euskal diaspora eta kultura
2011/11/16
Danborradaren soinuak Donostiatik Necocheara bidaiatu ziren joan den larunbatean. Izan ere, Gaztelubideko zuzendariarekin batera, San Sebastian eguneko erritmoak entzun ahal izan zen Euzko Etxea-ko egoitzaren aurrean. FEVA eta liburuzainen bilerekin hasi zen Euskal Asteko azken-aurreko eguna, danborrada, kalejira, dantza eta erromeriarekin bukatu zen. Hona larunbateko lehenengo zatiko argazki erreportajea.
2011/11/16
Etxepare Euskal Institutuaren Patronatuak eta Zuzendaritza Kontseiluak astelehenean aurkeztu zuten Gasteizen 2012ko aurrekontuen aurreproiektua, jarduera-plana eta Institutuaren plan estrategikoa. Institutuak 2.8 milioiko aurrekontua izango du, aurtengoaren ia berdina, baina diru gehiago erabiliko du nazioartean euskal kultura zabaltzeko eta irakurle sarea sendotzeko. Horrez gain, katedra berria inauguratuko da Chicagon apirilean eta euskal zinema erakustaldia egingo da New Yorkeko Lincoln Center-en, besteak beste.
2011/11/16
Datorren abenduaren 3an ospatuko den Euskararen Nazioarteko Eguna kari, Donostiako Euskara Patronatuak ekimen berezi bat jarri du abian interneten. 'Euskara Iruditan' izeneko webgunean mundu osoko euskaldunen irudiak biltzen ari dira, eurekin euskararen mosaiko erraldoi bat osatzeko. Badira jada makina bat irudi bertan, tartean Diasporatik heldutako bat edo beste ere. Argazkiak bidaltzeko baldintza bakarra euskararekin zerikusia izatea eta azalpentxo labur bat gehitzea dira, zeri buruzkoa den azalduz. Bidal ezazu zeure argazkia!
2011/11/15
Bukatu berria da aurtengo euskal astea baina oraindik makina bat hitz, irudi eta sentimendu dauzkagu gure irakurleekin partekatzeko. Argentinako bazter askotako lagunak bildu ziren pasa den astean Necochean Euskal Herriarekiko euren engaiamendua berresteko. Eta nahiz eta kasu askotan kilometro ugari egin behar izan, hori ez zen oztopo bihurtu hitzaldi, kirol, kanta, dantza eta, nola ez, parrandaz gozatu ahal izateko. Urtero bezala, EuskalKultura.com jaiaren partaide eta lekuko izan zen. Hona hemen ekitaldietako I. argazki erreportajea.
2011/11/15
Korrontzi taldea Cabo Verde eta Brasilen zehar bira egiten ari da egunotan, Sete Sois Sete Luas 2011 jaialdi erraldoiaren barruan. World music estiloko musika topaketa hau ekainaz geroztik ari da egiten munduko hamar estatutan (Brasil, Cabo Verde, Kroazia, Espaina, Frantzia, Grezia, Israel, Italia, Maroko eta Portugal) eta bere baitan 400 bat kontzertu eskaini dituzte ia 150 musikarik. Jaialdia asteburu honetan bukatuko da Brasilen eta bertan izango da, besteak beste, Korrontzi. Hiru kontzertu emango ditu taldeak Ceará hirian.
2011/11/15
Sakeleko telefonoek iraultza ekarri dute gure bizitzako arlo askotara eta komunikatzeko eta harremantzeko erak ere aldatzen hasiak dira. Mugikorrek eskaintzen dituzten gailu eta aplikazioen artean, badira euskara ikasi eta sustatzeko balio dezaketen zenbait. Elhuyar Fundazioak, adibidez, euskara ikasteko Moblang.eu sistema sortu du. Eta badira baita ere Euskal Herriari buruzko informazioa eskuratzen laguntzen duten beste batzuk: euskal irratiak entzuteko sistema edo Euskal Kultur Erakundearen agenda sakelean eskuratzeko aukera.
2011/11/14
Egun Argentinako euskal etxeetan ari diren hainbatentzat irakasle eta laguna zen Maria Julia Ercorecarekiko oroitzapenak markatu du atzo igandez Necochean bukatu berria den 2011ko Euskal Aste Nazional Argentinarra. Astean zehar hamaika ekimen garatu dira, hala nola erakusketak, film emanaldi eta saio eta dastaldi gastronomikoak, eta baita ere euskal dantza garaikide erakustaldiak --Aukeran taldearen eskutik--, Necocheako ohiko danborrada donostiarra, dantza taldeen emanaldiak, FEVAren bilera, euskal liburutegien eta zuzendarien bilkurak, herri jolas eta kirol saioak, kalejirak --buruhandi eta erraldoiekin--, dantzaldiak --Drindots taldearekin--, abesbatzen emanaldiak, eta abar. Larunbat gaueko emanaldian hogeita hamar dantza talde aurkeztu ziren herrialde osotik etorriak. Gaurko sarrera-artikuluaren ondotik, datozen egunotan ohiko argazki-kronika eskainiko du EuskalKultura.com-ek Argentinako Euskal Asteari buruz.
2011/11/14
Argentinako Cordoba probintzian, Rio Cuarto-ko 'Gure Ametza' Euskal Etxeak Urteko Ohiko Batzar Nagusia biltzeko deia egin zuen azaroaren 2rako eta hala bildu ziren bertako bazkideak, besteak beste elkartearen Zuzendaritza Batzordea berritzeko. Hauteskundeak egin ondoren, Eduardo Aguirre atera da lehendakari berria eta berarekin batera sartu dira Zuzendaritza Batzordean Edurne Bilbao, lehendakariorde; Pablo Gabriel Cufré, idazkari; José Victoriono Irazoqui, idazkariorde; Elba Regina Viano, diruzain; eta Raúl Zufiaurre, diruzainorde, besteak beste.
2011/11/14
Musean aritzeko gogoa ematen du Vancouver-en egingo den Euskal Etxeen Mundu Txapelketaren programak, besterik ezpada Zazpiak Bat Euskal Etxeak proposatzen duen bidaia egiteagatik. Txapelketa kruzero batean egingo da, Ipar Amerikako mendebaldeko kostaldean barrena bidaiatuz, Alaskako Juneau hiritik Vancouver-era. Bidean Glaciar Bay Parke Nazionala eta beste toki ikusgarri batzuk ezagutu ahal izango dituzte muslariek. Txapelketa irailaren 21etik 29ra egingo da. Mus federazioak herrialde bakoitzeko bi muslari eta ordezkari baten bidaia ordainduko du, baina badago lagun gehiagorentzako lekua ere (hori bai, bidaia ordainduz). Erreserbak urtarrilaren 2a baino lehen egin behar dira.
2011/11/11
Txalapartaren deia eta aurten zendu den lagun eta irakasleari --Maria Julia Ercorecari-- omenaldia izan ziren astelehenean Argentinako 2011ko Euskal Astearen abiapuntua. Aste osoan zehar hamaika kultur ekitaldi eta festa egin dituzte aurtengo edizioa antolatzen duen Necocheako Euzko Etxean, baina asteburuan zehar goiena joko du euskal asteko giroak: gaurtik hasi eta iganderaino Argentinako euskaldunek eta Necocheara bildu diren Euskal Herriko lagunek euskal komunitatearen lehena eta oraina ospatuko dituzte, etorkizunaren aldeko apustu sendoa eginez. Hemendik bazalbiltza, irakurle, "zalantzarik ez izan eta 'hator hona' (veníte acá) eta gozatu jaiaz euskaldunekin", gonbitea egiten dizute antolatzaileek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
