euskalkultura.eus

Pergamino, Argentina. Bi gonbite luzatu dizkio azken egun hauetan Pergaminoko euskal etxeak bere komunitateari. Alde batetik, Eugenia Cruset eta Cesar Arrondo La Platako Unibertsitateko irakasleen bisita jasoko du Lagun Onak-ek ostiralean, irailaren 20an. ‘Irlandarrak eta euskaldunak, autodeterminazio eta bakearen artean’ izenburuko hitzaldia emango dute, bi nazio hauen egoerak alderatuz. Hitzordua iluntzeko 8etan da, erakundearen egoitzan, 9 de julio kaleko 835ean. 

Bigarren proposamena bestelakoa da eta etxetik kanpo burutuko da, igande goizean. Deialdia ekitaldi orokorrago baten barruan gauzatuko da eta Pergaminoko Udalaren eta hiriko Elkarte Atletikoaren babesa du.

Hiriak urtero antolatzen du ‘Nuestra Señora de la Merced’ izeneko Erdi Maratoia, irailaren amaieran. Eta urtero bezala, haren barruan aurten ere egingo da ‘Lagun Onak’ Integrazio Proba Erdi Maratoiaren zati garrantzitsu gisa, euskal etxearen ardurapean. Proba ez da lehia orokorrean sartzen eta edonor aurkez daiteke, adin eta kategoria mugarik gabe. Hori dela eta komunitate osoari luzatzen dio gonbitea euskal erakundeak, batez ere familiak eta ahalmen berezidun pertsonen partaidetzarako deia eginik.

Kirol ekitaldia igande goizean –goizeko 9etan– hasiko da Pergaminoko San Martin Udal Parkean eta parte hartzeko izena emateko epea zabalik dago dagoeneko. Jaialdia bukatu aurretik, euskal etxeko dantzariek 'Aurresku' eta 'Fandango' eskainiko dizkiote bildutako jendeari.