euskal diaspora eta kultura
2011/04/07
Argentinako euskal elkarteak biltzen dituen FEVA federazioak aditzera eman berria du 2011 ikasturtean euskal etxe argentinarrek euren kultur programak osatzeko federazioari eskatu ahal izango dizkioten hitzaldi eta hizlarien izen zerrenda. Dauden baliabideak ahalik eta ongien baliatzearren, gai eta interes antzekoak dituzten euskal etxeak eskualdeka biltzea eta eskabideak elkarrekin egitea galdegiten da. Edonola ere, euskal etxeak dira gaiak eta hitzaldiak erabakitzen dituztenak, FEVAk garraio gastuak bere gain harturik eta euskal etxeek hizlariaren ostatua eta hitzaldiak eragin ditzakeen tokiko gainerako gastuak. Aurtengo eskaintza 37 gai dira, 17 hizlarik emanak.
2011/04/07
Astelehenean eta asteartean egon da ikusgai Argentinako Pellegrini hirian Magdalena Mignaburu adituak bildu duen euskal jantzi tradizionalei buruzko erakusketa. 'Gure arropa - Nuestra ropa' du izena eta bertan XVIII. mendetik XX. mendera bitarteko hogei euskal jantzi tradizional biltzen dira. Asteartean Pellegriniko eskoletako neska-mutilak izan ziren bisitari, eta adi-adi entzun zituzten Mignabururen azalpenak. Askok euskal abizena dutela jakin zuten bertan, eta batek baino gehiagok, etxera heldu eta gurasoak bidali zituen erakusketa ikustera. Datozen egunetan 'Gure arropa' Pehuajó-n izango da ikusgai, Etxe Alai elkarteak antolatu duen Aberri Eguneko ospakizunen barruan.
2011/04/06
Korrika, AEK euskaltegien koordinadorak antolatzen duen euskararen aldeko lasterketa erraldoia, bihar abiatuko da Trebiñutik. Lasterketak gure hizkuntzaren aldeko kontzientzia suspertzea eta gau-eskola zein euskaltegien eguneroko lana indartzeko dirua biltzea ditu helburu. Hamaika egunetan Euskal Herri osoan zehar ibiliko da, gauez eta egunez, gelditu gabe, eta apirilaren 17an bukatuko da Donostian. Baina, Euskal Herrian bakarrik ez, Diasporan ere ibiliko da Korrika 17, euskal etxeei esker. Sydney-n adibidez, lehen aldiz antolatu dute lasterketa aurten. Beste hitzorduak dira Txileko Santiago, San Frantzisko, New York, Madril, Bartzelona, Mexiko, Londres, Boise... Badago non aukeratu!
2011/04/06
Indarrez beteta ekin diote 2011 honi Buenos Aires probintziako Chascomuseko 'Zingirako Euskaldunak' Euskal Etxeko kideek. Urtarrilean neska eta mutil mordo bat bildu zen Argentinako bigarren Udalekua eta San Juango Eguzkiaren Jaian izandako partaidetza jarrera horren oso adibide onak dira. Hilabeteak aurrera doaz eta mugimendua ez da gutxitzen euskal etxean. Bigarren sorreraren 20. urteurrenaren urtean, hitzaldi, erakusketa, ikuskizun eta jaiekin sendotuko dute euskal presentzia Chascomus hirian 'Zingirako Euskaldunak'-eko lagunek.
2011/04/06
'Bidegileak' bildumako hiru karpeta berri, bakoitza launa biografiarekin, aurkeztu ziren atzo Donostian, euskara eta euskal kultraren alde nabarmendutako hamabi gizon-emakumeen biografiak eta emaitzak eskuragarri ipiniz. Bildumako 59, 60 eta 61. karpetak dira eta biografiatutako pertsonen artean Mikel Laboa, Emile Larre, Maria Pilar Lasarte, Antonio Zavala edo Mikel Atxaga bera daude, eta baita ere Diasporarekin harreman zuzena izan zuten beste batzuk, hala nola besteak beste New Yorken bizi izan zen Jose Matia San Sebastian 'Latxaga' apaiza eta Pedro Mari Otaño bertsolaria bera. Ekitaldiko partaide izan ziren Blanca Urgell Kultura sailburua, Lurdes Auzmendi Hizkuntza Politikoarako sailburuordea eta Begoña Muruaga Euskara Sustatzeko zuzendaria, euskalgintza hainbat gonbidatu eta biografiatutako lagun eta familiakoekin batera.
