euskalkultura.eus

Cordoba, Argentina. Hainbat erakunde eta kolektibitate atzerritarrekin batera, Cordobako Gure Txokoa-ko ordezkariek ere hartu zuten parte Independentziaren egunaren 196. urtemugako hiriburu probintzialeko kabalkadan. Ekimenean euskal partaidetza sendotzeko, eta euskal etxe anfitrioiak gonbidaturik, Villa Mariako Euzko Etxea-ko gazteek ere eraman zuten ikurrina Cordobako hiriburuko kaleetan.

Desfilea autobus geltoki berritik ‘24 de septiembre’ izeneko zubira luzatu zen, milaka pertsonaren aurrean, tartean hiriko eta probintziako agintariak. Izan ere, Gure Txokoa euskal etxeko Aletxu Lamayer dantzariak Aurreskua dantzatu zuen Jose Manuel de la Sota gobernadorearen eta Ramon Mestre alkatearen aurrean. “Berriro ere begi bistan geratu da de la Sota gobernadoreak gurekin duen harreman estua. Guk eskuratu genion zapi gorria, berehala jantzi zuen lepoan”, azaldu diote EuskalKultura.com-i. euskal etxetik

Bestela, eta ospakizunekin jarraitzeko, joan den igandean, uztailaren 15ean, San Fermin bazkaria burutu zuten Gure Txokoa-ko lagunek. Eguerdi aldera elkartu ziren euskal etxeko kideak paella gozo gozo bat elkarrekin banatzeko. Bazkarian zehar, euskal dantzek eta musikak Colon etorbideko Gure Txokoa-ko aretoa alaitu zuten.

Sanferminetako ospakizuna bukatuta, lan handi bati ekingo diote Cordobako euskal etxeko dantzariek Euskal Aste Nazionalera joateko dirua biltzeko asmoz. Hilabetean behin elkarretaratze bat egingo dute, esaterako bingoak edota janari salmentak. Bitartean, astero entseatzen dute, larunbat arratsaldean, pentsamentua Rosarioko Euskal Astean ipinita.