euskalkultura.eus

euskal diaspora eta kultura

Albisteak rss

Bodarin, flamenkoa eta euskal dantza uztartzen dituen ikusgarria, Bordelera ekarri du Eskualdunen Biltzarra EEak

2011/11/24

Bodarin ikusgarriaren irudi bat
Bodarin ikusgarriaren irudi bat

PUBLIZITATEA

Anaigazteak dantza konpainiak sortu duen 'Bodarin' ikusgarria erantzun ezinhobea ari da jasotzen, flamenkoa eta euskal dantza lotzen dituen apustu ausartari esker. Cristian Larralde dantzariak eta Maiana Coronado flamenko koreografoak zuzendua, ikusgarri honetan euskal dantzarien eta 'bailaore'en arteko sedukzio jolasa sortzen da; sorginkeria, bideo-emanaldi eta lapurtar Maskarada artean. Heldu den larunbatean Bordelen aurkeztuko dute, Eskualdunen Biltzarra Euskal Etxearen eta Euskal Kultur Erakundearen laguntzarekin, besteak beste.

Bordele, Frantzia. Etzi, azaroaren 26an, Bordeleko 'L'Entrepot' antzokian izango da Anaigazteak talde lapurtarraren 'Bodarin' dantza ikuskizuna. Euskal dantzaren sustraiak mantenduz, berau berriztatzen eta beste dantza estiloetara irekitzen saiatzen da taldea; eta ahalegin horren ondorioa da euskal dantza eta flamenkoa uztartzen dituen 'Bodarin' hau. Anaigazteak-en aldetik Cristian Larraldek zuzentzen du ikuskizuna, eta Maiana Coronado flamenko dantzari eta koreografoaren ekarpena dira bailaor taldearen pauso eta koreografiak.

Hogeita bost dantzarik parte hartzen duten ikuskizunean eta, proposamenaren euskal eta flamenko dantzarien arteko sedukzioa gakoa bada ere, Maskarada, bideo-emanaldiak, sorginak eta beste elementu asko uztartzen dira.

bodarin1

[Maskarada eta fandangoa (argazkia Anaigazteak)]

bodarin2

[Flamenko dantzariak Bodarin ikusgarriaren emanaldi batean (argazkia Anaigazteak)]

Afaria dantzariekin

Euskaldunen Biltzarra euskal etxeak eta Euskal Kultur Erakundeak lagunduta dator ikuskizuna Bordelera, eta hemen Les Alis de la Pelote Basque du Haillan elkartearen, Haillango Udalaren eta France Bleu Gironde-ren sostengua du. Bordeleko aurtengo euskal gertakaria izango dela uste dute Euskal Etxeko arduradunek, eta giro ederra izatea espero dute, ikuskizunaren ostean lagunarteko afari bat ere antolatu baita. Afaria Les Amis de la Pelote Basque du Haillan elkarteak antolatu du eta bertan konpainiako dantzariak ezagutzeko aukera izango da.

Ikuskizunerako edo ikuskizunerako eta afarirako sarrerak aldez aurretik erreserbatu behar dira. Horretarako jarri harremanetan Bordeleko Euskal Etxearekin, e-maila bidaliz hona edo 06 48 20 20 97 telefonora deituz.

-Anaigazteak taldearen webgunea, hemen
-Bordeleko Eskual Etxearen webgunea, hemen



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia