euskalkultura.eus

New York, AEB.  Iker Ortiz de Zarate gasteiztarrak Oscar Wilde-n 'De profundis' bakarrizketa antzeztuko du etzi New Yorkeko Cervantes Institutuaren egoitzan. Antzezlanak gutun bat du oinarri, Wildek Lord Alfred Douglas maitaleari idatzi zion gutuna, Readingeko gartzelatik 1897an. Bi urte eman zituen bertan Wildek, homosexualitate eta sodomia delituengatik eta gartzelaldia hain izan zen gogorra betirako aldatu zuela Wilden izaera eta osasuna. Gutuna idazle irlandarraren heriotzaren ondoren argitaratu zuten (bertsio laburtu bat baino ez), eta idazki osoa 1960a arte ezin izan zuten plazaratu.

"Wilde idazle magikoa da eta nire haurtzaroan eragin handia izan zuen 'Printze zoriontsua' bezalako ipuinekin. 'De profundis' hausnarketa pertsonal bat da, fikzionatu gabea, bere bizitzari buruz, maitasunari buruz, itxurakeriari buruz, gorenena eta makurrenari buruz...", azaldu dio Ortiz de Zaratek EuskalKultura.com-i. "Eta, edozein antzezpen zaila bada, honek erronka bereziak sortzen ditu; prestakuntzan beldurra sentiarazi didatenak, eta, antzezpenean, ohi baino erantzukizun handiagoa". 

Sarrerak agortuta

Ortiz de Zaratek iragan irailean aurkeztu zuen antzezlana Gasteizen, arrakasta handiz. Hamabost emankizun egin ostean (askotan sarrerak agortuta, gainera), abenduan berriz ere taularatu egin behar izan zuten bakarrizketa. "Erantzuna berealdikoa da beti eta soberan ordaintzen du antzezlanak suposatzen duen ahalegina (handia)", baieztatzen du aktoreak. Ikuskizuna Euskal Dantza eta Antzerki Konpainiaren eta Ortzai Antzerki Laborategiaren lana da.

New Yorkeko emanaldia larunbatean Cervantes Institutuaren egoitzan (211-215 East 49th Street) izango da, arratsaldeko lauetan. Sarrera doan da eta emankizuna gaztelania hutsean egingo da. "Momentuz, New Yorkeko Cervanteseko emanaldi hau bakarrik dago konfirmatuta, baina badakit proiektuaren zuzendari artistikoa, Isabel Irigoyen, eta AEBetako arduraduna, Deborah Berman-Shaw, beste emanaldi batzuk konfirmatzeko zain daudela".