euskal diaspora eta kultura
2010/01/11
Atzo amaitu zen Buenos Aires probintziako Chascomus herrian, Argentinako Udaleku edo lehenengo euskal udalekua, astebetez eta joan den astelehenetik, urtarrilak 4, urtarrilaren 10era arte bertako Zingirako Euskaldunak Euskal Etxeak antolaturik gauzatu dena. Maipú, Laprida, Gral. Villegas, Paraná, La Plata, Mar del Plata eta Chascomús bertako 12-16 urte bitarteko gaztetxoek hartu dute parte euskal testuinguruan kirol, aisialdi eta kultur arloak landu dituen ekitaldi honetan. Antolatzaileek emaitzek pentsatutakoa gainditu dutela esan dute, esperientzia ahaztezin gisa aipatuz, eta hasiak dira dagoeneko 2011ean bigarren edizioa prestatzen.
2010/01/11
Euskara eskolei berrekin nahi zieten eta halaxe egin dute. Joan den urriaren 5etik hasita ikasle talde bat osatu dute hiriburu paraguaitarreko Jasone Euskal Etxeko zenbait bazkide, lagun eta buruzagik eta errepublikan duela 39 baino gehiago daramatzan Jesus Nazabal berastegiarra irakasle Aitorren hizkuntzarekin ari dira astero, aldi berean Euskal Herriko kultur jakingarriak eskuratzen eta euskal lurralde, eskualde eta herri zein hirietara hurbiltzen.
2010/01/11
Bernardo Atxagaren bi kontaketa klasiko, euskal publikoarentzat aspaldidanik ezagunak direnak, ingeleseratu eta elkarrekin eman ditu argitara Nevada-Renoko Unibertsitateko Euskal Ikasketa Zentroak (CBS) 'Two Basque Stories' izenburupean. 'Bi letter jaso nituen oso denbora gutxian' eta 'Sugeak txoriari begiratzen dionean' dira testuok, Nere Leteren itzulpena medio oraingoan hurrenez hurren 'Two Letters All at Once' eta 'When a Snake Stares at a Bird' gisa kaleratuak. Liburua, gomendagarria lagun ingelesdunei oparitzeko, ingelesa praktikatzeko edo gustua berritzeko oraingoan ingelesez irakurriz, aise eros daiteke CBSren webgunean edota liburutegirik garrantzitsuenenetan.
2010/01/11
Bilboko apezpiku laguntzaile Mario Izetak eta Gasteizko apezpiku Migel Asurmendik atzorako iragarri zuten Ekuador-era egingo duten bidaiaren hasiera, herrialde amerikar horretan lanean ari diren euskal misiolariei bisita egin eta --apezpiku laguntzaileak esan duenez-- euren egoera in situ ezagutuz Euskal Elizbarrutien Misioen geroa hobekiago argitu ahal izateko, azaldu dute Bilboko Gotzaindegitik ohar baten bidez. Guayaquil-era heldu eta Arenillas, Huaquillas eta Santa Rosa bisitatuko dituzte Machala-ko Elizbarrutian eta Baba, Palenque, Vinces eta El Cafetal, Babahoyo-koan.
2010/01/08
Harrera ona egin zieten eta oroitzapen ona daukate etxetik hain urrutik egonda Euskal Herriko zatiño bat Sydneyn topatu ahal izanaz. Jose Christian Echavarria eta bere emazte Amanda Chacoko (Argentina) Euskal Etxeko kide eta ekile dira, eta gustukoa dute beste lekuetako euskaldunak bisitazea, euskal diasporako eta Euskal Herriko parte kontsideratzen baitute euren burua nonahi daudela. Sydneyra joan direlarik ere, bertako euskal etxea bisitatu zuten eta pozik itzuli dira, argazki hauetan ikus daitekeenez.
