euskal diaspora eta kultura
2011/04/25
Bazko astelehena da gaur, jai eguna, eta urtero bezala Sarako (Lapurdi) herria euskal idazleen, irakurleen eta, oro har, kulturzaleen elkarretaratze gune bilakatuko da egun osoan, goizeko hamarretatik aurrera, Sarako Idazleen Biltzarraren 28. edizioa gauzaturik. Bereziki Ipar Euskal Herrian hondarreko urtean atera diren liburu eta disko emaitzak bildurik ezagutu nahi dituenak, Saran dauka aukera ona. Azken urteotako ohiturari segituz, EuskalKultura.com ere bertan izango da, bere stand-arekin, euskal diasporaren lekukotasuna emanez azokara hurbilduko duren guztiei. Agurtzen gaituzten irakurleei saritxo bat emango diegu.
2011/04/22
Datorren igandean Aberri Eguna dela-eta, FEVA Euskal Argentinar Erakundeen Federazioak (Euzko Argentinar Bazkun Alkartasunak, bere izen tradizionalean) ohar bat zuzendu die bere euskal etxe kideei, datak mundu osoko abertzaleentzat daukan esangura azpimarratuz, bakoitzak bere euskal izaera eta nortasunaren lekukotasuna emateko aukera dela esanez. Horrekin batera, federazioak testu bat bidaltzen du, Aberri Egunari buruzkoa, euskal etxeei eta euskaldunei euren inguruan, prentsa eta komunikabideetan zabal dezatela eskatuz.2011/04/22
Igande honetan da Aberri Eguna eta asko dira ospakizunak antolatzen ari diren euskal etxeak. Diasporako euskaldunen artean jai oso garrantzitsua da hau, historikoki oihartzun handia izan duena, eta euskal elkarte askotan ekitaldi bereziak antolatzen dira, izan meza xume bat, izan ehundaka lagun biltzen dituen bazkaria. Hitzordu hauetako asko asteburu honetan bertan izango dira, Berpizkunde Igandearekin batera, baina badira ospakizuna astebetez atzeratzen dituzten hainbat euskal etxe ere. Jarraian datorren iganderako iritsi zaizkigun azkeneko deiak bildu ditugu.
2011/04/22
Paraguaik ofizialki antolatzen duen lehenengo Euskal Astea egingo da datorren ekainean, Asunciongo Jasone Euskal Etxea antolatzaile. Euskal elkarteak ekainaren 1etik 4era luzatuko den progama prestatu du, Mercosur-eko herrialdeentzako Euskadiko Ordezkaritzaren laguntzarekin. Elvira Cortajarena ordezkaria bertan izango da, eta baita Euskal Herritik etorritako bi gonbidatu ere: Julian Celaya, Kanpoko Euskal Herritar eta Gizataldeentzako zuzendaria, eta Aizpea Goenaga, Etxepare Institutuko zuzendaria.
2011/04/22
Hitzaldia eskaini zuen joan den astelehenean Boiseko Euskal Museoan John Bieter historialari eta 'Boise State University'ko Historia Saileko kideak 'Euskal migrazioa Ameriketako Mendebaldean' gaitzat harturik. Hirurogei bat pertsonak hartu zuen parte saioan, gehienak euskal komunitateko kideak, giro hurbilean eta hamaika irudiz hornitutako emanaldian. Joan den otsailean Buenos Airesko euskal ikastaro batean irakasle ibilitako Bieter-ek euskaldunen emigrazioaren ezaugarri orokorrak eman zituen, euskaldunek munduan euren pausoak nora bideratu zituzten aipatuz.
2011/04/21
Tipi-tapa eta erritmoari tamaina harturik, lehenengo aldiz iritsi da azkeneko igande honetan Korrika AEBetako Idaho estatura. Estatuko hiriburura ere, beranduago iritsiko da, hilaren 30ean. Harro errezibitu dute, beraz, Mountain Home-ko euskaldunek, ohore hau. Bost bat kilometro egin zituzten euskararen alde, bertako 'Euskal Lagunak' antolatutako ekitaldian. Partaideen arteam adin guztietako pertsonak, umeak, helduak zein gazteak. Lasterketaren ondoan, famili giroko piknika egin zen. "Korrika hemen egin dugun lehenengo urtea izan da, eta pozik gaude, erantzun polita jaso dugu", azaldu diote Euskalkultura.com-i antolatzaileek.
2011/04/20
Brnoko Masaryk unibertsitateko Euskara eta Euskal Kultura ikastaroak euskaraz jantzi nahi izan du txekiar hiria udaberri honetan eta urtero legez Euskal Kultur Astea antolatu du. Joan den apirilaren 14ean Harkaitz Cano eta Asier Serrano poetak izan ziren Brnon, Kristalezko Zelaia izeneko aretoan ilunabar poetiko-musikala eskaintzeko. Horrez gain, joan den asteburuan unibertsitateko euskara ikasleek eta Brnon bizi diren euskaldunek Korrika 17rekin bat egin eta hirian zehar ibilaldia egin zuten.
2011/04/20
Maiteminak eraman zuen Ainara Maya irundarra Txekiara. Ahazteko, bizimoduz aldatzeko. Euskal Herrian zuen euskara teknikari lana utzi eta 2008az geroztik Brnon bizi da, Masaryk Unibertsitatean Euskara eta Euskal Kultura irakasle. Hasieran txekieraz ez jakin arren, txekiarrak jator portatu omen dira berarekin hasieratik eta Ainarak habitxoa egin du jada Europa Ekialdeko herrialde honetan. Bere ikasleek ezer gutxi dakite Euskal Herriari buruz, baina 'dena' ikasteko gogoarekin etortzen omen zaizkio klaseetara. "Ikasle zenbait gure hizkuntzarekin maitemindurik utzi ditut, eta ni ere itxaropenik gabe maitemindu naiz", dio berak. Euskara, bihotz hautsien sendagarri?
2011/04/20
“Athletic-ek gauzatzen dituen ekintzak, lortutako tituluak, eusten dion futbolari buruzko kontzeptua eta oro har klubaren historia ezagutu eta zabaltzeko asmoarekin” jaio zen duela urtebete Euzko Etxearen baitan 'Bilbao Athletic Tango Club' Laguntalde argentinarra. Joan den apirilaren 1ean elkarteak bere lehenengo urtemuga ospatu zuen Argentinako bertako erara. Futbol eta tangoaz gain, 'Asadoa' edo errekia, enpanadak eta ardo ona konpartitu zituzten kirol-laguntaldeko kideek La Platako euskal etxeko Lagun Artean txokoan.
2011/04/20
Erakundearen Araudiak dioen prozedurari segituz, Coronel Pringles-ko Eusko Biltzar Euskal Etxeak, Buenos Aires probintzia argentinarrean, Zuzendaritza Batzordea berritu du bere azkeneko Urteroko Batzar Nagusian, epe berri honetan Juan Jose Olasagastia itzuliko delarik lehendakaritzara. Berarekin batera arituko dira, besteak beste, Abel de Uriarte, lehendakariorde; Veronica Iriarte, idazkari; Marta A, Arruti, idazkariorde; Miriam Zabala, diruzain; eta Maria del C. Goicoechea, diruzainorde.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
