euskal diaspora eta kultura
2010/01/28
Bogotako Euskal Etxetik aditzera eman dutenez, euskal erakundeko zenbait kidek modu berezian ospatu zuten urtarrilaren 6an Errege Eguna, karia horretara Ciudad Bolivar-ko auzoetara joan eta opariak banatu baitzituzten baliapide gutxiko familietako haurren artean. Txotxongilo bidez gabonetako ipuin bat antzeztu eta Errege Magoen festa zertan datzan azaldu zuten eta, bazkaldu eta gero, opariak banatu zituzten 'euskal moldean', diote. Bestalde, eta Euskal Etxe berean, Euskara klaseak joan den larunbatean hasi ziren berriz ere, Asier Bilbao Salazar irakasle eta 35 bat ikaslerekin. Ines Bermudez eta Alejandro Ricaurte gazteak izan dira Kolonbiako ordezkariak Montevideoko barnetegian.
2010/01/27
Ez daude Euskal Herritik urrun eta kasuren batean, hala nola Pauekoan, 'juxtu aldamenean'. Urtean zehar hainbat ekimen garatzen dituzte, izan ere euren egoitza daukaten hirietan 'betidanik' egon baita Euskal Herriaren eta euskal kulturaren zimikoa barnean sentitu izan duen euskal komunitate zabala. Frantziako euskal etxeei buruz ari gara, horietarik hiru, Paris, Bordele eta Pauekoa, Eusko Jaurlaritzaren erregistroan daudela. Pauekoa, joan den abenduaren 9tik. Hirurak jaso zuten joan den azaroan Jaurlaritzako ordezkari batzuen bisita, Julian Celaya Kanpoko Euskal Herritarrentzako eta Gizataldeentzako zuzendaria buru, eta Benan Oregi eta Andoni Martin teknikariak laguntzaile.
2010/01/27
Damian Cebey epaileak segitzen du izaten Buenos Aires probintziako San Nicolas de los Arroyos herriko Euskal Etxeko lehendakari, euskal elkarte horrek abenduan eginiko Urteko Batzar Nagusia eta gero. 2005ean hautatu zuten lehenengo aldiz ordura arte lehendakariorde zen Cebey eta geroztik urtero berritu diote konfidantza San Nicolaseko euskal etxeko bazkideek. Berarekin batera arituko dira Zuzendaritza Batzordean, besteak beste: Manuel Eugenio Brogliatti, lehendakariorde; Marcelo Gabriel Barrangu, idazkari; Maria de los Angeles Domenech, idazkariorde; Maria Francisca Aramburu de de Cara, agirietako idazkari; Maria Teresa Aramburu, diruzain; eta Ana Maria Erausquin, diruzainorde.
2010/01/26
"Lopez-en Jaurlaritzako Kanpo Harremanetarako idazkaritzak argi ikusten du. Euskadi autonomia erkidego bat da, ez estatu bat. Beraz bere lanak kanpoan bere interes ekonomikoak defenditzea baino ez du izan behar. Ikusmolde honek gidatzen du buru duen Guillermo Echeniqueren egitekoa". Hitz hauekin hasten du Noticias taldeko Marta Martin kazetariak Eusko Jaurlaritzako Kanpo Harremanetarako idazkari nagusiarekin joan den igandean igandean argitaratu zuen elkarrizketa.
2010/01/26
Datorren astelehenean, otsailaren 1ean, hasiko da Buenos Airesko Sarandi kaleko Euskal Echea Ikastetxean Argentinako Euskal Unibertsitateko 2010eko edizioa. Joan den urtean eginiko lehenengo esperientziaren ondotik, antolatzaileak bigarren edizioari eutsi diote, orain artekoa sendotu eta ildo honi jarraituz bide luzea gelditzen dela pentsatzen baitute, Enrique Aramburu koordinatzaileak EuskalKultura.com-i adierazi dionez. Izena emateko epea bulatutakoan ziento erdi bat ikasle bilduko dela pentsatzen da, Argentinako zenbait lekutatik etorriak, Buenos Aires hiriburutik eta ingurutik gehienbat, baina nazioko beste probintzia batzuetatik ere, orain arteko datuak argitzen dutenez. Ikasleek "Euskaldunen ibilbidea eta kultura" ikastaroa segitu ahal izango dute bi astez, edo astebeteko beste ikastaro batzuk, hala nola euskal etnologia, geografia, musika, dantzaz eta abar. Irakasleak, gai bakoitzean adituak dira, baitetsi du Aramburuk.
