euskal diaspora eta kultura
2012/04/26
1937ko apirilaren 26ean aire-armada naziko hegazkinek Gernika erasotu eta herria birrindu zuten. Bonbek eta suteek 126 hildako eragin zituzten. Harrezkero Gernikaren izena gerraren lazgarrikeriaren eta bakearen aldeko mugimenduen ikur bilakatu da; besteak beste, Picassoren "Guernica" margolanaren eraginagatik. 75. urteurrena betetzen den honetan, mezu hori zabaltzeko asmoarekin ekitaldi ugari egingo dira gaur eta inguruko egunetan munduko hainbat hiritan, batez ere euskal Diasporak presentzia duen lekuetan. Horietako bat izango da Mexiko hiria: gaur DFko Euskal Etxean bonbardaketari buruzko erakusketa inauguratuko du Julian Celaya Euskal Gizataldeekin Harremanetarako zuzendariak.
2012/04/26
Iaz lehendabizikoz egin zuten bat Boiseko euskaldunek Euskal Herrian AEKak antolatzen duen Korrika lasteketarekin. Bi urtean behin egiten da Korrika ofiziala, baina boisetarrek urteroko ekitaldi bihurtu dute euren lastekertatxoa, eta larunbat honetan berriz ere aterako dira hiriko kaleetan zehar arineketan. Ekitaldi garrantzitsua da hau Estatu Batuetako euskaldunentzat; izan ere, jarduera honen bidez lortzen duten dirua AEBetako euskara ikasleen trebakuntzan laguntzeko erabiltzen da. Hori dela eta, korrikalariei dei egiten die Ipar Amerikako euskal etxeetako Euskara koordinatzaile Izaskun Kortazarrek: animatu eta parte har ezazue!
2012/04/26
Urtero sasoin honetan antolatzen du Euskal Venezuelarren Elkarteko buru den Amaia Zenarutzabeitiak herrialde karibetar honetako euskaldunen Euskal Herriko urteroko bilera. Aurtengoa, 17.a, joan den larunbatean egin zen Galdakaon, eta hirurogeita hamarretik gora pertsona bildu zituen herriko Batzokiko jatetxean. Bertaratutakoek omenalditxoa eskaini zioten partaide zaharrenari, 88 urteko Amaia Renteriari, Bengoaren alarguna bera, 'eguzkilore' bat kolkoan ipinita. Bilerako gazteena, Julen Burgaña Elgezabal izan zen, bi gurasoak Venezuelan jaioak, bertara ama Kattalinekin agertu zena. Kantu venezuelarrik entzun zen bazkalostean, eta baita Txoria Txori ere.
2012/04/26
Estatu Batuetan ere izan zuen oihartzunik Aberri Egunerako deialdiak, nahiz eta Diasporako beste hainbat lekutan bezala, kasu askotan ez Berpizkunde igandean bertan, astebete edo bi aste ondoren baizik. Eman genuen zegokionean New Yorkeko aurtengo Aberri Egunaren berri, eta oraingo artikulu honetan beste hiru euskal etxe estatubatuar gehituko ditugu, argazkiak eta lekukotasuna bidali baitizkigute bertatik, Washington hiriburutik, Miamitik eta Las Vegasetik.
2012/04/26
Esker mila EuskalKultura.com-era munduko euskal etxeen Aberri Eguneko jaien irudiak eta kronikak bidaltzen ari zaretenoi. Apurka-apurka horien guztien berri ematen ari gara, eta, oraingoan, Venezuelako hiru euskal etxeetako ospakizunak bildu ditugu. Caracasetik, bertako Eusko Etxeak argitaratzen duen Jazoera buletina medio, hiriburuko, Valencia-Caraboboko eta Barcelona-Anzoateguiko jaien berri dakargu. Bidenabar, parada Jazoera zoriontzeko baliatu nahi dugu, bere lehenengo urtea bete berri baitu Pedro Arriaga Aguirre buru duen albistari digitalak. Indar eta taupada bereziz bizi izan dute historikoki Venezuelako euskaldunek euskal nazioa ospatu eta aldarrikatzea helburu duen Aberri Eguna.
