euskalkultura.eus

Santa Fe, Mexiko.  Santa Fe-ko Unibertsitate Iberoamerikarrak euskal arte eta kultura erakustaldia eskainiko die ikasle eta bisitariei datorren astelehenetik aitzina. Euskal Kultur Aste honen bidez egungo Euskal Herriko arlo desberdinak ezagutu ahal izango dituzte mexikarrek, hala nola, artea, gastronomia, literatura edo enpresa mundua.

Ekitaldiak datorren astelehenean abiatuko dira, Kimuak programako laburmetraien emanaldiarekin. Hurrengo egunean, maiatzaren 3an, Mikel Alonso sukaldari irundarrak 'euskal sukaldaritza berria' delakoaren erakustaldia egingo du (Alonso Mexiko DFko Biko jatetxeko chef-a da). Ondoren, Euskal Astearen inaugurazio ekitaldi ofiziala egingo da, Gorka Larrañaga artistaren erakusketaren aurkezpenarekin.

Eguerdian euskal arte garaikideari buruz mahaingurua egingo dute Iñigo Manterola, Tasio Ardanaz eta Gorka Larrañaga sortzaileek eta, azkenik, arratsaldeko 14:30etatik aurrera, Jose Sanchez Villaseñor auditorium-eko plazan salgai  izango dira euskal gastronomia produktuak eta ikusgai 'Euskara Mundiala' kanpaina bezalako zenbait kultur produktu.

Asteazkenean, maiatzaren 4ean, euskal enpresa munduari buruzko hitzaldiak izango dira entzungai goizez, eta arratsaldean Joseba Buj idazleak 'De nuestra sola incumbencia' liburua aurkeztuko du. Euskal Asteari amaiera emanez, ostegunean gastronomia erakustaldia egingo du Sukalde elkarte mexikarrak eta Iñigo Aranbarri idazleak euskal literatura klase magistrala emango du.

Euskal Kultur Asteari buruzko informazio gehiago, Fecebook-eko orri honetan.