euskalkultura.eus

euskal diaspora eta kultura

Albisteak rss

Euskal kantuak eta musika entzungai Sagar Handi erdian, 'Basques of New York' ikuskizuna tarteko

2008/11/04

'Basques of New York' ikuskizuna eskaini zuten azaroaren 2an NYeko Museoan, honako hauek: Marilu Navas, aurkezlea, Iñaki Astondoa tenorea, Earl Buys pianojolea, Amaia Arberas sopranoa, John Ehlis mandolinjolea eta Cathy Clarkson txistularia (argazkia Guil
'Basques of New York' ikuskizuna eskaini zuten azaroaren 2an NYeko Museoan, honako hauek: Marilu Navas, aurkezlea, Iñaki Astondoa tenorea, Earl Buys pianojolea, Amaia Arberas sopranoa, John Ehlis mandolinjolea eta Cathy Clarkson txistularia (argazkia Guil

PUBLIZITATEA

New Yorkeko euskal komunitateak eta hiriko publikoak oro har euskal kantu eta musika ikuskizun batekin gozatzeko aukera izan zuen joan den larunbatean, New York Hiriko Museoan aurkeztu zen 'Basques of New York' ikuskizunarekin. Taulagainean kantari eta musika jotzen, euskal amerikar artista taldea aritu zen, horien artean New Yorken bizi den Amaia Arberas soprano donostiarra, Cathy Clarkson txistulari boisetarra edo Iñaki Astondoa tenore iruindar-newyorktarra.

New York, AEB. Museum of the City of New York delakoa izan zen joan den azaroaren 2an euskal musika eta kantu tradizionalen ikuskizun honen egoitza. Eguerdiko ordubitan hasi zen emanaldia, Guillermo Zubiaga bizkaitarrak --aspalditik New Yorken bizi da, baina-- EuskalKultura.com-i azaldu dionez. Teorian ordubete iraun behar zuen ikuskizuna bi ordutan zehar luzatu zen, musikariak zein ikusleak ederki gozatzen ari zirelako. Aretoa jendez lepo egon zen-- '%60 bat edo ez zen euskalduna, gainera', azaltzen du Zubiagak--  eta txalo artean eskertu zuten euskal musika ezagutzera emateko ahalegin hau. Irrintzirik ere entzun omen zen arratsaldean zehar New Yorkeko Museoan, azaltzen du Zubiagak.

Marilu Navas izan zen ekitaldiaren aurkezlea eta euskal nortasuna, kultura eta historiari buruzko sarrera orokor bat eginez hasi zuen ikuskizuna. Kantu bakoitzari eta bertan erabiltzen ziren instrumentuei buruzko azalpenak ere eman zituen. Musikari taldea honakoek osatu zuten: Cathy Clarkson txistulari boisetarra, Amaia Arberas soprano donostiarra, Iñaki Astondoa tenore eta pianojole iruindarra, John Ehlis mandolinajolea (NY-ko Eusko Etxeako laguna) eta Earl Buys pianojole newyorktarra.

Basques of New York 002
[Amaia Arberas sopranoa eta Iñaki Astondoa tenore eta gitarjolea joan den azaroaren 2an NYko museoan egin zen 'Basques of New York' ikuskizunean. Pianoa jotzen, Earl Buys (argazkia Guillermo Zubiaga)]

Basques of New York 003
[Mandolina jotzen, John Ehlis musikaria, eta bere alboan Cathy Clarkson txistulari boisetarra, 'Basques of New York' ikuskizunean (argazkia Guillermo Zubiaga)]

Errepertorioan euskal musikagile ezagunen kantuak izan ziren entzungai: Guridi, Ugarte... edo Iparragirreren 'Boga boga', 'Maitetxu Mia', 'Gernikako Arbola' eta 'Agur Euskalherriari', besteak beste. Musikariek euskal kanta herrikoiak ere jo eta kantatu zituzten, horien artean 'Aldapeko' edo 'Haurtxo txikia', eta euskal dantzetako hainbat doinu. Ekitaldiari bukaera emanez, 'Agur jaunak' abestu zuten.

Basques of New York 004

[Amaia Arberas soprano donostiarra eta Earl Buys pianojolea 'Basques of New York' ikuskizunean (argazkia Guillermo Zubiaga)]

Basques of New York 005
[Iñaki Astondoa tenorea kitarra jotzen 'Basques of New York' ikuskizunean (argazkia Guillermo Zubiaga)]


Lotura interesgarriak


New York Basque Club
www.newyorkbasqueclub.com

New York-eko Euskal Etxeak danborrada estreinatu zuen
EuskalKultura.com-en argitaratua 2008ko urtarrilaren 18an



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia