euskalkultura.eus

Pergamino, Argentina. Hirurogeita hamar urte ditu Lagun Onak euskal etxeak eta apenas hiru gutxiago bertoko dantza taldeak. 1955ean, erakundeko egoitza inauguratu zenean, lehendabiziko aurkezpen bat egin zuten etxeko dantzariek. Egungo neska-mutilak ez dira garai hartakoak, jakina, baina garai hartakoen gogo eta konpromiso maila bera dute. Ostiralero entseatzeko elkartzen dira. Pergaminoko euskal etxeko dantza eskolak, ostiral arratsaldeko 5:30etan dira txikientzat (2 eta 12 urte artekoentzat) eta iluntzeko 7etan nerabe eta helduentzat.

Baina dantzak ez dira Lagun Onak-ek lantzen duen Euskal Herriko kultur adierazpen bakarra. Ahotsak abesbatzak gaztelaniazko nahiz euskarazko errepertorioa kantatzen du Martin Aguilar zuzendaritzapean. Abeslariak astelehenetan elkartzen dira euskal etxearen egoitzan, gaueko 8:30etan.

Eta dantzariak eta abeslariak ez ezik, komunitate osoa dago gonbidatuta Pergaminoko euskaldunek antolatuko dituzten afarietara. Asmoa da hilabete guztietan elkarretaratze bat egitea, plater gozoak partekatu eta lagunekin elkartzeko. Hauexek dira datozen hilabetetako hitzordu eta menuak:

-apirilaren 13an, gaueko 9etan: pizza eta arroz-esnea
-maiatzaren 11an, gaueko 9etan: dilista gisatuak
-ekainaren 15ean, gaueko 9etan: oilaskoa sagardotan
-uztailaren 6an, arrain gisatua

Sukaldaritzako proposamenen artean ere aipatu beharra dago Pazko Ostiralean bakailaoa prestatuko dutela Lagun Onak-eko arduradunek, saltzeko. Ano bakoitza 55 pesotan salduko da eta erreserbak egiteko 436707, 440784 edo 15683799 telefono zenbakietara behar da deitu.

Bukatzeko, azpimarratuko dugu azken bolada honetan Lagun Onak euskal etxea indartzen ari dela komunitatearekiko daukan harremana. Bere lagunekin komunikatzeko bideak sendotze aldera prentsa arduraduna izendatu dute, elkarren ezagutza hobetzeko. Aldaketa honi esker, euskal etxeari eta euskal kulturari buruzko informazio eguneratua irakurri ahal da instituzioaren facebookeko horman baita erakundearen historiaren xehetasunak ere. Lan hau Amira Querede Ugarte kazetaritza ikaslearen esku ezarri da.

-Euskal etxearen facebooka: Centro Vasco Pergamino Lagun Onak