Euskal erregosi erraldoia ez zen aski izan Villa Mercedeseko Gizataldeen Azokako 7.000 lagunak asetzeko

2008/11/04

Carolina Larrañaga (erdian) Gizataldeen Azokako Bigarren Printzesa (argazkiak Villa Mercedes EE)

PUBLIZITATEA

Villa Mercedeseko 2008ko Gizataldeen Azokak marka guztiak hautsi zituen eta, antolatzaileen aurreikuspenak aixe gaindituz, 7.000 lagun bildu ziren bertara (eta hori asteburuko lehengo egunean soilik). Gastronomia standetako jakiak lehen egunean agortu ziren eta euskal etxeak prestatu zuen erregosi erraldoia ere berehala bukatu zen. Euskal Etxea oso pozik agertu da bere partehartzearekin eta harro eman dute jakitera elkarteko ordezkaria, Carolina Larrañaga, Azokako Bigarren printzesa aukeratu zutela.

Villa Mercedes, Argentina. Villa Mercedeseko Euskal Etxeak 2008ko Gizataldeen Azokan parte hartu du eta ekitaldiak izan zuen arrakasta handian ere izan zuen zerikusirik. Antolatzaileen aurreikuspenak erabat gaindituz 7.000 lagun bildu ziren azoka hartzen zuen Calle Angosta kalera, lehenengo egunean bertan. Zortzigarren edizioa izan da aurtengoa eta urriaren 25 eta 26ean egin zen. Azoka Auto Zaharren Desfile batekin hasi zen eta Euskal Etxeak ikurriñarekin atondutako marroi koloreko Ford batekin parte hartu zuen.

[Villa Mercedeseko Euskal Etxeko lagunek Gizataldeen Azoka aurreko Auto Xaharren kabalkadan hartu zuten parte (argazkia Villa Mercedes EE)]

Gastronomia arloan ere izan zuen zeresanik Euskal Etxeak, izan ere 700 lagunentzako erregosi erraldoia prestatu baitzuen: 200 kilo haragi, 50 kilo tipula, 50 kilo babarrun edo indaba ('poroto') eta bi litro olio. Erregosia prestatzeko erronka Mario Gonzalez Luquetek hartu zuen eta arrakasta handia izan zuen, 700 razioak berehala agortu ziren eta.

[700 lagunentzako erregosia prestatu zuen Villa Mercedeseko Euskal Etxeak 2008ko Gizataldeen Azokarako (argazkia Villa Mercedes EE)]

[Carolina Larrañaga, Villa Mercedeseko Euskal Etxearen ordezkaria (irudian eskubian) 2008ko Gizataldeen Azokako Bigarren Printzesa aukeratu zuten (argazkia Villa Mercedes EE)]

Lotura interesgarriak

Villa Mercedeseko Euskal Etxea
www.euskaletxeavm.com.ar