euskal diaspora eta kultura
2012/05/04
Manhattaneko txakolinzaleak irrikaz daude igandearen zain, Txikifest izeneko New Yorkeko Txakolin Azokaren bigarren edizioaz gozatzeko prest. Txikito euskal jatetxeak antolatzen du azoka; Bizkaiko, Arabako eta Gipuzkoako txakolindegien laguntzarekin eta Bizkaiko Foru Aldundiaren sostenguarekin. Horrez gain, hiriko zenbait jatetxek ere bat egin dute ekimenarekin eta zintzurra busti ostean sabela goxo-goxo betetzeko plater sorta bikaina prestatu dute. Eta dena, edaria eta janaria, musu-truk! Edo ia musu-truk: azokan sartzeko 45 dolarreko tiketa erosi behar da, baina ondoren egun osoan zehar nahi adina jan eta edan dezakete bisitariek. Gainera bertaratzen direnen artean Euskal Herrira bidaia zozketatuko da; zozketan bildutakoa New Yorkeko Euskal Etxeari laguntzeko erabiliko da.
2012/05/03
Euskaraz dakizu nahiz eta atzerrian jaioa zara? Eta ez dizu axola uda honetan Euskal Herrian festarik festa ibiltzea? Bada Pausokak emango dizu aukera. Ekoiztetxea udako euskal jaiei buruzko telebista saio bat ari da prestatzen eta atzerriko lau gazte euskaldun bila ari da, saioa aurkez dezaten. Gazte hauen lana euskal hiri eta herrietako jaietaz gozatzea litzateke, euren ikuspuntu eta lekukotasuna eskaintzea eta uda bukatzean jairik onena aukeratzea. Tentagarria, ezta?
2012/05/03
Jarduera ugari burutu ditu azken asteetan Madrilgo Euskal Etxeak, eta hasi berri dugun maiatz honetan ere baditu makina bat egitasmo martxan. Horien artean aipagarria da futbol arloko bat: 25ean Athletic-ek eta Bartzelonak Kopa finala jokatuko dute Espainiako hiriburuan, eta hori dela-eta euskal elkartea egitarau berezia ari da antolatzen. Hasteko, euskal musika talde batek kontzertua emango du arratsalde horretan euskal etxean eta ondoren partida telebista erraldoian ikusteko propio irekiko da egoitzako Pello Aranburu aretoa.
2012/05/03
Bere kaperaren akustika ederraz eta bertoko organo bereziaz baliaturik, aurten ere kontzertu ziklo berezia abiarazi da Buenos Aires hiriburuko Euskal Echea Institutuan. Aurreko edizioen haritik, maila handiko musikariak programaratu dira Sarandi kaleko elizan eta topaketei ez zaie euskal kutsua faltako, obren edo jotzaileen aldetik. Apirilean ‘Los ministriles’ taldea eta Ana Paula Segurola organistaz gozatu ondoren, erantzun bikainaz, hurrengo hitzordua datorren astean izango da, maiatzaren 11an Gabriela Navarro Landaverria eta Leonardo Petroni organo-jotzaileen eskutik, sarrera doan.
2012/05/03
Atzoko edizioan jakinarazi genuen bezala, Buenos Aires probintziako Junin herria izango da 2012ko Mus Txapelketa Nazionalaren egoitza. Hala ere, eta antolatzaileek plazaratu duten ohar berri baten haritik, bertaratu nahi dutenentzako prezioak errepikatuko ditugu, gaizki-ulerturik ekiditzeko. Partaidetzaren prezioa, lehiaketan parte hartuko duten euskal etxeen kasuan 800 dolarrekoa izango da, voucherra. Laguntzaileen voucherraren prezioa, berriz, 800 pesokoa. Gogoratu, erreserbak maiatzaren 10aren aurretik behar direla egin, data horretarako jende-kopurua behintzat adieraziz.
