euskal diaspora eta kultura
2011/04/29
Lander Santamariak aurreratzen zuen albiste lazgarria arratsalde honetan Elizondotik, Baztango kronikari grafikoa den bere lagun Ondikol-ek esanik: Alberto Alday hil da. Bat baino gehiagok pentsatu du orduan, arraroa zela azken hilabete honetan bere iruzkinik ez irakurri izana Vascosmexico posta-zerrendan, 'guztia' azken hilabete honetan gertatu baita ia di-da. Linfoma batek, beste zenbait gauzarekin konplikaturik, eraman du, besterik gabe eta oharkabean. Baztan eta Mexiko maite zituen Albertok, eta Mexikoko diaspora baztandarra gutxik bezala ezagutzen zuen. Ohar hau presaz egin dugu, baina egin nahi genuen, hildako adiskidea gogoan.
2011/04/29
Liburu munduari hiri irekia du leloa apirilaren 20tik maiatzaren 9ra luzatuko den Buenos Airesko Nazioarteko Liburu Azokak, eta Hego Ameriketako kultur ekitaldi erraldoi honetan, idazle euskal argentinarrek leku berezia izan dute aurten. Juan de Garay Fundazioak argitaratutako lau testu aurkeztu dira herenegun Azokako Adolfo Bioy Casares Aretoan. Aurreko larunbatean, berriz, eta Dunken Argitaletxearen standean, 'Andrea Moch, artista baten bizipenak' aurkeztu zuen bere egile Angeles de Dios de Martinak. Sukaldaritza ere ez da letren jai honetatik at geratu: Marita Echavek bere 'Euskal baserrietako sukaldaritza'-ren aleak sinatu zituen Juan de Garay Fundazioak eta FEVAk kudeatzen duten standean.
2011/04/29
Aberri Egunaren ospakizunak, ohi bezala, oihartzun zabala izan du Diasporan. Aurten, gainera, zenbait euskal etxek proposamen berri eta originalekin ospatu dute jaia. New Yorkeko Eusko Etxean, adibidez, barre galantak egin zituzten Ruth Guimerá antzezlariak euskaraz eskaini zuen bakarrizketarekin: 'Euskal marketina' zuen izenburua lanak. Txilen, Santiagoko Gure Etorkia elkarteak San Nicolas muinora igoera antolatu zuen eta ezusteko ederra izan zuen, gainera: azken orduan txistulari espontaneo bat bildu zitzaien, ekitaldiaren berri EuskalKultura.com-en bitartez jakin ondoren, berak aitortu zienez.
2011/04/29
Interneterako eta telefono mugikorretarako aplikazioak garatzen ditu Ideateca enpresa bizkaitarrak eta horien artean musean Facebook edo Android mugikorren bidez aritzeko joko bat egin du. Munduko edozein bazterretik konekta daitezke jokalariak eta, errealitatean bezalaxe, mahaian 'eseri' ostean hasten da partida. Jokatzen ari diren bitartean elkarrekin edo partida ikusten ari diren bisitariekin txateatu dezakete, gainera. Aplikazioa duela urtebete aurkeztu zen eta 40.000 jokalari inguru aritu dira jada enbido eta ordago birtualak botatzen.
2011/04/29
Estatu Batuetako Idahon, Mountain Homeko Euskal Lagunak Euskal Etxeak mus ikastaro bat antolatu du gaur arratsalderako, bere bazkideei zuzendua. Ikastaroa Bengoechea Hotel historikoan gauzatuko da Euskal Etxearen egoitzaren ondoan, arratsaldeko 6:30etatik 8:30ak bitartean. Irakasleak Boiseko Oinkari dantza taldeko bazkide talde bat izango dira, tartean Steve Achabal, Xanti Alcelay, Jill Aldape eta Tyler Smith.
2011/04/28
Euzkaldunak --hala izena du Boiseko euskal etxeak-- elkarteak NABOko finalerako baliagarria den Mus Txapelketa egin zuen joan den larunbatean erakundearen egoitzan, Boiseko Basque Block delakoan, Grove kalean. Hamazazpi bikotek hartu zuten parte txapelketan. Ramon Barquin-ek eta Jose Neirak eurenganatu zuten txapela eta Euzkaldunak-eko ordezkariak izango dira, beraz, 2011eko NABOko finalean, datorren ekainaren 11ean, Fresnon, Kalifornian.
2011/04/28
Bartzelonako Euskal Etxean prest dira Literaldiaren edizio berri bati ekiteko. Aurtengoa hamaikagarrena izango da eta, urtero legez, euskal literaturaren ikuspegi zabal eta modernoa bilduko du jaialdiak Bartzelonako zaleentzako. Larunbatean hasiko da Literaldia, bertso afari batekin, eta ondorengo lau astetan zehar besteak beste Kirmen Uribe, Anjel Lertxundi eta Jabier Muguruza idazleak arituko dira Bartzelonan, euskal literatura ezagutzera ematen.
2011/04/28
Mexikoko baztandarrek urtero Maiatzaren lehenean ospatzen dute 'Baztango Eguna'. Askok urte osoan itxaroten duten elkarretaratzea da, garai batean gehienbat nafarren eskuetan zegoen ogitegi-arloko enpresa handietako baten jabegoan egiten zena eta duela urte batzuk, lekukoa hartuz, Euskal Etxea gertaleku hautatu zuena. Izan ere, baztandar andana polita biltzen du DFko Euskal Etxeak bere baitan, eta hala dira, urrunago joan gabe, etxeko egungo lehendakaria eta baita aurrekoa ere, eta Zuzendaritza Batzordeko zenbait kide. Bilkurak "gure aitzinekoak hartuko ditu gogoan, gure jatorria eta kultura maitatzen erakutsi baitziguten, hemen Mexiko segida emanez", aitortu dio EuskalKultura.com-i MariCarmen Arrechek, Mexikon jaiotako baztandarra eta ekitaldiko antolatzaileetakoa denak.
2011/04/28
Gure artean, milioika jende ari da lanean anonimotasunean eta zalaparta handirik gabe, hedabideetan agertu gabe eta ospearen atzetik ibili gabe, euren lana jator eta ondo egiten, aitzinamendua ekarriz bizi diren gizarteari. Komunitaterekiko engaiamendu isileko baina eraginkor hori duten pertsona eta erakundeei omenaldia egiteko asmoarekin sortu zuen duela zortzi urte Argentinako Tres Arroyoseko Hiru Erreka Euskal Etxeak 'Ondare Tresarroyostarra' Saria. 2011 honetan, aurreko edizioetan bezala, hiriaren urtemugaren testu-inguruan banatuko dira sariak, bihar, euskal etxearen egoitzan. Manuel Dean eta Yolanda Gilligan irakasleak eta Alicia Arevalo liburuzaina dira aurtengo sarituak.
2011/04/28
Kubako euskaldunek joan den asteburuan ospatu zuten Aberri Eguna, eta ederki ospatu ere!, bi eguneko ekitaldi sorta mardula lagun. Irlako euskaldunek antolatu zuten jaia, 'Asociación de Beneficencia Vasco-Navarra' elkartearen eta AthletiKuba taldearen laguntzarekin. Habanako Centro Vasco jatetxean egindako festa arrakastatsua izan zen, partehartzaile kopuruari zein giro ederrari dagokionez. Bi egunetan denetarik izan zen bertan: mus txapelketa, Athletic-Real derbiaren gorabeherak, musika, dantza, Erreniega abesbatz nafarraren bisita, bertsoak, 'repentistak'... Josemi Arrugaeta lagunak idatzi digu bertatik kronika.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