2011/04/05
Etxepare Institutuak Europako eta Ameriketako hamar unibertsitateen Euskara eta Euskal Kultura irakurle postua betetzeko deialdia egin du gaur. Bartzelona, Finlandia, Txekia, Errusia, Mexiko, Erresuma Batua eta Estatu Batuetako unibertsitateetan ariko dira irakurleak; 2011-2012, 2012-2013 eta 2013-2014 ikasturteetan. Eskabideak aurkezteko hamabost egun naturaleko epea dago. Eskabide horiek non eta nola aurkeztu azaltzen dizugu jarraian.
2011/04/05
“Erkidegoko kideen arteko harremanak estutu eta sendotzeko asmoarekin” sortu zuen duela 116 urte Buenos Aireseko 'Centro Vasco Frances-Iparraldeko Euskal Etxea' Ipar Euskal Herritik Argentinara etorritako euskaltzale talde batek. Urteak pasa dira baina izpiritu hori ez da desagertu. Izan ere, erakundeko Kultura Azpibatzordeko kideek mota askotako ekintzak garatzen dituzte urtean zehar Euskal Herriko ohiturak eta Buenos Aires hiriburuko euskaldunen artean dauden loturei eutsi ahal izateko; hori dela eta, eta Jean Pierre Passicot etxeko Zuzendaritza Batzordeko lehenengo lehendakariarekin hitzekin bat eginez, “euskalduna naiz, euskaldun bizi naiz, euskaldun hilko naiz eta berpiztuko banintz euskalduna izango nintzateke”, esaldiari eusten diete irmo Iparraldeko euskaldunen ondorengoek.
2011/04/05
Interneten nabigatzen ari garela hamaika euskal hiztegi eskura izaten ohituak gara Euskalbar delakoari esker. Software hau diseinatzen duen aditu taldea teknologia munduko azken berrikuntzekin bateratsu ibiltzen gogotik saiatzen da eta oraintsu Firefox 4 nabigatzailea atera badute, hara!, hemen dugu jada horretara egokitutako Euskalbar berria, Euskalbar 3.9 bertsioa. Aurrekoak bezala, doan deskarga daiteke. Oraingoan azalpenak bideotxo baten bitartez datoz, gainera. Sustatu.com webgunetik jaso dugu berria.
2011/04/05
Luzaroan New York arte garaikidearen meka gisa hartua izan da eta euskal artistek, munduko gainerakoek bezala, helburu izan dute bertara joatea, bertan bustitzeko eta munduan zer gertatzen zen ikasteko. Gaur egun badirudi munduak ez daukala erdigune bakarra eta honetan ere dibertsifikazioa eta leku eta 'ikastegi' gehiago daudela munduko artista gazte eta abangoardien erakarle eta higitzaile. Hala ere, Etxeorratzen Hiriak segitzen du bere marka uzten eta hainbat artista gazterengan utzi duen markak hor segitzen du, indartsu.
2011/04/04
'Los orígenes de Juan Perón y Eva Duarte' liburuak pertsonaia historiko hauen arbaso euskaldunen berri ematen du, eta hirugarren edizioa ari dira prestatzen dagoeneko Argentinan. Aste honetan Euskal Herrian da liburuaren egilea, Ignacio Cloppet, eta aurkezpenak egingo ditu Baionan eta Lapurdiko eta Nafarroa Behereko zenbait herritan. Herri horietatik joan ziren Argentinara Evita eta Peronen arbasoak eta agian aurkezpen hauei esker baten batek Ameriketako lehengusuen artean aurkituko du bikote historiko hau. "Gustura asko joango nintzateko liburuari buruzko hitzaldiak ematera Argentinako euskal etxeetara", esan dio Cloppetek Euskalkultura.com-i, Euskal Herrian zehar bira hasi aurretik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
