2011ko Euskal Astea bertan izango dela, Necocheako alkatea Euzko Etxea-ko arduradunekin bildu da

2011/04/01

Daniel Molina Necocheako alkatearen eta bertako Euzko Etxea-ko ordezkaritzaren arteko bilera (argazkia Necocheanews.com.ar)

PUBLIZITATEA

Hilabete batzuk falta dira oraino, baina Argentinako 2011ko Euskal Aste Nazionala datorren azaroan bertan egingo delarik, Necocheako alkateak herriko Euzko Etxea euskal elkarteko Zuzendaritza Batzordeko kideak errezibitu ditu joan den asteazkenean, Felipe Muguerza lehendakaria buru. Urte berezia da hau necocheatarrentzat, hiriak 130 urte betetzen dituela-eta ospakizun-egitarau bat eratu baita. Euskaldunentzat ere urte berezia da, duela 30 urte eginiko aurreko Euskal Aste esanguratsu baten urtemuga baita. Felipe Muguerza EEko lehendakariarekin batera, Antonio Alustiza lehendakariordea; Carlos Bilbao eta Horacio Yacomini batzordekideak, eta Joseba Bilbao gazte pilotari eta munduko paleta txapelduna hurreratu ziren udaletxera.

Necochea, Argentina. Udaletxean, Daniel Molina alkarearekin batera Marisa Coronel Kultura zuzendariak errezibitu zuen euskal ordezkaritza, ordezkaritzako buru Felipe Muguerza EEko lehendakaria, eta berarekin Antonio Alustiza lehendakariordea; Carlos Bilbao eta Horacio Yacomini batzordekideak, eta Joseba Bilbao gazte pilotari eta munduko paleta txapelduna zeudela.

Necocheako Euzko Etxea hautatu zuen FEVAk 2011ko Argentinako Euskal Aste Nazionala antolatzeko, datorren azaroan. Jakina denez, herrialde osoko euskal etxeetako kide eta lagunen biltzaile izan ohi da Euskal Astea, eta ondoko herrialdeetako euskaldun batzuk eta baita Euskal Herriko ordezkaritzarik ere bildu ohi du.

2011ko Euskal Astea, euskal izena duen Necochea hiriak --euskaldun seme zen Mariano Necochea generalari zor dio izena-- 130 urte betetzen dituen urtean izango da, hiriak hori ospatzeko egitaraua antolatu duela. Horrekin batera, euskaldunek beste zerbait ere ospatuko dute, esan nahi baita, duela 30 urte, hiria bere mendeurrena ospatzen ari zela, bertako Euzko Etxea izan baitzen orduan ere Euskal Aste Nazionala hirira ekarri eta berau antolatzeko arduradun, eta testuinguru hartan, 1981ean, Eusko Jaurlaritzako ordezkaritza bat bertaratu zen ekitaldietara, harreman fase berri bati bide emanez Jaurlaritzak eta Argentina eta Ameriketako euskal etxeek.

Necocheako Euzko Etxea 1945ean sortutako erakundea da eta aurten 66 urte beteko ditu, beraz, datorren apirilaren 15ean.