euskal diaspora eta kultura
2012/05/18
Euskal gaiek leku nabarmena izango dute datozen egunetan Kaliforniako unibertsitateetan, estatu honetako zenbait gunetan ematen diren Euskara eta Euskal Kultura ikastaroek sortutako interesari esker. Batetik, bihar bertan euskal literatura eta irudiak izango dituzte hizpide Bakersfield-eko Unibertsitatean. Bestetik, datorren ostegunean euskal kulturak tartetxoa izango du Santa Barbara Unibertsitatean, Noka talde euskal amerikarrak kontzertua emango baitu eta Diana Palenzuela Euskara irakurleak hitzaldia emango.
2012/05/18
Bakearen eta Askatasunaren aldeko Kulturen Urtearen baitan Bilbon ari da egiten egunero iragan astelehenetik datorren igandera bitartean Oroimenari eta Bizkidetzari buruzko Biltzarra, "balore etiko eta demokratikoetan sostengua duen gizarte berri baten oinarriak finkatzen" lagungarri izan nahi duen ekimen bat, "geroa, iragana ahaztu gabe" eraikitzen laguntzeko, " izukeriaren eta askatasun gabeziaren erasoa jasan duten pertsonen oroimena" bilduz eta aztertuz, horretarako, inguru hurbil eta urruneko beste esperientzia batzuk eta "indarkeria deslegitimatzeko eta bizikidetza sendotzeko" proposamenak mahaigaineratuz.
2012/05/18
Ehundik gora lagun bildu ziren joan den larunbatean, maiatzaren 12an, Trenque Lauquengo Euskal Sustraiak euskal etxeko egoitzan instituzioaren urtebetetzea ospatze aldera. Buenos Aires probintziako herri honetan euskal kultura zabaltzen hamalau urte daramatzan euskal etxeak arrazoi anitz ditu pozik eta uros ospatzeko. Izan ere, Euskal Herriaren ordezkari bihurtu da erakundea bai hirian bai eskualdeko beste hainbat tokitan ere eta gero eta presentzia handiagoa du komunitatearen ekitaldietan. Ber denboran, proiektu bat baino gehiagorekin eutsi dio euskal etxeak urte berriari; tartean, hobekuntzak egingo ditu egoitzan eta herriko eskoletaraino hurbiltzeko lehiaketa bat antolatuko du. Hori, euskara eta dantza klaseei eutsiz, Koky Brua eta Alejandra Bengochearen eskutik.
2012/05/17
Amaitu da Literaldia 2012 eta Bartzelonako Euskal Etxeak balioespen oso baikorraegin du euskal literatura Kataluniaraino ekartzea helburu duen jaialdiaz. Ez hori bakarrik, aurtengoan jaialdiak sare sozialen bitartez mundu zabaleko literaturzaleengana ere heltzea lortu du, eta antolatzaileak pozik agertu dira Twitter bidezko literatur lehiaketen arrakasta dela eta. Mikroipuin lehiaketan ehundik gora narrazio labur bildu dira, euskaraz eta katalanez, eta Makroipuinaren harian ere makina bat lagun aritu izan dira istorioa idazten.
2012/05/17
Dina Rivera margolari argentinarraren eskutik helduko dira Buenos Airesera Jose Angel Irigaray olerkari nafarraren euskarazko poemak. Olerkiek “egile liburu” txikiak osatzen dituzte, eta eskuz idatziak dira. Erakusketako parte dira eta pintore argentinarraren irudien muina islatzen dute. Datorren astelehenean, maiatzaren 21ean, 'Trazu ibiltariak' izenpean inauguratuko den pintura erakusketan aurkeztuko dira. Lanak ekainaren 4a arte egongo dira ikusgai NES Zona 54 Arte Galerian, Piedras kaleko 182an, Buenos Aires hiriburuan.
