euskalkultura.eus

Villa Mercedes, Argentina. Inork galdu nahi ez zuen erakustaldi bat egin zen joan den ekainaren 25ean Villa Mercedeseko Euskal Etxea-n. Arratsaldeko 5etik aurrera, edade guztietako ikasleek astero garatzen duten lanaren emaitzak konpartitu zituzten publikoarekin.

[Txalo ugari jaso dituzte euskal etxeko dantzariek]

Dantzari dagokionez, Maria Sonia Rodriguez Mendoza irakasle eta zuzendariak azaldu zion bildutako jendeari nolakoak diren entseguak eta urtean zehar non aurkeztu diren eta non aurkeztuko diren dantzariak. Ondoren, Maximo Valentin Vallejo Rodriguez, Mateo Gil, Emilia Ramallo, Julieta Diaz Polanco, Maria Pia Avila, Giuliana Cabrera, Milagros Fernandez eta Maria Paz Rodriguez dantzari txikiek, eta Tiziana Maite Vallejo Rodriguez, Valentina Viveka Blanco eta Tatiana Micaela Coser ertaineko dantzariek Kalejira, San Petrike eta Fandango egin zituzten, irakasleak lagunduta.

“Euskal kulturan dantzek duten leku berezia azpimarratzea da gure asmoa. Dantza artea baino gehiago bizirik gauden seinalea dela argi utzi nahi dugu”, adierazi dio Maria Sonia Rodriguez Mendozak EuskalKultura.com-i.

[Zine Tailerreko ikasleek egindako tresnak]

[Euskal etxeko abeslari txikiak]

[Txalaparta ez da Arte Erakustalditik at geratu]

Dantzariek txalo ugari bereganatu zituzten, eta agertokia bero bero utzi zuten hurrengo aurkezpenetarako. Abeslariek (Daisy Cabeytu zuzendari), txalapartariek eta nola ez, euskal etxeko Pre-zine tailerreko ikasleek ikasitako guztia erakutsi dute. Horretaz gain, Pre-zine tailerreko partaideek diplomak jaso zituzten Carla Sanchez irakaslearen eskutik. Ikuskizuna bukatuta, askaria eskaini zioten etxekoek gonbidatuei.