FEVAk euskal dantza tailerra antolatu du Pergaminoko Lagun Onak EEarekin batera, apirilaren 27 eta 28an

2013/04/11

Pergaminoko Lagun Onak Euskal Etxeko dantzariak artxiboko argazki batean.

PUBLIZITATEA

Euskal Argentinar Erakundeen federazioak (FEVA) Pergaminoko Lagun Onak Euskal Etxearekin batera Buenos Aires probintziako herri horretan apirilaren 27 eta 28an antolatu duen euskal dantza tailerrean parte hartzera deitu die "dantza zuzendariei edo euskal etxeetan irakastera prest dauden dantzari aurreratuei". Izen-emateak apirilaren 19aren aurretik behar dira egin. Bestalde, federazioak buruzagientzako formakuntza ikastaro berri bat egingo du maiatzaren 11ean Rio Cuarton, Cordoban, xehetasunak aurki adieraziko dituela, esan du.

Buenos Aires, Argentina. Lantegi teoriko-praktikoa izango da Pergaminokoa, apirilaren 27 eta 28an egiteko Lagun Onak Euskal Etxearen egoitzan (9 de Julio 835), helburu gisa euskal dantza talde zuzendariak eta dantzari aurreratuak dituena, ikasitakoa atzera euren herri eta euskal etxeetan irakats ahal izan dezaten. Bina partaide onartuko dira normalean euskal etxe bakoitzeko.

EGITARAUA:

LARUNBATA, apirilaren 27a

-09:00etan, harrera
-10:00etan, dantza-tailerra; arduradun, Josetxu Astolfi, Manuel Irastorza eta Lorenzo Bucci, Bahia Blancako Beti Aurrera taldekoak
-13.30etan, bazkaria
-15.30etan, dantza-tailerraren segida
-21:00etan, afaria

IGANDEA, apirilaren 28a

-10:00etan, euskal kultur formakuntza
-12:00etan, kultur formakuntza eta dantza tailerraren itxiera. Ondorioak
-13:00etan, bazkaria

Parte hartzeko baldintzak:

-Bazkariak bere kontu hartuko ditu FEVAk
-Txartelak: bidaiak euskal etxe partaideen kontu
-Ostatua: seguruenik familietan, beraz hala bada parte hartzaileek toailak eta izarak/mihiseak/maindireak edo lo-zorroak eraman beharko dituzte. Hau guztia garaiz zehaztu eta jakin araziko da
-Izena emateko, formulanioa bete eta FEVAri helarazi behar zaio, apirilaren 19aren aurretik

Bestalde, FEVAk aurreratu nahi izan du maiatzaren 11ean Buruzagi Formakuntzarako tailer berri bat egingo duela, Rio Cuarton, Cordoba probintzian, eta xehetasunak aurki jakin araziko dituela.

-FEVAren webgunea: www.fevaonline.org.ar