euskal diaspora eta kultura
2011/11/22
Caracasko Eusko Etxeak Jazoera berri buletinaren zazpigarren alea plazaratu du, aurrekoak bezala Pedro Javier Arriaga bazkidearen koordinazioa eta edizio lanari esker. Ale honetan Jazoerak Venezuelako ordezkariek azken hilabeteetan izan diren nazioarteko txapelketetan izan duten parte hartzearen berri dakar: Angelun jokatu zen Munduko Mus Txapelketan eta Guadalajaro Pilota Joko Panamerikarretan, hain zuzen. Buletinak Venezuelako euskaldunen historia ikertzen jarraitzen du eta, horrela, ale honek Cumanako Euskal Etxeari buruzko atal berri bat dakar, eta Josune Dorronsoro historialari eta argazkilaritza aditua gogoratzen du.
2011/11/21
Madrilgo Atenea argitaletxeak urteak daramatza erdal hiztunei euskal literatura ezagutzeko bidea ematen, Euskal Liburutegia bilduma elebidunaren bitartez. Bildumak 25 izenburu biltzen ditu jada, eta hori ospatzeko eta ezagutzera emateko aurkezpena egin zen iragan asteazkenean Madrilgo Círculo de Bellas Artes aretoan. Bertan izan zen ere Juan Kruz Igerabide poeta, bilduman argitaratutako bere poema liburuei buruz hitzegiteko. Hurrengo egunean bigarren aurkezpen bat egin zen Madrilgo Euskal Etxean, eta abenduaren 15a arte ikusgai izango den erakusketa inauguratu zen.
2011/11/21
Bartzelonan euskara ikasle dezente dira eta horietako 170 Euskal Etxearen ikastaroetan aritzen dira hizkuntza hobetzen. Iragan astean euskal elkarteko arduradunek HABErekin klase hauek emateko laguntza hitzarmenta berritu egin zuten eta 2011/2012 ikasturtean 2.100 eskola ordu emateko 22.000 eurotako laguntza eskuratuko dute. Hitzarmena sinatzen euskal etxean izan ziren Lurdes Auzmendi, Hizkuntz Politikarako sailburuordea, eta HABEko zuzendaria, Iñaki Uribe. Ondoren, bertako hainbat ikaslerekin elkartu zen Hizkuntza Politikarako sailburuordea eta haien kezka, jakin-min eta asmoen berri izan zuen.
2011/11/21
Rosarioko Zazpirak Bat Euskal Etxean ospatu zen azaroaren 5ean EAJ-PNV alderdiko Argentina Buru Batzarraren sorreraren mendeurrena. Ospakizun egitarauari jarraituz, arratsaldeko 15:00etan Bilkura Orokorra burutu zen Zazpirak Bat Euskal Etxean. Ondoren, 19:00etan, lore eskaintza Sabino Arana Goiriren omenez eta 19:30tan Juan Mari Atutxak "Euskadi, Nación Europea" izeneko hitzaldia eskaini zuen euskal elkartean. Ekintzak Mendeurreneko Afariarekin bukatuko ziren. “Azken bolada honetan Euskadin bizi dugun egoera politiko berriak itxaropen handia dakar eta bide batez, hainbeste oinaze eta atsekabe atzean uzten ditu”, adierazi zuen bere mintzaldian Sabino Arana Fundazioko presidenteak.
2011/11/18
Siroka talde euskalduna Udinen, Italiako Friuli eskualdean, izango da gaur, asteburuan zehar bertan egingo den Liet International jaialdian parte hartzeko prest. Jaialdi hau 'hizkuntza gutxituen Eurovision' bezala ezaguna da eta Europako 12 herrialdetako ordezkarik parte hartuko dute bertan. Euskaldunek 'Hi vascofona!' kantua aurkeztuko dute, Eskozia, Irlanda, Frisia, Asturias, Sami, Udmurtia, Ladinia eta beste hainbat naziotako ordezkarirekin lehian. Jaialdia larunbatean izango da eta zuzenean internet bidez ikusi ahal izango da.
