euskal diaspora eta kultura
2012/04/16
Duela bi urteko bozketetan hautatua izan zen bikoteak bi urte gehiagotan luzatuko du bere agintaldia FEVAko buruzagitzan. Hemeretzi euskal etxetako ordezkariek hautatu zuten joan den larunbatean, aurkeztutako zerrenda bakarra, Ricardo Basterra eta Marta Abarrategui buru zeuzkana, ustekaberik izan ez zuen hauteskunde prozesuan. Partaidetza eskaseko Urteko Ohiko Biltzar Orokorrean, -hemeretzi boto zerrendaren alde eta bat zuri-, lehendakari berrautatuak elkarlanean sakondu eta martxan dauden proiektuak jarraitu eta sendotzera deitu zituen FEVAko kideak. Biltzarrean, Euskadiko Ordezkaritzen ixtearen kontrako dokumentu bat irakurri zuen Basterrak eta bertaratutako lagunak Zuzendaritza Btzordearen lehenengo bileran parte hartzera gonbidatu zituen. Bilkura hastean, ostegunean hil zen Ramon Ignacio Arozarena Landaren omenezko txalo bat eskaini zen.
2012/04/16
"Salvemos el frontón Beti-Jai" izeneko madrildar herritar plataformak jo eta su darrai munduko neomudejar estiloko frontoi bakarra salbatzeko ahaleginean. Joakin Rucoba arkitektoak 1893an eraiki zuen frontoia Kultura-ondasuna da eta iragan martxoan Madrilgo Udalak desjabetu egingo zuela iragarri zuen, eraikina eta bere ondarea zaintzeko. Hala ere, prozesuak luze joko du, eta plataformatik salatu dute egungo jabeak ez direla ari zaintzen behar den moduan eta gero eta larriagoa dela instalazioen hondamendi-egoera.
2012/04/13
Rhode Island-eko Euskal Etxea gogotsu ari da lanean eta makina bat ekimen eta egitasmo sustatzen dabil 2012 honetan. Elkarte gazteak datorren igandean ospatuko du Aberri Eguneko jaia eta, bide batez, aurtengo besta eta ekitaldien egitaraua gogorarazi du euskal etxearen newsletter edo buletinaren bitartez. Abian dituzten egitasmoen artean aipagarriak dira Portsmouth-eko Liburutegian ematen diren euskara eskolak (doan eta edonori irekiak) eta "Senior Project Scholarship" delako beka: eskola proiekturako euskal gaia aukeratzen duten ikasleentzako dirulaguntza.
2012/04/13
"Koldo Mitxelena ez zen sekula Estatu Batuetan izan, baina orain merezimendu osoz lekua du unibertsitate honetan", esan zuen Blanca Urgell Kultura sailburuak Chicagoko Unibertsitatean asteartean, euskal hizkuntzalariaren izena duen katedraren inaugurazioan. Etxepare Institutuak sortu duen katedrak euskal ikasketak sustatuko ditu AEBetako unibertsitateetan. Asteartean egin zen inaugurazio ofiziala eta, ekitaldiei bukaera emanez, asteburuan euskal zinea izango da ikusgai Chicagoko Latino Film Festivalen jaialdian.
2012/04/13
Illinoisko Unibertsitateak, bertan Koldo Mitxelena katedra inauguratzea kari euskara eta euskal kulturaren erakuslehio antolatutako ekitaldien artean, atzo ostegunez euskal literaturari buruzko eguna pasatu zen, gonbidatu gisa Arantxa Urretabizkaia eta Eider Rodriguez idazleak, eta Jaurlaritzako Blanca Urgell Kultura sailburua eta Mari Jose Olaziregi Etxepare Institutuko Euskararen Sustapenerako zuzendaria ere partaide zirela. Unibertsitateko euskara ikasleek, eurek espres eginiko bertso batekin eman zieten ongietorria gonbidatuei.
