euskalkultura.eus

Chivilcoy, Argentina. Osasuna otxoteko kideek euren kantu, umore on, eta alaitasunez edertuko duten afaria bihar larunbaterako deitu du Chivilcoyko Beti Aurrera Euskal Etxeak, 21:30etatik aurrera, bere egoitzako ospakizun areto handian.

Otxotea kantuz aritzeko talde mota herrikoi bat da, Euskal Herrian --gehienbat Mendebaldean-- XX. mendearen bigarren herenetik aurrera gogoz sortu eta kantu herrikoiak, taberna giroan, euskaraz zein erdaraz --seguruenik gehiago gaztelaniaz euskaraz baino--  kantatuz hedatu izan dena. Loturak dauzka bilbainada izena hartu zuten kantuekin: alegia, Bilbo inguruak bere-bereak dauzkan bilbainadekin, Bilboko parajearen, ohituren eta jendearen paregabetasunak kantatzen dituen gaztelaniazko kantu mota honekin.

Osasuna otxotearen kasuan, 1990 hamarkada hasieran jaio zen Necocheako Euzko Etxea-ko Txoko Txikiren babesean, bertako lagunak, basoerdiak hartuz berez kantuz hasi eta horren ohitura jarraiagoa hartzen hasi zirenean. Ofizialki 1991eko bertako San Ignazioko Euskal Festetan eman zuten euren lehenengo emanaldia eta geroztik han-hemenka ibili dira bateko eta besteko euskal festetan euren umore ona zabaltzen. CD bat ere grabatu zuten, otxoteen errepertorioko kanturik ezagunenak bilduz.