euskalkultura.eus

Madril, Espainia.  Abenduaren 3an Madrilgo Euskal Etxeko euskara ikasle eta irakasleek zenbait jarduera antolatu zituzten Euskararen Nazioarteko Eguna ospatzeko. Jaiak euskal etxeko kideak eta partikularzki Madrilen euskara ikasle eta irakasle diren jende multzoa bildu zituen, elkarrekin egun polita igarotzeko, txalaparta, euskal dantza eta bertsolaritza lantegietan parte hartuz.

[Txalaparta lantegia Madrilgo Euskal Etxeko euskara ikasle eta irakasleek antolatu zuten Euskararen Eguneko jaian (argazkia MadrilEE)]

Jaiari bukaera biribila emanez lagunarteko afaria egin zen elkartearen txokoan eta bertaratu zirenek euskera klaseetan ikasitakoa eta euren ahotsak erakusteko aukera izan zuten, euskal kantuak abestuz, elkarteko euskara irakasle Ane Bastidak EuskalKultura.com-i azaldu dionez. Afaria bukatzeko partehartzaileek omenaldi txiki baina beroa egin zioten berriki hil den Mikel Laboa kantariari.

 [Bertsolaritzak ere lekua izan zuen Madrileko Euskal Etxean Euskararen Eguneko jaian, beste lantegi batekin (argazkia MadrilEE)]

Madrilgo Euskal Etxeak ekitaldi eta jarduera erritmo biziarekin jarraitzen du, eta bat bukatu  orduko, hurrengoa prestatzen ari dira jada: 'Laister San Tomas ospatuko dugu! Gonbidatuak zaudete ardo eta txistorra dastatzera!', gonbitea egiten du Bastidak. Izan ere, urtero legez Euskal Etxeak ateak irekiko ditu abenduaren 21ean Santo Tomas eguneko txistorrada egiteko: txistorra, ogitartekoa eta ardoa bertaratzen diren lagun guztientzako!

[Gustura eta gogotsu aritu ziren kantuan Madrilgo Euskal Etxeko kideak Euskararen Eguneko Jaian (argazkia MadrilEE)]

LOTURA INTERESGARRIAK

-Madrilgo Euskal Etxearen webgunea, hemen
-Madrilgo Euskaltzaleen bloga, hemen