2010/01/08
Misiones probintzia argentinarreko Corpus Christi-ko Eusko Etxeak antolatu dituen azkeneko ekimenen artean 'Kontaketa Harrigarriak' izeneko literatur lehiaketaren sari-emate ekitaldia aipa daiteke. Lehenengo hiru saridun, orden honetan, izan ziren: Carlos Ariel Kusiak, lehenengo saria, Olga Rosa Leiciaga, bigarrena, eta Carolina Belén Gall, hirugarrena; eta aipamen eta diploma berezia eskuratu zuten Gloria Vanessa Toth, Luis Mario Oliveira eta Adrián Isabelino Moreirak. Lortutako partaidetza arrakastaren karietara, EEko 'Atahualpa Yupanqui' Liburutegiak lehiaketa berri baterako deia egin du, epea martxoaren 30ean izango duena (ikus oinarriak).
2010/01/08
Euskal Herriko bazter batzuetan San Tomas edo Santo Tomas festa egun handia bada ere, baserritarrak hiriratu eta euren produktu eta mozkinak erakutsi eta saltzeko elkarretaratze eta azoka handia, urteko garrantzitsuena seguruenik, Diasporan ez da eskuarki gauza bera pasatzen. Aurtengoan, Kolonbian, Bogotá-ko Euskal Etxekoak, San Tomas egunean, abenduaren 21ean bildu eta ospatu egin zuten, hitz batzuk esanez eta, gehien bat, senidetasun bazkari etga festatxo bat eginez, 'euskal erara' bertakoek esan zutenez.
2010/01/07
Egiten dioten harrera abegikorrarekin nola ez da bada Olentzero urtero inguratuko Buenos Airesko Iparraldeko Euskal Etxera! Aurtengoan, harrera festaz aparte, gauerditik aurrera 'Olentzeroren legenda' izeneko antzezpena ere prestatu zuten euskal etxean, Olentzeroren etorrerari buruzko bertsio libreko kontaketa agertuz. Istorioak lamiak, Galtzagorri eta testuinguru magiko eta mitologikoa bildu zuen, antzezle bolondresek ongi taularatuta, Norma Rios EEko idazkaria narratzaile. Elkarteko Kultura Azpibatzordeak arrakastaz prestatutako ekimen berri bat izan da.
2010/01/06
Hamabi-hamasei urte arteko berrogei gaztetxo, Buenos Aires probintziako zazpi euskal etxetako partaideak, ari dira joan den astelehenetik Chascomusen, 'Argentinako lehenengo euskal Udalekua' omen den ekitaldi honetan buru-belarri. Hemen uda sasoin betea denean, aurreneko egunean, astelehenean, ezagutza jokoak egin ziren eta Euskal Herritik etorritako boist begiraleek euren buruak aurkeztu zituzten. Euskal Herriari buruz aurkezpen orokor bat egin zen eta hando udalekuak nolakoak diren azaldu zen. Geroago, mus klaseaekin eta joko gehiagorekin segitu zen. Chascomuseko 'Zingirako Euskaldunak' Euskal Etxeak antolaturik, Udalekuk Gipuzkoako Fori Aldundiaren babesa dauka eta hiriko bertako Pilota eta Kirol Elkarteen laguntza, baita Udalarena ere.
2010/01/06
Joan den Eguberri egunean hil da Iruñean 82 urte zituela eta luzaz eri egon ondoren Juan Bautista Avalle-Arce irakaslea, Cervantesen espezialdutako hispanista eta 2003an erretiratu aurretiko azken hamarkadan Santa Barbara-Kaliforniako Unibertsitateko (UCSB) Jose Migel Barandiaran Euskal Ikasketa Katedrako titularra izan zena. Buenos Airesen jaioa, nafarren seme zen eta nafar sentimendua zeukan, euskaltzalea eta euskal kulturaren aldekoa. Hispaniar literaturari emana bizi ostean, azkeneko urteetan bere euskal erroetara hurbilagotu eta Kaliforniako Unibertsitatetik erretreta hartu ondoren Nafarroara etorri zen bizitzera, EuskalKultura.com-i 2003ko apirilean UCSBko Espainol eta Portuges Departamentuak eta Barandiaran Katedra utzi zituenean esan ziona eginez.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