2010/01/26
Urtero bezala, Txileko Santiagoko Euzko Etxeak urte osoko balantzea eginez bukatu du abenduan urtea, eta udako opor aurreko azken ekitaldiak eginez, tartean elkarteko Bazkideen Biltzar Nagusia. Vicuña Mackennako euskal egoitzatik, bertako 'Berriketari' buletinak urteko bere azkeneko kronika bidaltzen zuen, 2009ko abenduko alearen barnean, bi hilabeteko bakantzak hartu eta martxoan, indarberriturik, berriz agertzeko. Hona Maria Angelica Carrasco eta Ignacio Bastarrica senar-emazteek argitara ematen duten buletin hortarik atera dugun testua.
2010/01/25
Euskadik hartu du bere gain AEMIk --migrazioa ikergai edo langai daukaten elkarte eta erakunde europarren batasunak-- datorren irailean egingo duen Urteroko Bilkura antolatzeko ardura. Aipatu elkarte edo erakunde hauek gehienetan nazio edo gizatalde bakoitzeko museoak edo ikerketa etxeak badira ere, euskal kasuan Eusko Jaurlaritzako 'Kanpoan diren Euskal Herritarrentzako eta Gizataldeentzako Zuzendaritza' eta Kanpo Harremanetarako Idazkaritza Nagusia dira euskal ordezkariak. "Migrazio Azterketak eta Informazio eta Komunikazio Teknologiak (IKT)" da Bilkurak mintzagai hautatu duena irailaren 29tik urriaren 2-3ra luzatuko diren saioetan. Halaxe azaltzen du ingelesez, euskaraz eta gaztelaniaz dagoeneko banatu den Bilkurako lehenengo oharrak.
2010/01/25
Iñake Perugorria soziologo argentinarra tesia ari da prestatzen Bilboko Aste Nagusiaz, AEBetako Rutgers New Jerseyko Estatu Unibertsitatean aurkezteko. Nafarroako Beratik Sarara pasa eta handik Uruguai eta Argentinarra emigratu zuten euskaldunen ondorengo den 33 urteko emakume hau UBAn (Universidad de Buenos Aires) lizentziatu zen Soziologian eta 15 urte zituela bisitatu zuen lehenengoz 'in situ' bere familian --bere izen tipiari besterik ez zaio erreparatu behar-- hain presente egon den Euskal Herria eta euskal kultura. 2008an, Rutgers Unibertsitatean doktorego ikasketak egiten ari zela, Algortako lagun bat bisitatu eta Bilboko Aste Nagusia ezagutu zuen. Festaren 'izaera irekiak' harritu zuen eta orain gai horixe hautatu du bere tesirako, 2012an AEBetan aurkezteko.
2010/01/25
Bizkaiko Foru Aldundia lanean legoke New Yorken Bizkaiko sukaldaritzaren eta oro har Bizkaiko aberastasun turistiko, gastronomiko eta naturalen erakusgarri izan daitekeen euskal jatetxe edo zentro bat zabaltzeko asmoaren inguruan. Halaxe zioen atzokoan Deia egunkariak, Bizkaiko Foru Aldundiko Turismo departamentuko iturriak aipatuz, AEBetako tour-operadore, sukaldari eta gastronomi kritikari talde batekin hil honen 16tik eta gaur arte Bizkaian zehar egiten aritu diren bidaiaren amaieran. Kalitatezko euskal jatetxe bat, sinergiak baliatzearren nolabaiteko loturarekin Euskal Etxearekin, New Yorkeko euskal komunitatean aspalditik elikatu izan den ametsa da. Artikuluak ez du Eusko Etxea aipatzen, baina bai euskal jatetxe hori irekitzeko orain zabaltzen ari den posibilitatea.
2010/01/22
Estatu Batuetako euskal etxeetan euskara ematen ari diren irakasleak, horretarako NABOk (euskal elkarteen federazio iparramerikarra), HABEk (helduei euskara irakasteko erakundea, Eusko Jaurlaritzaren baitangoa), euskal etxeek eta irakasleek berek egindako akordioa medio, urtero egiten duten tailerra burutu dute joan den asteburuan Boise Idahoko hiriburuan, irakasle gisa daramaten lanaren sostengu eta lagungarri. Eskerrak ematen dizkiegu Izaskun Kortazar eta Ibon Izurietari, artikulu hau osatu eta argitaratzeko eman diguten lankidetzagatik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