2011/11/18
Datorren asteko larunbatean, azaroaren 26ean, hitzordua dute La Platako Villa Elisan Juan Angel Goizueta y Gracia Mariezcurrena bikotearen ondorengoek, Goizuetarren 4. Famili Topaketan. Nafar senar-emazte hauek 1840ean Argentinara heldu ziren Pedro eta Manuel anaien birraiton-amonak izan ziren. Euren ondorengoek azken urteetan familiaren zuhaitz genealogikoa osatu dute, Argentinara eta Estatu Batuetara zabaltzen diren adarrak harremanetan jarriz. Villa Elisan aurrez aurre topatuko dira eta munduko beste Goizueta deituradun guztiei bertara edo Facebook-eko famili-orrira biltzeko gonbitea egiten diete.
2011/11/18
Urte osoa itxaron behar eta gero ziztu bizian pasatzen da Euskal Astea. Izan ere, epea laburra egiten zaigu nahi dugun guztia egiteko: dantzatu, kirola egin, abestu eta lagunekin elkartzeko, batzuk aipatzearren. Hala ere azaroaren 7tik 13ra gauza hauek eta euskal sentimendua adierazten dituzten beste hainbat ekintzetan hartu zuten parte Necocheara bildu zirenek. Baina “agur” esateko momentua ere heldu zen eta bederatziehun bat lagunentzako bazkari batekin itxi zen 2011ko Euskal Astea. Igande goizean, meza ospatu zen Karmen parrokian eta ondoren enparantzako dantzek gorri, zuri eta berdez jantzi zituzten hiriko kaleak. Bazkarian zehar, berriz, lehiaketetako sariak banatu ziren.
2011/11/17
Gose taldeak AEBetan lehendabiziko bira egin zuen iragan azaroaren 5etik 12ra eta San Frantziskon eta Boise artean lau kontzertu eman zituzten arrasatearrek. San Frantziskon Basque Cultural Center-ek egin zuen Nafarroaren Jaian parte hartu zuen Gosek, eta Boisen Euskal Etxean jo zuen. Kalifornian euskal zirkuitotik kanpo beste bi emanaldi ere egin zituzten eta, orohar, kontzertu guztietan euren euskal trikitixa eta musika elektronikoaren arteko fusioak izan zuen harrera onarekin harritu ere egin zirela aitortu dio Ines kantariak EuskalKultura.com-i.
2011/11/17
Tradizionalagoak batzuk; beste batzuk ausartagoak, estilo berriak baitaratuz; edonola ere, Argentinako dantza talde gehienetan Maria Julia Ercorecaren eragina aurki daiteke. Hara zergatik Argentinako euskal dantza munduko erreferentea izan zenaren omenez egin zen Necocheako Euskal Asteko Dantza Emanaldia. Urtero bezala, ehunka dantzarik hartu zuten agertokia kalitate handiko ikuskizuna eskaintzeko. Hona dantzaldiaren argazki erreportajea.
2011/11/17
Amsterdametik itzuli berria da Laura Mintegi idazlea, 'Sisifo maite minez' liburuaren neerlanderazko bertsioa aurkeztetik. Zirimiri Press argitaletxeak larunbatean antolatu zuen ekitaldira jende asko bildu zen, tartean propio Belgikatik eta Holanda iparraldetik etorritako literaturzaleak, eta halako interesa 'sorpresa handia' izan dela aitortu du euskal idazleak. Ekitaldiak euskal kulturarekin harremana duten zenbait lagun ere bildu ziren, hala nola, Rudolf De Rijk ohorezko euskaltzain belgiarraren alarguna. Henrike Olasolo editorea pozik agertu da elaberriak izan duen harrerarekin eta, Holandaz gain, Belgikan ere salduko dela iragarri du, The Standard liburudenda kateak 350 aleko eskaria egin baitio Zirimiri Press-i.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