2012/04/25
Poloniako Poznan hiriko Adam Mickiewicz Unibertsitatean udaberriko hitzordu klasikoa bihurtu dira jada Euskara eta Euskal Kultura irakurlegoak urtero antolatzen dituen Euskal Jardunaldiak. Aurtengoek Euskal Herritik etorritako lagunen ekarpen garrantzitsua izan dute; izan ere, Harkaitz Cano eta Rikardo Arregi idazleek eta Jabier Muguruza eta Mikel Azpiroz musikariek emanaldiak egin dituzte. Aipagarria da baita ere ikasleen parte hartzea, adibidez Sarrionandiaren "Hitzen Ondoeza" lanean oinarrituriko antzezlana taularatuz. Amaia Donés euskara irakurleak bidali dizkigu jarraian argitaratzen ditugun argazkiak. Milesker eta bejondaizuela!
2012/04/25
Oso oihartzun polita lortu duen proiektu interesgarri bat abiarazi zuen Misiones probintzia argentinarreko Corpus Christiko Eusko Etxeak orain hiru urte: literatur sormena lantzeko lehiaketa bat zen, eta parte hartzera luzatu zuten deialdiak 'ipuinak liluragarriak' izan behar izana zeukan berezitasun. Gonbiteak hain erantzun ona izan du geroztik Eusko Etxearen ikur ere bihurtu dela, erakunde honen kultur ekintzaren zeinu. Kari horretara, Corpusko Udalak 'Udal Interesekoa' izendatu berri du eta horri lotuta, bere sari bat ere eskainiko dio idazle irabazleari. 2012ko lehiaketari dagokionez, euskal etxetik jakinarazi digute gazteen kategoriako lanak bidaltzeko epea ekainaren 30era luzatu dela. Bitartean, uztailean burutuko duen Euskal Jai Handiaren antolakuntzan jo ta ke dihardute Corpus Christiko Eusko Etxeko lagunek.
2012/04/25
Hiru urte zituenean Jon Guarrotxena Limako Euskal Etxeko kideak Gernikako bonbardaketa ikusi zuen. Gertakari hark eta bere ondorioek eragin nabarmena izan zuten bere eta bere ingurukoen bizitzan eta bihar horri buruz mintzatuko da Euskaletxeak bonbardaketaren 75. urteurrena dela eta antolatu duen ekitaldian. Bestalde, Limako euskal elkarteak iragan igandean ospatu zuen Aberri Eguna, bazkari batekin eta Irizar apezpikuak eman zuen meza elizkizunarekin. Irizar Callaoko apezpikua izan da oraintsu arte eta aurten kargu honetan egindako 22 urteengatik omenaldi jendetsua egin zioten: 8.000 lagun bildu ziren ekitaldira.
2012/04/24
Euskal etxearen egoitza bukatzeko lanen azken txanpari ekin nahi diote Saladilloko euskal etxeko arduradunek. Kari horretara komunitate osoari eskatu diote laguntza, baina trukean sari batzuk emanez. Izan ere, eta aurreko urteetan egin duten legez, euskal erakundeak 200 pesoko bonoak kaleratu ditu pasa den astean eta bonoak erosten dituzten partaideek Euskal Herrira bidaiatzeko txartelak irabazteko aukera izango dute. Baliabideak biltzeko helburu berarekin, apirilaren 30ean ohiko ‘buseca’ salduko du Euskal Etxeak. Eraikina ordurako prest izango dutelakoan, 2013ko Mus Txapelketa Nazionalaren egoitza izan nahi dute Saladilloko euskaldunek.
2012/04/24
Asunciongo 'Jasone' Euskal Etxeak deia luzatu die bere bazkideei datorren ostegunean egingo duen Urteko Biltzar Nagusian parte har dezaten. Aurreko egunean, ostegunean, apirilak 26, Gernikako Bonbardaketaren 75. urteurrena gogoratuko du hiriko Gernikako Arbolaren monumentuaren aurrean gauzatuko duen lore eskaintzan, bertan egingo diren hitzetan data honek euskaldunentzat duen esangura berezia azpimarratuko delarik, ondoren hiriburuko Club Union delakoan sarraskia hizpide hartzeko Pedro Gamarra Doldan doktorearen eskutik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
