euskal diaspora eta kultura
2011/04/20
Argentinako Santa Fe-ko 'Gure Etxea' Euskal Etxea, hirian ekainean egingo den urteroko Gizataldeen Azokari begira dabil, bertako egutegian oihartzun eta garrantzi berezia duen ekimen horren aurreko hilabeteetan. Izan ere, Santa Feko Gizataldeen Elkarteko kide da eta lana egiten du urtean zehar hitzordu horrek ahal eta arrakastarik handiena izan dezan. Apiril honetan, bi ekitaldi berezitan izan da partaide Gure Etxea, euskaldunen ordezkari: TC 2000 auto lasterketan, eta Beteranoaren Eguneko ekitaldietan, azken honetan elkarteko lehendakaria, Catalina Villanueva, ikurrin handi baten eramale edo banderari.
2011/04/19
Igandean heldu zen Korrika 17 Donostiako helmugara, eta azken kilometroetan bertatik bertara jaso zuen Diasporako euskaldunen babesa, izan ere Europako bost euskal etxek lekukoa eraman baitzuten kilometro batez Kontxako pasealekuan. Baina Donostiara ez ezik, munduko beste zenbait bazterretara ere heldu zen Korrika azken txanpa honetan: asteburu honetan Korrika ekitaldiak egin dira New Yorken, Mexiko hirian eta Buenos Airesen, besteak beste. Jarraian ekitaldi desberdinen argazkiak eta Frantziako Tolosako euskaldunek egin zuten bideo bat jasotzen ditugu. Segituko dugu berri ematen, datozen bi asteotan Necochea (Argentina) eta Boise (AEB) bezalako Korrikako ekitaldiak gelditzen baitira.
2011/04/19
Posadas hiri argentinarrak, Misiones probintziako hiriburuak, omenaldia egin dio joan den igandean, apirilaren 17an, Ramon Madariaga doktore plentziarrari. Madariaga 1888an iritsi zen Argentinara eta XX. mende hasieran izurri bubonikoaren aurka lan eskerga egin zuen. Posadasko Euskal Jatorri elkarteak antolatu zuen omenaldia, Madariagaren heriotzaren mendeurrena dela eta. Ekitaldian Madariagaren omenez plaka oroigarri bat desestali zuten sendagile euskaldunaren izena duen ospitalean.
2011/04/19
Anitz proposamen ditu Chascomuseko 'Zingirako Euskaldunak' Euskal Etxeak bere bigarren sorreraren 20. urtemuga ospatzeko. Hitzaldiak, jaiak, dantzaldiak eta tailerrak dira urtean zehar gauzatuko diren ekintzetako batzuk. Baina euskal etxeak herriarekin duen harremanak ez da ematea soilik; egiten dituen lan guztiek beren sariak dituzte eta, esaterako, joan den apirilaren 15ean eta Cte. Giribone herrian emandako hitzaldiaren testu inguruan, Buenos Aires probintziako diputatua den Ana De Otazuak dirulaguntza bat eskuratu die Chascomusko euskal etxeko kideei. Dantzari eta gazteek San Juan probintziara egindako bidaian eragindako gastuak ordaintzera dedikatuko da.
2011/04/19
Urteroko bere bilkura eta egunpasaren XVI. edizioa ospatu zuen joan den larunbatean Euskal Herrian bizi den komunitate euskal venezuelarrak. Euskal Herrian jaio eta Venezuelan bizi izan diren edota Venezuelako euskal komunitateetan jaio eta egun Euskal Herrian bizi diren euskal venezuelarrak dira elkarretaratze honetara gehienbat biltzen direnak. Aurtengo datak biltzeko pixkat aldrebesak izan badira ere --antolatzaileek esanik--, 54 partaide bildu ziren larunbatean, Simon Bolibar elkartearen eskutik eratutako ekitaldira. Bertaratutakoek omenaldi txiki bat egin zioten han zegoen adinik altuena zeukanari, Mª Carmen Garate de Atxurrari.
2011/04/18
Euskal Herriko Agintzaritzaren Aldizkariak (EHAA) gaur argitaratuko du Jaurlaritzaren Kanpoan dauden Euskal Herritar eta Gizataldeentzako Zuzendaritzaren eremupean antolatu ohi den Diasporako gazteentzako Gaztemundu Programaren 2010ko edizioa. Parte hartzaileek 18 eta 30 urte bitartekoak beharko dute izan eta, aurreko urteetan eskatu izan diren ezaugarri eta baldintzez gain, aurtengoan hautagaiek idazlan bat egin beharko dute euskal etxe baten kudeaketa ereduari buruzko azterlan bat, finantzak eta programazio alorrak aipatuz. Aurtengo Gaztemundu urriaren 23tik azaroaren 6a bitartean garatuko da, azken partean Euskal Gizataldeen Mundu Biltzarrarekin batera. Parte hartzeko izena emateko azken eguna 2011eko maiatzaren 19a izango da.
2011/04/18
Corpus Christiko euskal etxe argentinarra une gozoa ari da bizitzen. Batetik, bere literatur lehiaketaren hirugarren edizioak arrakasta handia izan du eta jaso duen idazlan andanak aurreikuspen guztiak gainditu ditu. Bestetik, azken urteotako ekimen kuttunetako bat burutzeko zorian dago elkartea: mbya-guarani komunitateko haurrentzako eskola berri bat erakitzea. Eraikina bukatua dago jada eta hil honen bukaera emango diote komunitateari. Gipuzkoako Foru Aldundiak diruz lagundu du ekimena eta Iñaki Galdos, Kanpo Harreman eta Kirol diputatua, bertan izango da ekitaldian parte hartzeko.
2011/04/18
2011ko apirilaren 2 eta 3an gauzatu ziren Otxarkoagako XXX. Ume Jardunaldiak. Gizarteko txikienei zuzenduta dagoen ekintza hau bultzatzeko, Mugarik Gabeko Haurrentzako Ipuin Lehiaketa antolatu zuen Txirula Kultur Taldea elkarte bilbotarrak. Euskal Herritik ez ezik, euskal diasporatik ere erantzun zioten testuak bidaltzeko deialdiari; lanen artean bazegoen Madril, Bartzelona, Kolonbia eta Argentinakorik ere. Argitaratzeko hautatutako ipuinen artean, 'Zorionaren bila' dago, Rosana Entizne Bahia Blancako euskara irakaslearen lana. Irakur hemen ipuina.
2011/04/18
Jaio berria da, joan den ostiralean, Caracasko Eusko Etxearen baitan, 'Jazoera', hiriburu venezuelarreko euskal etxea eta haren inguruan mugitzen den euskal komunitatea animatzeko, inarrosteko eta biziberritzeko asmotan kaleratzen hasi den hilabetekaria. Lehenengo alean, bere aurkezpena egitearekin batera, datorren igandeko Caracasko Aberri Egunerako deia egiten du, etxe barruko berri laburrak dakartza, komunitateko jaioberrien argazkiak eta Euskal Herriko berriak, besteak beste. Deia egiten die parte hartu nahi dutenei. Bestalde, bihar emango du EuskalKultura.com-ek joan den larunbatean Galdakaon eginiko urteroko bilkura euskal venezuelatarraren berri.
2011/04/18
Egin berria du Donibane Garazin urteko bilkura edo biltzar nagusia Euskal Argentina elkarteak. Argentina eta Rio de la Plata eta Euskal Herriaren --bereziki Ipar Euskal Herriaren-- arteko harremanak atxiki eta azkartzea du helburu Nafarroa Beherean egoitza duen elkarte euskaltzale eta argentinazale hunek. Ohi bezala, Donibane Garaziko Herriko Etxean egin da, aretoa jendez mukuru. Aipatu da, besteak beste, Guillaume Aphezaren immigrazio artxiboak sarean direla kontsultagai; eta 'Euskaldunak Pampan gaindi' dokumentalaren egitea. Annie Sabarots-ek, merezi ohoratzea bildu du Apheza proiektuan egin lan eskergarendako. Honen guziaren kronika egina du Herria-rendako Monika Legarto Euskal Argentinako kideak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
