euskal diaspora eta kultura
2011/12/05
Euskararen Nazioarteko Egunaren ospakizunak borobilak izan dira aurtean Madrilgo Euskal Etxea. Iragan ostegunean, abenduak 1ean, egin zuten festa Madrilgo euskaldunek, eta egun horretan bertan jakin zuten eurek irabazi dutela Eusko Ikaskuntzak ematen duen aurtengo ENE saria, euskararen alde egindako lana dela eta. Sariaren berriaz gain, Lurdes Auzmendi, Hizkuntz Politikarako sailburuordearen presentziak ere aparteko oihartzuna eman zion egunari. Auzmendik euskara eskolak emateko hitzarmena berritu zuen euskal etxeko presidente Julio Elejalderekin: datorren ikasturtean 2.456 eskola ordu diruz lagunduko ditu HABEk. Aurten 150 ikasle ari dira euskara ikasten Madrilgo Euskal Etxean.
2011/12/05
Diasporako herrialdeetan euskal kulturari buruz hitz egiten dugunean, dantzak, sukaldaritza, euskara eta kirolak datozkigu gehienbat burura. Eta musika. Egun gainera, teknologia berrien garaian, oso erraza egiten zaigu urrun dauden musikari eta taldeen lanak ezagutu eta lortzea. Zer gertatzen da, ordea, euskal tresna tradizionalak jotzen ikasi nahi dugunean? Mauro Telletxea argentinarrak bide zoragarri bati ekin zion 2004an, haurtzaroan entzuten zuen albokaren soinua berreskuratu nahirik. Euskal Herriko izen handiko musikari eta luthierrekin ikasi ondoren, alboka jole eta egile bihurtu eta hala segitzen du Buenos Airesen gazte euskal-argentinarrak.
2011/12/02
Abendua hasi berria da eta datozen jai egunei begira zenbait izan dira gure irakurleen artean lagunak eta senitartekoak zoriontzeko euskal postal birtualei buruz galdezka hasi zaizkigunak. Urtero egiten dugun artikulua da hau, eta urtetik urtera postal eta ideia berriak aurkitzen ditugu. Nahikoa dira minutu batzuk maite ditugunei besarkada birtual bat bidaltzeko, gogoan ditugula jakinarazteko. Datozen egunetan etxeko txikientzako Olentzerori buruz sarean topa daitezkeen webgune eta baliabide zerrenda ere bilduko dugu.
2011/12/02
Abenduan sartuta gaude jadanik eta Gabonekin lotuta dauden hainbat ohitura biziberritzen hasiak gara, urtero bezala. Testuinguru horretan, Bahia Blancako Union Vasca euskal etxe argeninarreko euskara ikasleek Olentzerori buruzko ekintzak burutu dituzte ikasturteko azken eskoletan. Baina euren lana ez da ikasgeletara mugatu; ekintzak osatzeko Bahia Blancako ikasleek “Olentzero eta enbor magikoa” filma ikusi eta Olentzeroren bisita jaso zuten. Horren eta beste aktibitate batzuen berri heldu zaigu Union Vasca euskal etxetik.
2011/12/02
Gabonetan elkarri zorionak eman edo urteberri on bat opatuz bidaltzen diren mezuak euskaraz sortu eta zabaltzeko helburuarekin, Azkue Fundazioa eta Bizkaia Irratiak "Txioka Sarean" lehiaketa antolatu dute. Abenduaren 1a eta 18a bitartean Twitter eta Facebook bidez bidaltzen diren mezuak sarituko ditu lehiaketak. Hiru mezu onenek saria izango dute: gabonetako otzara bat, bi lagunentzat Areatzako SPAn egotaldia eta Lekeitioko 'Eguren Electrodomesticos'-ek eman duen Samsung Galaxy tableta. Azkue Fundazioarekin hitz egin dugu eta saria Diasporako euskaldunen batek irabazten badu, dagoen herrialdera bidaliko diotela esan digute.
2011/12/01
Euskal literatura bere tartea izaten ari da aurtengo Guadalajarako Liburu Azokan, eta bertan egin diren ekitaldien artean, interesgarria izan zen "Presentan los lectores" atalean Anjel Lertxundiren 'Los trapos sucios' ('Etxeko hautsa') eleberriari buruz entzun zirenak. Lertxundirekin batera hiru mexikar irakurlek aurkeztu zuten liburua eta haien esanetan "guztiok eragiten gaituzten sentimenduak” islatzen ditu lanak, "jatorria eta hizkuntza kontuan hartu gabe". Eleberriak “harrapatu” egiten du irakurlea, eta amaiera “harrigarria” du. Horrexegatik, publikoa lan honetan eta euskal literaturan sakontzera animatu nahi izan zuten.
2011/12/01
Larunbat honetan, abenduaren 3an, mundu osoko euskaltzaleek Euskararen Nazioarteko Eguna ospatuko dute. Euskal etxeen artean jarraitzaile asko ditu festa honek, eta Argentina, AEB, Mexiko, Txile, Uruguai, Italia edo Australia bezalako lekuetan makina bat ekitaldi antolatu dira. Herrialde hauetan guztietan asko dira euskal etxeetan euskara ikasten dihardutenak, arbasoen hizkuntzari eusteko apustu pertsonal sendoa eginez, Euskal Herritik milaka kilometrotara bizi arren. Euskara ikasle eta irakasle hauek, euskal etxeetako milaka kideekin batera, protagonista izango dira egunotan egingo diren jai eta ekitaldietan.
2011/12/01
Ekintza ugari eta euskal sentimendu nabaria izan dira Lagun Onak-en 60. urtemuga ospakizunen ezaugarri bereziak. Pergaminoko euskal etxeak mugimendu handiko hilabeteak bizi izan ditu 2011an, bere urtemuga biribil hau ospatu eta Euskal Herriko kultura zabaltzeko asmoa xede. Egitarauari jarraituz, joan den igandean urte amaierako afaria ospatu zuten euskal-pergaminotarrek 9 de julio kaleko euren egoitzan. Eta abendurako ere badute beste proposamenik: Euskadiko egoera politikoa eta ETAk jarduera armatua behin-betiko eteteari buruzko debatea, 'Euskal Pilota' dokumentala ikusi ondoren, abenduaren 2an, iluntzeko 7:30etan.
2011/12/01
Lopez lehendakariak harrera-ekitaldia eskainiko die abenduaren 26an Gasteizen, Lehendakaritzaren egoitzan, atzerrian bizi eta eguberri sasoina dela eta egun horietan Euskadira itzuliko diren euskal herritarrei. Hirugarren urtez segidan antolatu den ekimen honetan parte hartzeko gonbidapena luzatu die egoera horretan duden herritarrei Juan Celaya Kanpoko Euskal Herritar eta Gizataldeentzako zuzendariak, euren parte hartzea eta bertaratzea baieztatzeko email helbide bat emanez.
2011/11/30
Abenduan sartzeko egun bat falta da oraindik, baina badira Gabonetako jaiak aurre-egiten hasi diren euskal etxeak, batez ere Ipar Ameriketan. Abendu amaieran oporrak hasi eta famili jaiak ospatzen hasi aurretik, nahiago izaten dute elkarteko kideak garaiz bildu eta Gabon eguna aldez aurretik euskal giroan ospatzeko aukera izatea eta horixe egingo dute asteburu honetan, esaterako, Utahko Euskal Etxeak, Ontario Basque Club-ek, Coloradoko Euskal Etxeak eta Kanadan, Vancouver-eko Zazpiak Bat elkarteak. Olentzero ere bilduko da jai hauetara eta elkarteetako umeen artean opariak banatuko ditu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
