euskalkultura.eus

Montevideo, Uruguai. Ondarearen Eguneko edizio berezia izan da 2025 honetakoa, aurten Uruguaiko Independentziaren Bigarren Mendeurrenarena ospatzen ari baita. Eta horrek bultzatuta, aurten ere mota diferentetako proposamenak prestatu dituzte euskal gizataldeko lagunek ospakizunarekin bat egiteko. Dantzak, hitzaldiak, erakusketak… guztietan helburu bera nagusituta: Uruguaiko historian eta gaur egun euskal ondareak daukan garrantziari ikusgarritasuna ematea.

Montevideon, Euskal Erria Euskal Etxeak urriaren 4an ireki zizkion ateak komunitateari. Egunean zehar, abizenei buruzko informazioa, bisita gidatuak, pilota erakusketak eta euskal sukaldaritza eskaini zizkien euskal etxeak bisitariei. Haize Hegoak, berriz, Nazioko Artxibo Nagusiak antolatutako ‘Gure erroak aurkitzen’ izeneko erakusketan hartu zuen parte Juan Carlos Luzuriagak eskainitako ‘Euskal Immigrazioa’ izenburuko hitzaldiarekin. Horretaz gain, euskal dantzak erakutsi eta irakatsi zituzten Euskal Etxeko dantzariek Gran Bretaña Eskolan.

Euskal Erria Euskal Etxea bisitariak jasotzen Ondarearen Eguna behar bezala ospatzeko

Bisita gidatuak, bertan lantzen den euskal kulturaz, eta erakusketak Euskal Erria Euskal Etxean

Juan Carlos Luzuriagak hitzaldia eskaini zuen Nazioko Artxibo Nagusian "Euskal inmigrazioa"z

Haur eta gaztetxoei euskal dantzak erakutsi eta irakasten hiriburuko Gran Bretaña Eskolan

Montevideotik ehun bat kilometrora dagoen San Jose herrian bertako Kultur Etxeak antolatu zuen Ondarearen Eguneko programa. Bertan ematen ditu María Noel Abella irakasleak euskara klaseak eta bertan egin zuen euskara taldeak ekintza bat: dantzak eta euskarari buruzko informazioa eskaini zizkioten parte hartu nahi izan zuen publikoari.

‘Bigarren Mendeurrena nonahi’ lelopean ospatutako Ondarearen Egunaren 31. edizioa bukatuta, datorren urtekoaren leloa jakinarazi dute antolatzaileek: "Indigenen sustraiak: iragana, oraina eta etorkizuna". Zalantzarik gabe, eta urtero bezala, euskal gizataldeak ere jarriko dio bere harri koskorra jaiari.