euskalkultura.eus

Bilbo, Bizkaia. Azkue Fundazioak eta Argiak abian jarri duten "Blogetan" lehiaketak botoak eman eta euskarazko blogik onenak aukeratzeko epea ireki du. Guztira 115 blog onartu dira proposaturiko hautagaien artean; eta orain, otsailaren 16a arte, horietako onenak aukeratzeko ordua da.

Edonork izango du botoa emateko aukera eta publikoaren bozkatzeak lehenengo fasean %50 balioko du, eta epaimahaiaren erabakiak beste %50a. Fase honetatik kategoria bakoitzeko hiru blog finalistak irtengo dira.

Botoa bi eratara eman daiteke:

• Lehiaketako webgunean erregistratuz eta egun bakoitzean boto bat kategoria bakoitzari emanez, blog bakoitzaren izenaren ondoan ageri den “Bozkatu” botoiaren bidez.
• Twitter bitartez ere bozkatzeko aukera dago: blog bakoitzari dagokion lerroan agertzen den “Twitter” botoia klikatuz. Txio bat sortuko du automatikoki.

Lehiaketak lau kategoria ditu: kultur arloko blogak, gizarte eta politika gaiak lantzen dituztenak, zientzia eta teknologia alorrekoak eta aisialdiarekin erlazionatutako edozein jarduera ardatza dutenak.

Erabiltzaile bakoitzeko, egunero boto bakarra emateko aukera izango da, kategoria guztien artean. Baina egunero sartu eta bozkatzeko aukera izango da. Zorte on lehiakideei!