2012/05/03
La Platako Euzko Etxea euskal etxeak Urteko Biltzar Nagusia egin zuen apirilaren 22an, iragan urte honetako Zuzendaritza Batzordearen jarduna baietsiz eta elkarteko zenbait kargu berrituz, horien artean lehendakaria bera. Agintealdi berrirako, orain arte lehendakari zen Javier Clua epe berri baterako hautatu zuten eta, berarekin aritzeko, idazkari segituko du Maria Fernanda Astigarragak, batzordean lagun izango dituztela, besteak beste, Sergio Ochotorena, diruzain, eta Patricia Pulido, diruzainorde.
2012/05/02
Bigarren urtez jarraian, Euskadiko sormenak eta talentuak ohore puntua izango dute Bruselako Laburmetraien Jaialdian. Euskal ikus-entzunezko sektorea sustatzeko hitzordu bihurtu da dagoeneko, aurten XV. edizioa duen Bruselako zinemaldi hau. Euskal partaidetza, Euskadiko Talentu eta Kulturaren gaineko II. Europako Zikloaren jardueren barruan kokatzen du Jaurlaritzak; Etxepare Institutuak sustatu du ekimena Euskadiren Europar Batasunaren aurreko Ordezkaritzarekin, Euskadiko Filmategiarekin eta Donostia 2016 Europako Kultur Hiriburuarekin batera. Apirilaren 30eko saioaren ondoren, gaur, maiatzaren 2an, euskal laburmetraiak ikusteko bigarren aukera eskainiko du Jaialdiak, horretarako antolatutako emanaldi berezia medio.
2012/05/02
Buenos Aires probintziako Junin herria izango da 2012ko Mus Txapelketa Nazionalaren egoitza. Maiatzaren 25etik 27ra bilduko dira euskal etxeetako muslaririk onenak eta lehiaketatik aterako den bikote irabazlea Argentinako ordezkaria izango da irailean Kanadako Vancouver-en eta kruzero batean egingo den Mundu Txapelketan. Juningo saioak maiatzaren 25ean hasiko dira, ostiralez, ordezkaritzen ongi etorriarekin. Txapelketan parte hartzeko erreserbak maiatzaren 10era arte egin daitezke, eta Arbola Bat euskal etxetik jakinarazi dute muslarien nahiz laguntzaileen voucherren prezioa 800 pesokoa izango dela, baina ez dela beharrezkoa otordu eta ostatuaren pakete osoa erostea eta txartelak bereiz eros daitezkeela.2012/05/02
Hasi berria dute Barilocheko Mendiko Euzko Etxeko dantzariek 2012. urteari dagokion entsaio-sorta. Fermina Fernandez zuzendari, dantza klaseak Las Chacras kaleko egoitzan egiten dira, eta bi taldetan banatuta hogeitik gora neska-mutil aritzen dira. “Urtero Barilocheko Kolektibitateen Jaian stand bat muntatu eta gure dantzak aurkezten ditugu. Horrez gain, taberna batzuk antolatzen ditugu dirua bildu eta Euskal Astera bidaiatu ahal izateko. Gerora begira ez dugu beste ekitaldirik antolatzeko ideia baztertzen, gure euskal etxea ezagutarazteko bide egokia baita”, adierazi diote euskal etxeko arduradunek zein dantzariek EuskalKultura.com-i.
2012/05/01
Chascomuseko 'Zingirako Euskaldunak' euskal etxeak oharra plazaratu du gogoratu eta goraipatzeko duela 60 urte, 1952ko apirilean, Buenos Aires probintzia argentinarreko herri honetan Euskal-Argentinar Etxea sortu zutenak, ikusmen luzea izan baitzuten jatorri euskalduneko biztanlego handia duen partidu honetan euskal ondarea zaindu eta iraunarazteko elkarte bat sortu eta egungo euskal etxearen aurrekari eta jarraipide dena finkatzeko. Euskaldunek, ordurarte, pilota elkarte bat sortua zuten, 1925ean, herrian, egun ere segitzen duena, baina fundazio berriarekin urrats garrantzitsua eman zuten euskaldun gisa euren burua gorde eta lantzeko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
