euskalkultura.eus

Alta Gracia, Argentina. Cordobatarrak dantza taldeak erakustaldia eman zuen Argentinako garrantzitsuenetakoa den Alta Graciako Gizataldeen Azokan. Aurtengo edizioak "Todo el Mundo en Alta Gracia” (Mundu guztia Alta Gracian) izenburua zuen eta otsailaren 1etik 6era egin zen, 'gau estra' batekin otsailaren 7an, astelehenean. Alta Gracian dantzari taldea eta Gure Txokoako ordezkaritza bat izan ziren eta eurekin batera Patagoniako Santa Cruz Probintziako hiriburuko 'Hegoalde Argentinarra' euskal etxeko lagun batzuk ere bai.

"30.000 ikuslek baino gehiagok" ikusi zuten Gure Txokoa-ko dantzariek azokako agertoki nagusian eman zuten gaueko erakustaldia, elkarteko arduradunek azaldu dutenez. Izan ere, gau hartan azokaren bisitarien markarik onenak hautsi zituzten. “¡Todo el Mundo en Alta Gracia!  aldarrikatzen duen jai hau Argentinako gizataldeen ekitaldirik nagusiena da", azpimarratu zuen Gure Txokoa-ko presidente Alejo Martinek.

[Alta Graciako bigarren agertokian ere erakustaldia eskaini zuten Cordobatarrak taldeko dantzariek (argazkia CordobaGureTxokoaEE)]

[Alejandro Lamayer, Jorge Mirinigo, Maite Luján, Valeria Corres, Analía Quiroga, Valentín Ferreira Yanzi, María Victoria Arizmendi eta Rosío Mehlhose dira aritu ziren Cordobatarrak taldeko kide eta lagunak (argazkia CordobaGureTxokoaEE)]

Agertoki nagusian egin zuten emanaldia Argentinako telebista publiko nazionalean izan zen zuzenean ikusgai. Ondoren, Gure Txokoa elkarteko dantzariek bigarren erakustaldi bat eskaini zuten, 2. agertokian, eta han ere txalo zaparrada jaso zuten.

“Ospea ematen digun ekitaldi bat da hau, eta honen bidez saritu egiten da gazte hauek euskal kulturaren baloreen zabalkundean egiten duten ahalegina. Gure elkartearen proiektuaren parte dira balore horiek", adierazi du aurkezpenaren harira Alejo Martinek.

Gure Txokoa-ko arduradunen esanetan, emanaldi hau ekimenez jositako urte baten hasiera baino ez da: "birak, euskara ikastaroak, erakusketak, euskal zinema zikloa eta euskal etxea handitzeko lanak" izango dira egitasmo horietariko batzuk. Elkarteak bisitariak hartzeko instalazioak gehituko dizkio egoitzari. [Ikusle marka guztiak hautsi zituzten euskal taldeak Alta Graciako azokan erakustaldia egin zueneko gauan (argazkia CordabaGureTxokoaEE)]