2012/04/13
Hegoamerikako euskal etxeetako euskara ikasleek 1go, 2. eta 3. maila egiaztatzeko aukera izango dute aurten Buenos Airesen. HABEk lehendabizikoz eskaintzen du aukera hau aurten eta, besteak beste, 2007-2011 tartean Euskara Munduan programaren barruan trebatu diren irakasleek ikasitakoa egiaztatzeko aukera izango dute horrela. "Argentinan 30 lagunetik gora aurkeztea espero dugu", azaldu dio EuskalKultura.com-i programaren koordinatzaile Kinku Zinkunegik. Horrez gain, Madrilen eta Bartzelonan ere egingo dira frogak, urtero legez. Hiru kasuetan matrikulazio epea datorren asteko asteazkenetik ostiralera izango da.
2012/04/13
San Luis probintzia argentinarrean, Villa Mercedeseko Euskal Etxeari atxikitako 'Camerata de la Luna' abesbatzak bi ekintza berezirekin hasi du 2012 ikasturte berria. Batetik eta euskal etxeko egoitzan, hilabete iraun duen ikastaro bat eskaini die abesbatzan sartu nahi zuten abeslari berriei. Bestalde, eta probintziako Hezkuntza Ministerioaren babesarekin, Pazko Kontzertua eskaini zuen joan den igandean, hiriko Santo Domingo Elizan. Emanaldia 2012ko zikloko lehena izan da eta Cameratakoez gain, Mendoza eta San Juan hirietako musikariek hartu zuten parte. Bestetik, arte tailerrak eta umeentzako kantu klaseak ere laster hasiko direla jakinarazi digute Villa Mercedeseko Euskal Etxea-ko arduradunek.
2012/04/12
Bidaiaren arrazoi nagusia pertsonala izan bada ere, 'Tasio' filmaren protagonistak euskal etxe batzuk bisitatzeko baliatu du Argentinara egin duen bidaia. Buenos Aires probintziako hiriak eta hiriburua bera ezagutzean, zuzenean egiaztatu ahal izan du Patxi Bisquertek hainbatetan entzundakoa, Argentinan euskal presentzia nonahi soma eta dasta daitekeela, alegia. Bere lehen aldia izan da baina ez dirudi azkena izango denik. Izan ere, "Pello Mari Otañori buruzko dokumental bat egiteko asmoa dut", azaldu dio EuskalKultura.com-i. "Proiektua nahiko bideratuta dago eta dena ondo ateratzen bada, aurten egingo dut", esan du Argentinan errodatzeko asmoa duen filmaz.
2012/04/12
Bartzelonako Euskal Etxeak ekimen berri bat jarri du abian aurten Literaldia 12 jaialdiaren barruan eta teknologia berriak erabiliz mundu osoko euskaltzaleen sormenari erronka bota dio. Batetik, #mikroipuina hasthtag-a erabiliz 140 karakteretan istorio txikiak idazteko gonbitea egin du; eta, bestetik, #ipuintzarra etiketarekin sarean ari dira ipuina sortzen, euskaraz biak. Elkartea katalanez ere ari da ekimena gauzatzen (#mikroconte eta #megaconte etiketekin). Atzo hasi ziren lehendabiziko txioak agertzen, parte har ezazu!
2012/04/12
Hasi zaizkigu heltzen munduko hainbat leku eta herrialdetako euskal etxeek Aberri Eguna kari eginiko ospakizunen informazio eta irudiak. Jarraian iragan igandean Txilen eta Venezuelan egin ziren bi festaren berri ekarri dugu, hurrenez hurren. Txilekoa, Santiagoko Gure Etorkia euskal elkarteak antolatua, San Cristobal muinoan dagoen Gernikako Arbolaren kimurainoko ibilaldia izan zen, bertan ekitaldi bat eta erromeria egiteko; Venezuelako Valencia-Naguanagua-n, berriz, Caraboboko Eusko Etxeak bazkide eta lagun andana bildu zuen bere instalazioetara, eguna famili giroan bizitzeko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
