euskalkultura.eus

Bordele, Frantzia. Bordeleko Euskal Etxeko zuzendaritza pozik agertu da iragan asteburuan antolatu zuen Euskal Azokak izan zuen harrerarekin. Jende asko bildu zen elkarteak Quai Richeliei gunean egin zituen ekitaldietara eta giroa oso ona izan zen. "Akituak ginen, baina harrera hain izan zen ona akidura berehala ahaztu zaigula", esan dio EuskalKultura.com-i elkarteko David Mugicak.

Jarduera ugari izan ziren asteburuan zehar. Euskal azokan, adibidez, bisitari asko ibili ziren mozkinak dastatzen: Idoki elkarteko ekoizleen kutixiak, Minhondo gozotegiko pastelak... Gainera, Urruñako Kuxkuxtu txarangak etengabe alaitu zuen gunea, kantu eta abestiekin. Herri kirolek ere lekua izan zuten eta ikusleek adi-adi jarraitu zituzten saioak.

[140 kiloko harriarekin saioa, Bordeleko Euskal Etxearen Euskal Azokan (argazkia BordeleEE)]

[Umore onez aritu ziren bazterrak alaitzen Kuxkuxtu txarangako kideak (argazkia BordeleEE)]

[Larunbatean jaiak Euskal Etxean izan zuen segida gau partean (argazkia BordeleEE)]

Bestalde, Euskal Etxeak iragarri duenez, datorren urriaren 4an kontzertua eskainiko du bertan Bilboko Ingeniarien Koruak. Bordele Bilborekin senidetua da.