euskalkultura.eus

Madril, Espainia. Arrakasta handia izan du Madrilgo Euskal Etxearen "Euskara Ikasleen 1go Film Laburren lahiaketa"k. Handia eta ezustekoa; izan ere, hasieran Bartzelonako Euskal Etxeak urtero antolatzen duen lehiaketarako filma egitea zen asmoa. Bertan parte hartzeko, Madrileko Euskal Etxeko euskara irakasleek,  labur bat egitera animatu zituzten beren ikasleak. Baina erantzuna hain izan zen ona --11 lan!-- ezen Madrilen bertan leihaketa propioa egitea erabaki zutela.

Apirilaren 4an egin zen lehenengo pasea eta 11 film labur proiektatu ziren Madrilgo Euskal Etxeko Pello Aranburu aretoan. Honako hauek izan ziren aurkeztutako lanak:

- Pintxamus?, 1.go mailako ikasleek egina
- Euskararen koloreak, 3 mailakoek.
- Irauten,  2. mailakoek
- Sin pagatzen, 1 mailakoek
- Maite ditugu, 6 mailakoek
- Euskalbollywood, 4 mailakoek
- Pixka bat gehiago, 5. mailakoek
- Hizkuntza ulertezina, 3. mailakoek
- Klasean, 4. mailakoek
- Hau kaxualitatea, 1. mailakoek
- Txarto edo txarra?, 3. mailakoek.

Euskaltegiko ikasle eta publikoaren artean bost finalistak aukeratu zituzten: "Irauten", "Euskalbollywood", "Hizkuntza ulertezina", "Klasean" eta "Txarto edo txarra". Larunbatean, apirilaren 6an, egin zen irabazlea hautatzeko pasea eta sari banaketa. Epaimahaia Gorka Otxoa eta Ramon Ibarra aktoreek eta Kinku Zinkunegi HABEko teknikariak osatu zuten. Azkenean, "Euskalbollywood" izan zen irabazlea. Saria, talde osoarentzat bazkari edo afaria.

Hauxe da irabazlea:

[Euskara Txokoko ikasle txikiek ere saria jaso zuten: opari bana (argazkia MadrilEE/HABE)]

Europa mailan datorren urtean

HABEko Euskara Munduan programako iturriek azaldu dutenez, Euskal Etxeetako euskarazko eskoletan berebiziko garrantzia du, hizkuntzarentzat nahiko arrotzak diren testuinguruetan, berau erabiltzeko esparruak eskaintzea. Euskal Etxeetako euskara taldeek hainbat ekintza antolatzen dituzte urtean zehar, batetik, ikasleek hizkuntza erabiltzeko aukera izan dezaten eta, bestetik, euskara ikasgeletatik atera eta ikusgarri egiteko. Ekintza horien artean, arrakasta handia izan du Bartzelonako euskal etxeak azken bederatzi urteetan antolatu duen "euskara ikasleen laburmetraia leihaketak" eta, orain, baita Madrilgoak ere.

Hori dela eta HABEk esperientzia hau beste euskal etxe batzuetara zabaltzeko ahalegina egingo du eta datorren urtean lehiaketa Europa mailan, zenbait herrialdetako euskal etxeetako ikasleen lanekin egitea hausnartzen ari dira.