euskal diaspora eta kultura
2011/05/23
Gazteei zuzendutako bi ekintza gauzatu dira maiatz honetan Buenos Aires probintzia argentinarreko Tandil hirian. Batetik FEVA federazioak urteko bere lehenengo Dantza Tailerra eskaini zien Argentinako euskal etxeetako dantzariei. Beste alde batetik, Gure Etxea euskal etxeak, Dantzari Topaketa gauzatu zuen. Bi erakunde hauen eskutik, Arrecifes, Bahia Blanca, Chascomus, Cnel. Pringles, Buenos Aires -- Eusko Kultur Etxea--, Gral. Rodriguez, Las Flores, Lomas de Zamora, Maipu, Mar del Plata, Necochea, Saladillo, Trenque Lauquen, La Plata, Ayacucho eta Tandil bertako neska eta mutilek dantza eta musikaz betetako asteburua partekatu zuten.
2011/05/23
Ostegun honetan Parisen ikusgai izango da "Debekatuta dago oroitzea" dokumentala, frankismo garaian Saturrarango (Gipuzkoa)kartzelan preso egon ziren emakumeen testigantza hunkigarria. Nanteseko Zinemaldian Dokumental Onenari saria jaso zuen lan honek urte hauetan guztietan isilpean mantendu den istorioa dakar argitara: emakume hauek kartzelan jasan zutenaren testigantza, eta ondoren euren esperientziaz ezin hitz egitearen sufrikarioa. Luzemetraiaren zuzendariak, Txaber Larreategi eta Josu Martinez, emanaldian izango dira, filma aurkezteko eta ikusleekin solasteko.
2011/05/23
Futbol zaletasunak lagunen arteko hika-mikak sortzen ditu sarri, baina jendea biltzeko aitzaki ezin hobea da beste hainbatetan. Horrelaxe gertatu da Kuban: duela bi urte sortu zen AthletiKuba taldeak bazkide asko bildu ditu (tartean realzaleak ere) eta egun irlako euskal talde aktiboenetakoa da. Kirolaz gaindi kultur ekimen ugari ere sustatu ditu taldeak, eta bigarren urteurrena betetzen duten honetan, ibilbidearen balioespen baikorra egin dute. Josemi Arrugaetak urteurreneko bilkuraren kronika bidali digu Habanatik.
2011/05/20
Aspalditik entzuten ari garen gaia da Bilbo eta Miami lotuko dituen hegaldi zuzen baten sorrera, baina egiaz orain artean ezin izan da proiektua gauzatu. Orain, une egokia heldu dela dirudi, eta ekimenaren sustatzaileek lanean darraite asmo horrekin. Gaur arratsaldean, Miamiko Nazioarteko Aireportuko ordezkari bat Floridako euskal komunitatearekin bilduko da Miamiko Txoko Alai Euskal Etxean. Bileraren helburua Miamiko euskaldunen interesa aztertzea, eta euren sostengua lortzea.
2011/05/20
Joan den maiatzaren 3an Jose C. Paz-eko Toki Eder Euskal Etxeko kideek Iñaki Galdos-en bisita jaso zuten. Argentinako egonaldiaren amaieran eta Euskal Herrira itzuli baino pixkat lehenago, Gipuzkoako Foru Aldundiko Kanpo Ekintza eta Kirol diputatuak egoitzako azken aldaketak ikusi eta talde anfitrioiarekin pintxo eta topa-egite bat konpartitu zituen. Bisitaren testu-inguruan Gipuzkoako Foru Aldundiak Hermansoloña Gobernuz Kanpoko Erakundeari eskuratuko dion diru-languntzaren berri eman zien Galdosek Jose C. Paz-eko euskaldunei.
2011/05/20
Beti aipatua da Antioquian euskaldunek bertako historian izan duten zerikusia eta utzitako arrastoa, eta horri heldu dio hain zuzen Antioquiako Euskal Ikasketen Zentroak bere I Olerki Saria antolatzeko, izentzat, gainera "Euskal-antioquiar lotura Robledo Ortiz-en olerkietan" ipinita. Izan ere, gisa batera edo bestera lotura hori edo euskal aipamenik baitaratzen duten olerkiak aurkeztu ahal izango dira, edonongo egileenak, gaia zeinahi, eta saritzat olerkien argitarapena eskainiz, edizio elebidunean, gaztelania-euskara 'Euskal Presentzia Antioquian' izeneko antologia baten barnean. Egile bakoitzak hiru lan aurkeztu ahal izango ditu gehienez. Argitaragabeko lan originalok aurkezteko epea 2011ko uztailaren 30ean bukatuko da.
2011/05/20
Euskaldunak elkarte quebectarrak iragan maiatzaren 15ean egin zuen elgarretaratzean Sylvie Nanaud bazkideak Salt Lake Cityn egindako North American Basque Organization (NABO) federazioaren bilkuraren berri eman zuen. Sylviek bilkura hauetan parte hartzearen garrantzia azpimarratu zuen, Ekialdetik Mendebaldeko muturreraino Ipar Amerikako euskaldunen arteko elkartasuna sustatu ahal izateko. Elkarteak bide horretan jarraitu nahi du eta NABOren hurrengo bilkura Montrealen egingo da, Euskaldunak-ek antolatuta. Euskal Etxe quebectarraren 15. urteurreneko ospakizunekin batera egingo da bilera.
2011/05/19
Caraceseko Eusko Etxeak Jazoera buletinaren bigarren alea argitaratu du, elkartearen apirileko eta maiatzeko egitasmo eta ekimenen berri emateko bere bazkide eta lagunei. Albistarian Euskal Herritik etorritako berririk ere badago, Galdakaon egin zen euskal-venezuelarren urteroko topaketaren kronika, kasu. Irantzu Leundak bidaltzen du. Aberri Eguneko ospakizuna ere gai nagusienetakoa da eta datozen hitzorduak aipatzen dira, horien artean Amatxuei Omenaldia eta Pintxo Lehiaketa.
2011/05/19
Erromako UPTER Unibertsitateko Euskara sailak idazkia bidali dio EuskalKultura.com-i, Etxepare Institutuarekin lankidetza hitzarmenaren inguruan izan dituzten desadostasunak agertuz. "Oso zaila gertatzen zaigu gaur egun Etxepare Institututik entzuten ditugun argudioak ulertzea, hau da, titulazio akademikorik eta 'maila' unibertsitari akademikorik ematen ez duen eredua ez dela haien prioritate, eta Etxepareren laguntzetatik at geratuko garela 2012 urtean", diote. Etxepareko Euskara Sustatzeko zuzendari Mari Jose Olaziregik, berriz, institutuak unibertsitate barruko irakurle figura indartzeko asmoa duela baieztatu du eta, UPTERek burutzen dituen ekintza interesgarriak aintzat hartzen dituztelako, hitzarmena birformulatzeko bideak bilatzen ari direla azpimarratu du.
2011/05/19
Ehunda berrogeita hamar bat lagun bildu ziren maiatzaren 8an Argentinako Gral. Rodriguezko Eusko Aterpea euskal etxean Aberri Eguna ospatzeko. Euskaldunentzat hain garrantzitsua den efemeride hau ez zuten izan, ordea, elkartzeko arrazoi bakarra izan. Pausoz pauso altxatzen ari diren egoitza prest egotetik gero eta hurbilago dago eta 'SUM' edo balio anitzeko aretoko zorua inauguratu zuten Eusko Aterpea-koek pasa den egun horretan burututako bazkarian. Lujan, Moreno, Cañuelas, San Miguel eta Suipachako ordezkaritzek lagundu zituzten Rodriguetarrak beren festan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