2012/05/16
Uruguaiko Ordezkarien Ganberak ezohiko saio bat egingo du gaur, aurten Mendeurrena ospatzen ari den Montevideoko 'Euskal Erria' Euskal Etxearen gorazarre. Ekitaldi horretan, Jose Andres Arocena diputatu nazionalak eskatuko du hitza, euskaldunek Uruguaiko historian zehar utzi duten arrastoa eta gaur egun ere egiten duten ekarpena aipatuz, ekarpen horren adierazle Euskal Erria Euskal Etxea bera. Uruguaira XIX. mendearen lehenengo erdian iritsi ziren Goizuetako nafarren ondorengo den Arocenak euskal emigranteek bertan ereindako baloreak aipatuko ditu, EuskalKultura.com-i adierazi dionez, beste hainbat uruguaitar bezala harro baitago arbasoengandik jasotako oinordetzaz. Bestalde, Uruguaiko Posta Zerbitzu Nazionalak euskal mendeurren honi eskainitako seilua aurkeztuko du ostiral honetan Montevideon, Euskal Erriaren San Jose 1168ko egoitzan egingo den beste ekitaldi batean.
2012/05/16
'Jarraitu eta hazi', lelo horrekin ospatu zuen Limako Euskal Etxeak Aberri Eguna iragan apirilaren 22an. Ekitaldiak meza elizkizun batekin hasi ziren eta Perun oso ezaguna den euskaldun bat izan zen gidaria: Miguel Irizar, Callaoko apezpikua azken 22 urtetan. Ondoren, elkarteko kide eta lagun asko bildu ziren euskal etxean egin zen bazkarira. Elkarteko presidente Raul Noblecillak gogoan izan zituen aurreko zuzendaritzak eta eskerrak eman zizkien bertan parte hartu zuten gazteei, euskararen eta euskal kulturaren aldeko apustuaren lekukoa hartzeagatik.
2012/05/16
Lehenengo klasea datorren larunbatean izango da, arratsaldeko 4etatik 6etara eta elkarretaratzean parte hartzeko ez da aldez aurretik ezer jakin behar. Eskolak Marina Aranguren irakaslearen ardurapean egingo dira eta hileroko maitasuna izango dute. Euskara tailerra San Miguel-go Askatasunaren Bidea elkarteak aurten burutuko dituen ekintzetako bat da. Horrez gain, solasaldiak, sukaldaritza topaketak, Euskal Herria ezagutzeko hitzaldiak eta komunitateari begirako standak antolatuko ditu “Euskal Herriko kulturaren euskarri eraginkor eta kreatzailea” eskaini nahi dion Buenos Aires probintziako euskal elkarte honek.
2012/05/16
Eskabidea Estatu Batuetatik etorri da. NABOko Euskara koordinatzaile den Izaskun Kortazarrek Boisetik idatzi digu esanez leku bat dagoela libre uztailean Euskal Herrian antolatu duten barnetegian. 2. Mailako ikasleentzat da eta zazpi ikasle dauzkate dagoeneko eta zortzigarrena behar dute barnetegia gauzatzeko gutxieneko partaide kopurua lortzearren. Interesatuta bazaude edo hala egon daitekeen inor ezagutzen baduzu, idatzi artikulu honetara ekarri ditugun helbideetara. Aukera polita izan daiteke Diasporako ikaskideekin kontaktatzeko edota, euskararekin batera, zeure ingelesa ere praktikatzeko.
2012/05/15
Argentinako Arrecifestik, bertako Euskaldunak Denak Bat Euskal Etxeko eta aldo berean FEVAko idazkaria den Marta Abarrateguik idazten digu gogora ekartzeko gaur bezalako egun batean, 2007ko maiatzaren 15ean, Adalberto Pedro Loyola, urte askotan Arrecifesko txistularia eta bertako eta Argentina osoko bizpahiru belaunaldirentzat euskal erreferente bat izan zena hil zela. Amelia Irigoyenekin ezkondua, ez zuten seme-alabarik izan, baina zendu zenean umezurtz utzi zituen euskal etxeko eta euskal gizataldeko hainbat eta hainbat jende. Potxolo gogoan, Euskaldunak Denak Bat-ek maiatzaren 15a nazioarte mailan 'Txistulariaren Eguna' ospatzeko deia berretsi du.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
