan lortutakoa eta lehenengo hamarkada ospatzeko burutuko den egitaraua plazaratu nahi izan dute jendaurrean.

Proiektuak elkartasuna dauka oinarrian, gutxien dutenei edo ahulen direnei begiratuz bideratua, eta hala sortu zen 2001ean, Argentinan 'corralito'aren krisialdi latza sortuta, egoera gogorrek San Nicolas herria ere jotzen zutenean, eta neska-mutiko gazteak hartu zituen aintzakotzak, hilabetean behin eskola-umeak bildu eta jaten ematen baizitzaien --eta hala segitzen da egiten-- euskal etxean, horrekin batera kultura aldetik eta euren ezagutzak hazte aldera beste zenbait ekimenekin ere aberastuz, eta tartean euskal kulturara hurbiltzeko aukera ere emanez.

"Etxe nasaia izenari dagokionez, hitz hauekin ekintzaren emankortasuna islatu nahi izan genuen", azaldu dute euskal etxetik. "Izan ere, proposamenak fruitu oparoak eman ditu: oinarrizko beharrak betetzeaz gain – otorduak eskaintzen dizkiegu neska-mutilei hilabetean behin – eta euren jakin-min intelektuala asetzeko aukera ere izan dugu. Auzo pobreetan bizi ziren umeek, hiriko leku garrantzitsuak ezagutu ahal izan dituzte eta eskolako material oparitu diegu euskal etxean. Arrazoi guzti hauek direla eta, bai udalaren bai probintziaren onespena jaso du programak, intes publikoko izendapena lorturik”, azaltzen dute euskal elkartetik.

Hamarkada bete berria

Programaren hamargarren urteurrenari begira, ‘Etxe nasaia’ren edizio erraldoi bat antolatzen ari dira sanicolastarrak. Gonbidatu bereziek hartuko dute parte ospakizunean, tartean Juan Jose Ibarretxe lehendakariak, propio gonbidatuta, "hemendik Rosariora, Argentinako Euskal Aste Nazionalera joango baita", eta Argentinako zein Euskal Herriko musikari eta dantzariek. Urtemugako festa honetan, San Nicolaseko hainbat eskolatako mila ikasle bilduko dira hiriko Mitre Plazan. Bi eguneko egitaraua, honako hau izango da:

Urriaren 24an,

- Goizean: ordezkarien harrera. Protokolozko ekitaldiak hiriko agintariekin.
- Arratsaldeko 8etan: Juan Jose Ibarretxeren hitzaldia, Abokatuen Elkartean, Mitre kaleko 133. zenbakian.
- Gauean: afaria, euskal etxeko egoitzan. Sarrerak salgai daude.

Urriaren 25ean,

- Goizeko 9etan: San Nicolaseko 40 eskola publikotako mila ikasle eta euren bi laguntzaile bilduko dira Mitre Plazan. Argentinako bandera eta ikurrina jasotzea. Argentinako ereserkia eta ‘Gora ta gora Euskadi’, Errekatarrak abesbatzak abestuta. Paranako Urrundik-eko dantza taldearen, Cordobako Baietz musika taldearen eta Joseba Gotzon abeslariaren emanaldia. Herri kirolak. Mila umerentzako bazkaria.
- Arratsaldeko 8etan: Urrundik-eko dantza taldearen, Cordobako Baietz musika taldearen eta Joseba Gotzon abeslariaren emanaldia, Rafael Aguilar Herri Antzokian. Agapea euskal etxean. Sarrerak, salgai.