euskal diaspora eta kultura
2011/05/11
Bihar Birmingham-en hasiko den zinemaldiaren barruan "80 egunean" filmea izango da ikusgaia maiatzaren 19an. Jon Garaño zuzendaria bertan izango da, luzemetraiari buruz eztabaidatzeko. Etxepare Institutuak antolatu du zinemaldia, Birminghameko Unibertsitatearekin batera eta Galizia Xuntarekin eta Kataluniako Ramon Llull Institutuarekin lankidetzan. Birmighameko Unibertsitateak Euskara eta Euskal Kultura irakurle programa abiarazi zuen ikasturte hasieran, Etxeparek sustatuta.
2011/05/11
Bukatu berria da Santa Feko Unibertsitate Iberoamerikarreko Euskal Astea eta arduradunak datorren urtean edizio berri bat antolatzeko asmoa agertu dute jada, aurtengoak izan duen harrera ona dela eta. Lau egunez unibertsitate mexikarreko kanpusean euskal kulturaren inguruko ekitaldi ugari egin dituzte, artea, literatura, gastronomia bezalako arloak jorratuz.
2011/05/11
Proposamen ugari burutu dira azken aste hauetan Argentinan zehar Aberri Eguneko ekintzen markoan: hitzaldi, topaketa, manifestaldi eta afariak, batzuk aipatzearren. Mendoza hiriburuan, berriz, Euskal Herriko musika tresnen soinuak gailendu ziren euskaldunentzat hain garrantzitsua den efemeride honen ospakizun egitarauan. 'Baietz' talde cordobatarraren eskutik tailer, kontzertu eta zuzeneko musikaz lagundutako dantza ikuskizunaz gozatu ahal izan ziren Denak Bat euskal etxeko kide eta lagunak.
2011/05/10
Joan den apirilaren 30ean eta pozez beteta irakurri zuten Chubut probintzia argentinarreko Puerto Madryn hiriko euskaldunek 'Etorritakoengatik' Euskal Etxearen sorrera-agiria. Duela hiru urte biltzen hasi ziren lagunek, lehenengo zuzendaritza batzordea plazaratzeaz gain, erakundearen helburuak ere aurkeztu zizkioten bertako herriari: "Euskal Herriko kultura eta ohiturak sendotu, ezagutarazi eta zabaltzea". "Baina instituzioaren antolakuntza urrats txikia baino ez da”, azaldu dio Maria Julia Ercoreca proiektuaren bultzatzaile nagusiak EuskalKultura.com-i. "Hastea ezezik segitzea da benetako erronka eta horri loturik bi proposamen polit prestatzen ari gara datozen hilabeteetarako: Aralarko San Migel-en jaia eta euskal etxearen inaugurazioa”, aurreratu digu euskal etxe berriaren lehendakariak.
2011/05/10
Pariseko Conservatoire á Rayonnement Regional (CRR) erakundeak 'Journeés Basques' izeneko jardunaldiak egingo ditu datorren maiatzaren 16tik 19ra. Pariseko Eskual Etxearekin eta Iparraldeko Euskal Kultur Erakundearekin (EKE) lankidetzan eginiko ekitaldian euskal musika, dantza eta orohar kultura ezagutzera ematea du helburu CRRek. Astelehenetik hasita pilota erakustaldiak, dantza ikuskizunak, Anaiki koruaren kontzertua eta euskal gastronomia dastaketa egingo dituzte Parisen, besteak beste. Gainera, Batekmila erakusketa ekainaren 11a arte izango da ikusgai.
2011/05/10
Estatu Batuetako hiriburu federalaren erdialdean dagoen Rock Creek Parkea bilakatu zen Washingtongo Euskal Etxekoen Aberri Eguneko festaren gertaleku, joan den larunbatean, maiatzaren 7an. Bostgarren urtez segidan ospatu du euskal etxe gazte honek Berpizkunde Igandeko euskal abertzaleen festa, euskal musika, janaria eta piknik motako aire libreko elkarretaratze giroan. Kideetako batek txalaparta ere eraman zuen, eta helduek eta bereziki haurrek denbora goxoa pasatu zuten egurrei erritmoak ateratzeko orduan. Kluba txikia bada ere, bazkidegoa handitzeko esperantza daukate elkartekideek: aurten bi familia gehiago lortu dituzte.
2011/05/10
Shanghaiko Euskal Etxeak honez gero klasikoa duen Udaberriko Mus Txapelketa gauzatu zuen joan den larunbatean, maiatzaren 7an, hiritzar txinatar horretan daukan egoitzan. Muserako deialdiari muslari, muszale eta, oro har, lagun talde polit batek erantzun zion eta inor ez zen harritu karten 'kirol' horrekin batera bildutakoek gastronomiari ere ohore egin eta Araban ospatu berria zen San Prudentzio gogoan barraskilo platerkada dastatzeko aukera izan zutenean, hirian Kuluska jatetxea duen Jon Aldaña bilbotarraren lankidetza medio. Gogor saiatzen dira, bai, Shanghaiko Euskal Etxekoak bertan euskal giroari eusten!
2011/05/09
Korrikak euskararen alde lasterka egiteko prest dauden euskaldun asko bildu ditu edizio honetan munduan zehar, eta Australiako muturreraino ere iritsi da. Iragan maiatzaren 1ean North Queenslandeko Euskal Etxeko kideek Aberri Eguneko bazkariarekin batera ospatu zuten lehen aldiz Korrika, eta gazte zein nagusiek ekitaldian parte hartu eta ederki gozatu zuten. Lagunak ikusi eta besarkatzeko aukera ederra izan zen North Queenslandeko euskaldunentzat, probintziak berriki sufritu zituen uholde larrien ostean. Zorionez, elkarteko kideek ez zuten kalterik jasan, ezta euskal etxeak ere.
2011/05/09
Bartzelonako Universitat Autonomako euskara eta euskal kultura irakaslea da Aritz Galarraga, jardun erdikoarekin, 1999az geroztik bertan irakurle den Jon Elordiri laguntzen. Urtero 150 ikasle inguru trebatzen dituzte bien artean, eta topikoak topiko eta Katalunian euskal kulturarekiko estimua izanagatik, egiaz "ezagutza oso da urria, orokortasunez betea" dela dio. Erruak bi aldeetara bota daitezkeela gehitzen du: "euskaldunok katalanei buruz dugun ezagutza parekoa dela esango nuke". Unibertsitateko erreformek euskal ikasketak ez kaltetzea da bere kezka nagusia orain.
2011/05/09
Jende ugari bildu zuen joan den Maiatzaren lehenean New Yorken lehenengo aldiz egindako 'Txakolin Eguna'k. Gauza berezia izan zen, Estatu Batuetan ez baitira egunero gertatzen honelakoak: txakolina (eta hein apalagoan sagardoa) dastatzeko aukera izatea; hainbat ekoizleren emaitzak dastatu eta alderatzeko eta iritzia emateko aukerarekin; zenbait chef-ek prestatutako mokaduak ezinbesteko osagai eta lagun; Manhattango kale arteko aire librean; eta deialdi honetarako propio ateratako edalontzi oroigarria eta guzti. Hitzorduak bildutako dirua, gainera, epilepsia sendatzeko ikerketetara bideratu zen. Garikoitz Udabek New Yorketik Berrian idatzitako kronika da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
