euskal diaspora eta kultura
2011/04/14
Ibarrako Alurr dantza taldea lanpetu samarra dabil atzerrian hilabete honetan. Apirilaren 2an Londresen emanaldia egin zuten taldeko zortzi dantzarik, London Basque Society elkarteak gonbidatuta. Orain, apirilaren 26an Alurreko Errota taldeko gaztetxoek (11-12 urte bitartekoak) dantzari trukea egingo duten Galizian, hango talde batekin. "Esperientzia aberasgarria izango da, gazteen arteko kultur truke bat ere izango baita, oso baliagarria gure gazteentzat, bi kulturek elkar ezagutzeko, eta bi herrien arteko kultur harremanetan sakontzeko", azaldu digute Alurreko arduradunek.
2011/04/13
Korrika 17 Euskal Herrian barrena bidea egiten ari da jada, gelditu barik euskararen aldeko mezua zabalduz, eta aldi berean, Diasporako euskal etxeak munduko mapan eta sarean ari dira jartzen lasterketa, euren ekitaldiekin. Larunbatean Bartzelona eta Madrilgo euskal etxeek jendetza bildu zuten euren Korrika jaietan, eta igandean Shanghaiko euskaldunei esker Asiaraino heldu zen lasterketa. Jarraian ekitaldien argazkiak, korrikalarien bideoak eta Bartzelonako Euskal Etxeak grabatu zuen lipdub-aren bideoa jaso ditugu.
2011/04/13
Txileko Santiagora bueltatu zen Korrika iragan larunbatean, aurreko edizioan kale egin ostean antolakuntza arazoak zirela eta. Agian horregatik, Txileko euskaldunek gogo biziz egin zioten harrera eta Santiagoko kaleetatik elkartasun besarkada beroa bidali zioten euskarari eta mundu osoan euskal hizkuntza ikasten eta irakasten ari diren lagunei. Santiagoko Arma Plazan Korrika 17ren aldeko bideoa grabatu zuten, eta euskaldun eta euskaltxiletarrez gain, giro bikaina ikusirik jaiarekin bat egin zuen santiagotarrik ere izan zen. Olatz Sanchez Lamikizek, Santiagoko Euskara eta Euskal Kultura irakurleak, bidali digu eguneko kronika.
2011/04/13
Eusko Jaurlaritzak Mexikon duen Bulegotik aditzera eman denez, euskal jatorriko Emprebask eta Sukalde elkarte mexikarrak aurkeztuko dira bihar Mexiko DFn, bertako jatetxe batean eta euskal-mexikar sukaldari baten menua lagun egingo den jendaurreko hitzorduan. Gisa batera edo bestera Euskadirekin lotutako enpresari, profesionak eta negozio-pertsonak biltzen ditu Emprebask-ek, eta gastronomiarekin lotutako chef eta profesionalak Sukaldek. Ekitaldiko gonbidatuen artean Jaurlaritzako Kanpo Harremanetarako idazkari nagusi den Guillermo Echenique aipa daiteke, eta bertan espero dira baita ere Ipar Ameriketako Euskadiko Ordezkaritzako arduradunak, beti ere Sukaldeko presidente Juantxo Sanchez eta Emprebask-eko Maria Teresa Fernandezekin batera.
2011/04/13
Apirilaren 1ean Buenos Airesko Gure Echea Euskal Etxearen egoitzan bildu ziren hiriburu argentinarreko Alkartasuna Abesbatzako kantariak 2011. urteko entsegu edo errepikekin hasteko. Saioak, aurrerantzean, ostiralero izango dira, arratsaldeko 7etatik 9etara, Belen Romano zuzendari. Etorkizunari begira eta hurrengo kontzertuak antolatu ahal izateko, ahots berriak --batez ere kontraltoak, baxuak eta tenoreak-- gehitzeko gonbite irekia plazaratu dute koraleko arduradunek.
2011/04/12
'Lifetime Achievement Award' delako saria eman diote Juan Mari Arzak chef donostiarrari. Ez da edozein sari edo errekonozimendu, 2005ean sortu zutenetik nazioartean izen handi eta ibilbide konsakratuko sukaldari aitzindari eta ekarleei eman baitzaie. Taldetxo saridun horretan egotea, sukaldarien Olinpoan egotea bezala da, eta bizitza oso batean egindako etengabeko lan hautuari ematen omen diote. Gisa horretako sariei 'Bizi Emankorra' sariak deitzen zaie euskaraz Ameriketako Diasporan. Horixe da, bada, Juan Mari Arzaki egotzi diotena. Eman-eman, datorren igandean emango diote Londresen.
2011/04/12
Korrika 17 joan den ostegunean abiatu zen Trebiñutik, eta pausoz pauso Euskal Herrian zehar bidea egiten ari den bitartean, Diasporako euskaldunek Korrika sinbolikoak antolatu dituzte nonnahi, munduan zehar ere euskararen aldeko oihua zabaltzeko. Aurten Korrika lehen aldiz antolatu duten bi euskal etxe Sydneyko Gure Txoko eta Berlingo Euskal Etxea izan dira. Brandenburgeko Atetik eta Sydneyko Badia ederretik datoz argazkiok. Datozen egunotan segituko dugu leku gehiagotako informazioa ematen.
2011/04/12
Otsailean aipatu genuen, urtero otsailean ospatzen baitu bere urtebetetze festa San Frantziskoko 'Basque Cultural Center' (BCC) euskal etxe kaliforniarrak. Aurten 29 urte egin ditu. Orduan 'grosso modo' iragarri genuen, eta oraingoan merezi duen xehetasunez aipatuko dugu, bereziki aipaturik --eta lagunen besarkada beroa igorriz-- merezimendu osoz San Frantziskoko 'Bizi Emankorra' saria jaso zuten Jean Baptiste Saparart, Aña (Etchehandy) Iriartborde eta Yvonne Sorhondo Cuburu. Kronika, Franxoa Bidaurretari zor diogu, Herria astekari baionesarekin partekatua.
2011/04/12
Joan den larunbatean eta Buenos Airesko Laurak Bat-en egoitzan jaso zuen FEVAk New Yorken egoitza duen SBSA erakunde euskal estatubatuarrak ematen duen “Basque Hall of fame” saria. Saria emateko AEBetatik propio etorritako Mark Doyagak eskuratu dio golardoa Ricardo Basterra FEVAko lehendakariari. Bertan ziren, Jaurlaritzaren izenean, Julian Celaya Kanpoko Euskal Herritar eta Gizataldeentzako zuzendaria, Elvira Kortajarena Argentinako ordezkaria eta Andoni Martin teknikaria; baita Argentinako Rafael Follonier eta Jose Barbier mandatariak. Mariluz Arteche, Felipe Eiheragibel, Jon Kepa Erkiaga eta Carlos Sosa FEVAko lehendakari ohiek eta euskal etxeetako hainbat kideek ere hartu zuten parte ekitaldian.
2011/04/12
Floresko Euskal Etxeak Uruguaiko Trinidad herriko frontoia eraberritu eta pilota sustatzeko akordioa sinatu zuen joan den asteartean, elkarteak antolatutako lehendabiziko Euskal Astearen ekitaldien artean. Etorkizunean komunitate osoari irekia egongo den frontoia kudeatuko du euskal elkarteak. Hitzarmen sinadura honez gain, I. Euskal Astean jarduera ugari izan ziren, hala nola, pilota txapelketak, erreki lehiaketak, gastronomi dastaketa bat, erakusketak eta liburu aurkezpena bat.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
